സ്വപ്നയുടെ പേരില് പ്രചരിക്കുന്ന ശബ്ദരേഖയെപറ്റ ക്രൈംബ്രാഞ്ച് അന്വേഷിക്കുമെന്ന് ബെഹ്റ
തിരുവനന്തപുരം നയതന്ത്രചാനല് വഴി സ്വര്ണ്ണം കടത്തിയ കേസിലെ മുഖ്യപ്രതി സ്വപ്ന സുരേഷിന്റെ പേരില് പ്രചരിക്കുന്ന ശബ്ദരേഖയെപറ്റി ക്രൈംബ്രാഞ്ച് അന്വേഷണം നടത്തുമെന്ന് ഡി.ജി.പി ലോക്നാഥ് ബെഹ്റ. ഇതിനായി ക്രൈംബ്രാഞ്ചിന്റെ പ്രത്യേക അന്വേഷണ സംഘത്തെ ചുമതലപ്പെടുത്തിയതായും ബെഹ്റ പറഞ്ഞു. ശബ്ദരേഖയെ പറ്റി അന്വേഷണം നടത്തണമെന്ന ജയില് വകുപ്പിന്റെ അഭ്യര്ത്ഥനയെ തുടര്ന്നാണ് പൊലീസിന്റെ നടപടി. ഇ.ഡിക്കെതിരെ പ്രചരിക്കുന്ന ശബ്ദരേഖ സംബന്ധിച്ച് അന്വേഷണം നടത്തണമെന്ന് എന്ഫോഴ്സ്മെന്റ് ഡയറക്ടറേറ്റ് ജയില് മേധാവിയോട് ആവശ്യപ്പെട്ടിരുന്നു. തുടര്ന്ന് ഇഡിക്ക് മറുപടി നല്കാന് അന്വേഷണം വേണമെന്ന് ജയില്മേധാവി ഋഷിരാജ് സിംഗ് പൊലീസ് മേധാവിയോട് ആവശ്യപ്പെട്ടു. ഇതെതുടര്ന്നാണ് പ്രാഥമിക അന്വേഷണം നടത്താന് ക്രൈംബ്രാഞ്ചിനെ ചുമതലപ്പെടുത്തിയത്.
ശബ്ദം സ്വപ്നയുടെതല്ലെന്നും ചോര്ന്നത് ജയിലില് നിന്നല്ലെന്നും ജയില്വകുപ്പ് കണ്ടെത്തിയിരുന്നു. ഇതിനാല് അന്വേഷണം നടത്താനാകില്ലെന്ന നിലപാടും ജയില് അധികൃതര് സ്വീകരിച്ചു.എന്നാല് ശബ്ദരേഖ ചോര്ന്നതില് ഗൂഢാലോചനയുണ്ടെന്ന് സംശയിക്കുന്ന ഇഡി അന്വേഷണം വേണമെന്ന ആവശ്യത്തില് ഉറച്ചു നില്ക്കുകയാണ്. ഇക്കാരണത്താലാണ് ജയില് വകുപ്പിനോട് ഇഡി അന്വേഷണം ആവശ്യപ്പെട്ടത്.
ജയിലില് നിന്നല്ല ശബ്ദരേഖ ചോര്ന്നതെന്ന നിഗമനത്തിലെത്തിയ ജയില്വകുപ്പ് അന്വേഷണ റിപ്പോര്ട്ട് തയ്യാറാക്കാതെ വിവരങ്ങള് മാത്രമാണ് ഡി.ജി.പിയെ ധരിപ്പിച്ചത്. സ്വപ്ന ജുഡീഷ്യല് കസ്റ്റഡിയിലുള്ളത് കൊണ്ടാണ് രേഖാമൂലം റിപ്പോര്ട്ട് തയ്യാറാക്കാത്തതെന്നായിരുന്നു വിശദീകരണം.എന്നാല് ഇഡിയുടെ കത്തില് ജയില്വകുപ്പ് കൃത്യമായ മറുപടി നല്കേണ്ടിവരും. ചുരുങ്ങിയ സമയത്തിനുള്ളില് സ്വപ്നയെ ചോദ്യം ചെയ്യുകയും ശബ്ദരേഖ ചോര്ന്നത് ജയിലില് നിന്നല്ലെന്ന് കണ്ടെത്തുകയും ചെയ്തത് ഇഡി സംശയിക്കുന്നുണ്ട്. ശബ്ദരേഖയില് ഇഡിയുടെ പേര് പറയുന്നില്ലെങ്കിലും മുഖ്യമന്ത്രിക്കെതിരെ തെളിവുണ്ടാക്കാന് കേന്ദ്ര ഏജന്സി ശ്രമിച്ചുവെന്ന ആരോപണമാണ് ഇതിലുള്ളത്.
https://www.facebook.com/Malayalivartha
