സീറ്റ് മോഹികളായവര്‍ തെരഞ്ഞെടുപ്പ് കാലത്ത് കോണ്‍ഗ്രസിന് ഉണ്ടാക്കുന്ന തലവേദന ചെറുതല്ല. സീറ്റ് മോഹികളുടെ ഇപ്പോഴത്തെ കാണപ്പെട്ട ദൈവമാണ് പിണറായി വിജയന്‍. അതായത് പിണറായി വിജയനെ ഒന്ന് പുകഴ്ത്തിയാല്‍ അത് വലിയ ചര്‍ച്ചയാകും.

അതോടെ ഇടത്തേയ്ക്ക് ചായുന്നുവെന്ന വാര്‍ത്ത വരും. പിന്നെ ഒരു ദിവസം പത്രസമ്മേളനത്തിന് നിശ്ചയിക്കും. അതിന് മുമ്പ് സോണിയ ഗാന്ധി മുതല്‍ പാവം ചെന്നിത്തല വരെ ആരെങ്കിലും വിളിച്ച് സീറ്റുറപ്പ് നല്‍കും. അതാണ് പ്രൊഫ. കെ.വി. തോമസും പരീക്ഷിച്ച് വിജയിച്ചത്.

കെ.വി. തോമസിനു പിന്നാലെ സമ്മര്‍ദതന്ത്രവുമായി മുതിര്‍ന്ന കോണ്‍ഗ്രസ് നേതാവ് പി.സി. ചാക്കോയും. കോണ്‍ഗ്രസ് വിടാന്‍ പി.സി. ചാക്കോ ഒരുങ്ങുന്നതായി അഭ്യൂഹം. പാര്‍ട്ടിവിടുമെന്ന മുതിര്‍ന്ന നേതാവായ കെ.വി. തോമസിന്റെ സമ്മര്‍ദതന്ത്രം പാര്‍ട്ടി അധ്യക്ഷ സോണിയ ഗാന്ധി ഇടപെട്ടു തല്‍ക്കാലം മരവിപ്പിച്ചിരിക്കുകയാണ്.

എന്നാല്‍, പി.സി. ചാക്കോയുടെ കാര്യത്തില്‍ സംസ്ഥാനദേശീയ തലത്തില്‍ വലിയ ഇടപെടലുകള്‍ ഇതുവരെ ഉണ്ടായിട്ടില്ല. ചാക്കോ പോയാലും പ്രശ്‌നമില്ലെന്ന മട്ടിലാണ് സംസ്ഥാന കോണ്‍ഗ്രസ് നേതൃത്വം. ആളെക്കൂട്ടാന്‍ കെല്‍പ്പുള്ള നേതാവായി ചാക്കോയെ സംസ്ഥാന കോണ്‍ഗ്രസ് നേതൃത്വം കണക്കാക്കുന്നില്ല. എന്നാല്‍, മുതിര്‍ന്ന നേതാവായ ചാക്കോയ്ക്ക് ക്രിസ്തീയ സഭാ നേതൃത്വവുമായി നല്ല അടുപ്പമുണ്ട്. തൃശൂര്‍, എറണാകുളം മേഖലയിലാണ് ചാക്കോയുടെ സഭാ ബന്ധത്തിന്റെ ബലം. അതുകൊണ്ട് ചാക്കോയെ പിണക്കുന്നത് മധ്യകേരളത്തില്‍ പാര്‍ട്ടിക്ക് ക്ഷീണമാകുമോയെന്ന ആശങ്കയും കോണ്‍ഗ്രസിലുയര്‍ന്നിട്ടുണ്ട്.

