അനാസ്ഥകള് തുടരാതിരിക്കാനാണ് ചികിത്സാ പിഴവിനെക്കുറിച്ച് വെളിപ്പെടുത്തേണ്ടി വന്നത്... പ്രതികരണം സര്ക്കാറിനോ സിസ്റ്റര്മാര്ക്കോ ഡോക്ടര്മാര്ക്കോ എതിരെയല്ല, അനീതിക്കും അനാസ്ഥക്കുമെതിരെ: ഡോ.നജ്മ
തന്റെ പ്രതികരണം സര്ക്കാറിനോ മുഴുവന് സിസ്റ്റര്മാര്ക്കോ ഡോക്ടര്മാര്ക്കോ എതിരെയല്ല. അനാസ്ഥകള് തുടരാതിരിക്കാനാണ് കളമശ്ശേരി മെഡിക്കല് കോളജിലെ ചികിത്സാ പിഴവിനെക്കുറിച്ച് വെളിപ്പെടുത്തേണ്ടി വന്നതെന്ന് ഡോ. നജ്മ. പൊതുമേഖലാ ആരോഗ്യ രംഗത്തെ ഒന്നടങ്കം താന് കുറ്റപ്പെടുത്തിയിട്ടില്ല. മറിച്ച്, അനീതിക്കും അനാസ്ഥക്കും എതിരെയാണ്. കോവിഡ് പ്രതിരോധനത്തില് വളരെ മികവുറ്റ പ്രവര്ത്തനം കാഴ്ചവെച്ച സ്ഥാപനമാണ് കളമശ്ശേരി മെഡിക്കല് കോളജ്. ഒറ്റപ്പെട്ട സംഭവങ്ങളാണ് ശ്രദ്ധയില്പ്പെടുത്തിയതെന്നും ഡോക്ടര് നജ്മ ഫേസ്ബുക്കില് കുറിച്ചു.
ഡോ. നജ്മയുടെ കുറിപ്പ്
കോവിഡ് പ്രതിരോധനത്തില് വളരെ മികവുറ്റ പ്രവര്ത്തനം കാഴ്ചവെച്ച സ്ഥാപനമാണ് കളമശ്ശേരി മെഡിക്കല് കോളേജ്. അത് നിഷേധിക്കാനാവാത്ത യാഥാര്ത്ഥ്യമാണ്. അത് പോലെ തന്നെയുള്ള യാഥാര്ത്ഥ്യങ്ങളാണ് ശ്രീ. ബൈഹക്കിയുടെയും ശ്രീമതി. ജമീലയുടെയും ചികിത്സകളില് വന്ന അനാസ്ഥകളും. അവ ചൂണ്ടിക്കാണിച്ചപ്പോള് തെറ്റുകള് മറച്ചു വെക്കുകയും പിന്നീട് അനാസ്ഥകള് നിഷേധിക്കുകയുമാണ് അധികാരികള് ചെയ്തത്. അതിനാല് തന്നെ അനാസ്ഥകളുടെ തുടര്ച്ച സംഭവിക്കാതെയിരിക്കാനാണ് മാധ്യമങ്ങളുടെ മുന്നില് എനിക്കിത് വെളുപ്പെടുത്തേണ്ടി വന്നത്.
ഇതു കാരണം സാധാരണക്കാരില് ഉണ്ടാകാവുന്ന ഭയം ഞാന് തിരിച്ചറിയുന്നു. പക്ഷേ ആ ഭയത്തേക്കാള് പ്രാധാന്യമാണ് ആരുടേയും ജീവന് അനാസ്ഥ കാരണം പൊലിയാതെ ഇരിക്കുക എന്നത്.
നല്ലതിന്റെ ക്രെഡിറ്റുകള് എടുക്കുന്നതിനൊപ്പം സംഭവിച്ച വീഴ്ചയും ഏറ്റെടുത്ത് വേണ്ട നടപടികള് അധികാരികള് സ്വീകരിച്ചിരുന്നു എങ്കില് സാധാരണക്കാരിലെ ഈ ഭയം നീങ്ങുകയും പൊതുമേഖലാ ആരോഗ്യരംഗം കൂടുതല് മെച്ചപ്പെടുകയും ചെയ്യുമായിരുന്നു.
ഞാന് പൊതുമേഖലാ ആരോഗ്യരംഗത്തെ ഒന്നടക്കം കുറ്റപ്പെടുത്തിയിട്ടില്ല. എന്റെ പ്രതികരണം സര്ക്കാറിനോ മുഴുവന് സിസ്റ്റര്മാര്ക്കോ ഡോക്ടര്മാര്ക്കോ എതിരെയല്ല. മറിച്ച്, അനീതിയ്ക്കും അനാസ്ഥയ്ക്കും എതിരെയാണ്. ഒറ്റപ്പെട്ട സംഭവങ്ങളാണ് ഞാന് ശ്രദ്ധയില് പെടുത്തിയത്. തെറ്റ് ആരുടെ ഭാഗത്ത് നിന്ന് വന്നാലും അത് തിരുത്തപ്പെടേണ്ടതാണ്.
എന്റെ കോളേജിലെ നിസ്വാര്ത്ഥമായ് പ്രയത്നിക്കുന്ന ഡോക്ടര്മാര്, നഴ്സ്മാര്, നഴ്സിങ് അസിസ്റ്റന്മാര്, ക്ളീനിംഗ് സ്റ്റാഫുകള് , അറ്റന്റര്മാര് സെക്യൂരിറ്റി ഗാര്ഡുകള് തുടങ്ങിയ അനേകം ആരോഗ്യപ്രവര്ത്തകര് ഇന്നും എന്റെ പ്രചോദനമാണ്. ഇത് മനസ്സിലാക്കുന്ന എല്ലാ ആരോഗ്യപ്രവര്ത്തകരോടും ജനങ്ങളോടും എന്നെ പിന്തുണയ്ക്കുന്ന ഓരോരുത്തരോടും എന്റെ ഹൃദയം നിറഞ്ഞ നന്ദി രേഖപ്പെടുത്തുന്നു.
https://www.facebook.com/Malayalivartha
