കണ്ണൂര്‍ ജില്ലയിലെ മയ്യില്‍ കഴിഞ്ഞ എട്ടിനു രാത്രി വ്യാപാരിയുടെ പണം കവര്‍ന്ന കേസില്‍ രണ്ട് ഇറാന്‍ സ്വദേശികള്‍ അറസ്റ്റില്‍. മാജിദ്(32), മുഹ്‌സിന്‍(45) എന്നിവരെയാണ് മയ്യില്‍ പൊലീസ് അറസ്റ്റ് ചെയ്തത്. എട്ടാംമൈലിനു സമീപം പഴക്കട നടത്തുന്ന ശ്രീനിവാസന്റെ 80,000ത്തോളം രൂപയാണ് കവര്‍ന്നത്.

നാലംഗസംഘം കാറിലാണ് എത്തിയത്. അവരില്‍ നിന്നും രണ്ടു പേര്‍ കടയിലെത്തി പഴം വാങ്ങി. പണത്തിനു പകരം ഡോളര്‍ നല്‍കിയെങ്കിലും സെയില്‍സ്മാന്‍ സ്വീകരിക്കില്ലെന്ന് അറിയിച്ചു. അതേ തുടര്‍ന്ന് രണ്ടു പേരും റോഡിലേക്കു പോകുകയും, വീണ്ടും തിരിച്ചെത്തി സെയില്‍സ്മാന്‍ അകത്ത് പോയ തക്കം നോക്കി മേശയില്‍ നിന്നും പണം കവരുകയും ആയിരുന്നു.

തിരുവനന്തപുരത്ത് ഇറാന്‍ സ്വദേശികള്‍ ഇക്കഴിഞ്ഞ 13-ന് കവര്‍ച്ചയ്ക്കിടെ അറസ്റ്റിലായതോടെയാണ് മയ്യിലെ കവര്‍ച്ചയ്ക്കു പിന്നിലും ഇവര്‍ ആണെന്ന സൂചന ലഭിച്ചത്. തുടര്‍ന്ന് മയ്യിലെ ഹോട്ടലിലെ സിസി ടിവി ദൃശ്യങ്ങള്‍ പരിശോധിക്കുകയും പ്രതികള്‍ ഇവരാണെന്ന് തെളിയുകയും ചെയ്തു.

ജയിലിലെത്തിയാണ് മയ്യില്‍ പൊലീസ് പൂജപ്പുര സെന്‍ട്രല്‍ ജയിലില്‍ റിമാന്‍ഡില്‍ കഴിയുകയായിരുന്ന പ്രതികളുടെ അറസ്റ്റ് രേഖപ്പെടുത്തിയത്.