സംസ്ഥാന രാഷ്ട്രീയത്തിനേക്കാളും ഹൈക്കമാന്‍ഡിലായിരുന്നു ചാക്കോയുടെ പിടിയത്രയും. കഴിഞ്ഞ ലോക്‌സഭാ തെരഞ്ഞെടുപ്പില്‍ ചാലക്കുടി, തൃശൂര്‍ എന്നീ സീറ്റുകളിലൊന്നില്‍ മത്സരിക്കാന്‍ കഴിയുമെന്ന് ചാക്കോ ധരിച്ചിരുന്നു. എന്നാല്‍, ഹൈക്കമാന്‍ഡ് കൈവിട്ടു. ഇതില്‍ പ്രതിഷേധിച്ച് ചാക്കോ ദേശീയ നേതൃത്വത്തിനെതിരേ കടുത്ത പരാമര്‍ശങ്ങള്‍ നടത്തുകയുണ്ടായി. ഡല്‍ഹി തെരഞ്ഞെടുപ്പില്‍ കോണ്‍ഗ്രസ് ദയനീയ പരാജയം ഏറ്റുവാങ്ങിയപ്പോള്‍ ഷീല ദീക്ഷിത് അടക്കമുള്ളവരെ ചാക്കോ നിശിതമായി വിമര്‍ശിച്ചിരുന്നു. ഇതോടെ രാഹുല്‍ ഗാന്ധിയുടെ കണ്ണിലെ കരടുമായി.

എന്നാല്‍, ചാക്കോ കോണ്‍ഗ്രസുമായി മാനസികമായ അകന്നു എന്ന മട്ടിലാണ് പ്രചാരണം. ശരദ്പവാറുമായി അദ്ദേഹം അടുക്കുന്നുവെന്നും അടുത്ത കേന്ദ്രങ്ങള്‍ വെളിപ്പെടുത്തുന്നു. പവാറിന്റെ എന്‍.സി.പിയിലൂടെ എല്‍.ഡി.എഫില്‍ എത്തി സംസ്ഥാന രാഷ്ട്രീയത്തില്‍ സജീവമാകാനാണ് ചാക്കോ ശ്രമിക്കുന്നതെന്നാണ് പ്രചാരണം. കോണ്‍ഗ്രസ് രാഷ്ട്രീയത്തില്‍ തനിക്കിനി കാര്യമായി ഒന്നും നേടാനാകില്ലെന്ന ബോധ്യമായതോടെയാണ് കോണ്‍ഗ്രസിലായിരുന്നപ്പോള്‍ തന്റെ പഴയ നേതാവായ ശരദ്പവാറുമായി ബന്ധപ്പെട്ടതെന്നാണ് പുറത്തുവരുന്ന വിവരം.

നിലവില്‍ എന്‍.സി.പിക്ക് സംസ്ഥാനത്ത് കരുത്തുറ്റ നേതൃത്വം ഇല്ലെന്നതും ചാക്കോയ്ക്ക് ഗുണകരമാകുന്നുണ്ട്. പാലാ സീറ്റിനെച്ചൊല്ലി ആടിയുലയുകയാണ് എന്‍.സി.പി. വേണമെങ്കില്‍ പാലാ സീറ്റ് വിട്ടുകൊടുത്ത് വിട്ടുവീഴ്ചയ്ക്കു തയാറാകുന്നതിനൊപ്പം ചാക്കോയ്ക്കും ഒരു സീറ്റ് പവാര്‍ ഉന്നമിടുന്നുണ്ടെന്നും സൂചനയുണ്ട്. ഇടതുപക്ഷത്തു നിന്ന് വിട്ടുപോകാന്‍ പവാറിനു താല്‍പര്യമില്ലെന്നും അതിനു പിന്നില്‍ ചാക്കോയാണെന്നും ചില കേന്ദ്രങ്ങള്‍ സൂചിപ്പിക്കുന്നത്.

പണ്ടത്തെ ചാനല്‍ ചര്‍ച്ചകളിലെ സ്ഥിരം സാന്നിധ്യമായ ചാക്കോയ്ക്കും സീറ്റ് തന്നെയാണ് മുഖ്യം. ആരെങ്കിലും ഇടപെട്ട് ഒരു സീറ്റ് നല്‍കിയില്ലെങ്കില്‍ ചാക്കോ ചാക്കുമായി എത്തുന്നത് പിണറായി വിജയന്റെ അടുത്തായിരിക്കും.