ഇത് വേറെ ലെവല്... സ്വര്ണക്കടത്ത് കേസില് എന്ഐഎ കോടതിയില് ശിവശങ്കറിനെതിരെ എന്ഐഎ സ്വീകരിച്ചത് തന്ത്രപരമായ നീക്കം; കസ്റ്റംസ് കേസിലും എന്ഫോഴ്സ്മെന്റ് കേസിലും ശിവശങ്കറിന് ജാമ്യം ലഭിച്ചാല് പ്രത്യേക അധികാരമുപയോഗിച്ച് ആഞ്ഞടിക്കാന് നീക്കം; കൊച്ചിയില് പുലികളെയിറക്കി വിജയം ഉറപ്പിക്കുന്നു
സ്വര്ണ്ണക്കടത്തിലെ എന്ഐഎ കേസില് എന്ഐഎ കോടതിയില് സര്ക്കാര് മുന് പ്രിന്സിപ്പല് സെക്രട്ടറി എം ശിവശങ്കറിനെതിരെ എന്ഐഎ തന്ത്രപരമായ നീക്കമാണ് നടത്തിയത്. കസ്റ്റംസില് നിന്നും എന്ഫോഴ്സ്മെന്റില് നിന്നും തന്ത്രപരമായ നീക്കത്തിലൂടെ മുന്കൂര് ജാമ്യം നേടിയതിനാല് ഇനി ശരിക്കും റോളുള്ളത് എന്ഐഎക്കാണ്. ശിവശങ്കറിനെ അറസ്റ്റ് ചെയ്യാന് തത്ക്കാലം ഉദ്ദേശിക്കുന്നില്ലെന്നാണ് എന്ഐഎ പറഞ്ഞത്. അതിനാല് തന്നെ മുന്കൂര് ജാമ്യം ഉദിക്കുന്നില്ല. തത്ക്കാലം എന്നാണ് എന്ഐഎ പറഞ്ഞത്. അതായത് ഭാവിയില് അറസ്റ്റ് ചെയ്തേക്കാമെന്ന് സൂചന. എന്നാല് അക്കാര്യം കോടതിയെ അറിയിക്കണമെന്ന് മാത്രം. ധാരാളം സാവകാശം ലഭിക്കുന്നതിനാല് കസ്റ്റംസ് കേസും ഇഡി കേസും വിലയിരുത്തി അതിന്റെ പാളീച്ചകള് നോക്കി ശിവശങ്കറെ പൊക്കാന് സാധിക്കും. ഇതിനായി കൊച്ചിയിലേക്ക് ഡല്ഹിയില് നിന്നും നിയമ സഹായമുള്പ്പെടെയുള്ളവ എത്തിക്കുന്നതാണ്.
അന്വേഷണം പുരോഗമിക്കുകയാണെന്ന് എന്ഐഐ കോടതിയില് എന്ഐഎ വാദിച്ചത്. ശിവശങ്കറിന് ക്ലീന് ചിറ്റ് നല്കിയിട്ടില്ലെന്നും വ്യക്തമാക്കി. നിലവില് പ്രതിയല്ലെന്ന അന്വേഷണ സംഘത്തിന്റെ വാദം അംഗീകരിച്ചാണ് മുന്കൂര് ജാമ്യാപേക്ഷ എന്ഐഎ കോടതി തീര്പ്പാക്കിയത്.
ശിവശങ്കറിനെ ഇതുവരെ കേസില് പ്രതി ചേര്ത്തിട്ടില്ലെന്നും അതിനാല് അറസ്റ്റോ കസ്റ്റഡിയില് എടുത്ത് ചോദ്യം ചെയ്യേണ്ട സാഹചര്യമൊ ഇല്ലെന്നുമാണ് എന്ഐഎ പ്രോസിക്യൂട്ടര് കോടതിയെ ബോധിപ്പിച്ചത്. ഇതോടെയാണ് ഹര്ജി തീര്പ്പാക്കിയത്. ശിവശങ്കറിനെ എന് ഐ എ ഇതുവരെ മൂന്ന് തവണ ചോദ്യം ചെയ്തു കഴിഞ്ഞു. ഡിജിറ്റല് തെളിവുകള് മുന്നിര്ത്തിയായിരുന്നു ഒടുവിലത്തെ ചോദ്യം ചെയ്യല്.
സ്വര്ണക്കടത്ത് കേസില് മുഖ്യ പ്രതികളായ സ്വപ്ന സുരേഷിന്റെയും, സന്ദീപിന്റെയും മൊഴികളിലെ പല കാര്യങ്ങളും ശിവശങ്കറിനെതിരാണ്. കസ്റ്റഡിയിലെടുത്ത് ചോദ്യം ചെയ്യേണ്ടി വരുമെന്ന് ഇ ഡി കോടതിയെ അറിയിച്ചിട്ടുണ്ട്. കസ്റ്റംസും ശിവശങ്കറിനെതിരെ നിരവധി തെളിവുകള് ശേഖരിച്ച് കഴിഞ്ഞു. മുന്കൂര് ജാമ്യാപേക്ഷകളിലെ അന്തിമ വിധിയും എം ശിവശങ്കറിനും, അന്വേഷണ ഏജന്സികള്ക്കും നിര്ണായകമാണ്.
സ്വര്ണ്ണക്കടത്ത് കേസുമായി ബന്ധപ്പെട്ട ശിവശങ്കറിന്റെ മുന്കൂര് ജാമ്യ ഹര്ജികളില് ബുധനാഴ്ചയാണ് വിധി. ശക്തമായ വാദമാണ് കസ്റ്റംസും ഇഡിയും നടത്തിയത്. മുന്കൂര് ജാമ്യഹര്ജി നിലനില്ക്കില്ലെന്ന് കസ്റ്റംസ് കോടതിയെ അറിയിച്ചു. പ്രതി ചേര്ത്തിട്ടില്ലാത്ത സ്ഥിതിക്ക് ജാമ്യാപേക്ഷ നിലനില്ക്കില്ലെന്നും കസ്റ്റംസ് ചൂണ്ടിക്കാട്ടി. അറസ്റ്റിനുള്ള ആശങ്കയില്ലാത്ത സ്ഥിതിക്ക് മുന്കൂര് ജാമ്യാപേക്ഷ നിലനില്ക്കില്ലെന്നും ഹര്ജി തള്ളണമെന്നുമാണ് കസ്റ്റംസ് കോടതിയില് ആവശ്യപ്പെട്ടത്.
അതേസമയം ചോദ്യം ചെയ്യല് ആരോഗ്യത്തെ ബാധിച്ചുവെന്നും അറസ്റ്റ് ചെയ്യുമെന്നുള്ള ഭയം ഇപ്പോഴും നിലനില്ക്കുന്നുണ്ടെന്നുമായിരുന്നു ശിവശങ്കറിന്റെ വാദം. ചോദ്യം ചെയ്യല് കാരണം സമൂഹത്തില് തന്നെ ഒറ്റപ്പെടുത്തിയെന്നും ശിവശങ്കര് കോടതിയെ അറിയിച്ചു. ഇത്തരത്തില് വൈകാരികമായ വാദങ്ങളാണ് ശിവശങ്കര് കോടതിയെ അറിയിച്ചത്.
സ്വപ്നയ്ക്ക് ചാര്ട്ടേര്ഡ് അക്കൌണ്ടിനെ പരിചയപ്പെടുത്തുക മാത്രമാണ് താന് ചെയ്തത്. സാമ്പത്തിക ക്രയവിക്രയങ്ങള് നടത്തിയിട്ടില്ലെന്നും ശിവശങ്കര് വാദിച്ചു. ചാര്ട്ടേഡ് അക്കൌണ്ടിന്റെ മൊഴി മാത്രമാണ് തനിക്കെതിരെയുള്ള തെളിവുകളായി അന്വേഷണസംഘം ഹാജരാക്കുന്നത്. തന്റെ പങ്കാളിത്തം സംബന്ധിച്ച് മറ്റ് തെളിവുകള് ഹാജരാക്കാന് അന്വേഷണ സംഘത്തിന് സാധിച്ചിട്ടില്ലെന്നും ശിവശങ്കര് വാദിക്കുന്നു. സാമ്പത്തിക കുറ്റകൃത്യങ്ങളില് മുന്കൂര് ജാമ്യം അനുവദിക്കാമെന്ന സുപ്രിംകോടതി വിധിയും ശിവശങ്കറിന്റെ അഭിഭാഷകന് കോടതിയില് ചൂണ്ടിക്കാട്ടി. കള്ളപ്പണം വെളുപ്പിക്കാന് താന് സഹായിച്ചിട്ടില്ലെന്നും കോടതിയില് ശിവശങ്കര് വാദം ഉന്നയിച്ചു.
എന്നാല് ജാമ്യ ഹര്ജിയെ ശക്തമായ ഭാഷയിലാണ് എന്ഫോഴ്സ്മെന്റും കോടതിയില് എതിര്ത്തത്. ശിവശങ്കറിനെതിരെ വ്യക്തമായ തെളിവുണ്ടെന്ന് വാദിച്ച ഇഡി സീല്ഡ് കവറില് ഇതു സംബന്ധിച്ച തെളിവുകളും കോടതിയില് ഹാജരാക്കി. കോടതി തെളിവുകള് പരിശോധിക്കണമെന്നും ഹര്ജി തള്ളണമെന്നും അന്വേഷണ സംഘം കോടതിയില് ശക്തമായി ആവശ്യപ്പെട്ടു. ഇതാണ് ശിവശങ്കറെ വെട്ടിലാക്കുന്നത്.
https://www.facebook.com/Malayalivartha
