അഞ്ച് വയസിന് താഴെയുള്ള 24,49,222 കുട്ടികള്‍ക്ക് 24,690 ബൂത്തുകളിലായി ഇന്ന് പള്‍സ് പോളിയോ പ്രതിരോധ തുള്ളിമരുന്ന് നല്‍കും. രാവിലെ 8 മുതല്‍ വൈകിട്ട് 5 വരെയാണ് സമയം.

അങ്കണവാടികള്‍, സ്‌കൂളുകള്‍, ബസ് സ്റ്റാന്‍ഡുകള്‍, ആരോഗ്യകേന്ദ്രങ്ങള്‍, വായനശാല, വിമാനത്താവളം,ബോട്ടുജെട്ടി, റെയില്‍വേ സ്റ്റേഷനുകള്‍ തുടങ്ങിയ സ്ഥലങ്ങളില്‍ ബൂത്തുകള്‍ ഒരുക്കിയിട്ടുണ്ട്. കോവിഡ് പ്രതിരോധ മുന്‍കരുതലുകളോടെയാണ് ജില്ലയില്‍ ഇന്നു പള്‍സ് പോളിയോ പ്രതിരോധ തുള്ളിമരുന്നു വിതരണം ചെയ്യുന്നത്.

അഞ്ചു വയസില്‍ താഴെയുള്ള 1,11,071 കുട്ടികള്‍ക്ക് മരുന്നു നല്‍കാനുള്ള ക്രമീകരണങ്ങളാണ് ഏര്‍പ്പെടുത്തിയിട്ടുള്ളത്. 1307 വിതരണ കേന്ദ്രങ്ങളിലായി 2614 സന്നദ്ധ പ്രവര്‍ത്തകരെ നിയോഗിച്ചിട്ടുണ്ട്. ഓരോ കേന്ദ്രത്തിലും വാക്സിന്‍ നല്‍കുന്ന രണ്ടു സന്നദ്ധ പ്രവര്‍ത്തകരും എന്‍ 95 മാസ്‌ക്, ഫേസ് ഷീല്‍ഡ് എന്നിവ ധരിക്കും. ബൂത്തിന് പുറത്ത് വച്ചിട്ടുള്ള സാനിറ്റൈസര്‍ ഉപയോഗിച്ചു കൈകള്‍ ശുചീകരിച്ച ശേഷം മാത്രമേ സന്ദര്‍ശകര്‍ വാക്സിന്‍ ബൂത്തില്‍ പ്രവേശിക്കാവൂ.

വീട്ടില്‍നിന്നു കുട്ടിക്കൊപ്പം ഒരാള്‍ മാത്രമെത്തിയാല്‍ മതിയാകും. എത്തുമ്പോള്‍ നിര്‍ബന്ധമായും മാസ്‌ക് ധരിച്ചിരിക്കണം. പനി, ചുമ, ജലദോഷം, വയറിളക്കം, തലവേദന തുടങ്ങിയ രോഗലക്ഷണങ്ങളുള്ളവര്‍ യാതൊരു കാരണവശാലും ബൂത്തില്‍ എത്തരുത്. കുട്ടികളുമായി എത്തുന്നവര്‍ കാത്തിരിക്കേണ്ടി വന്നാല്‍ സാമൂഹിക അകലം പാലിക്കാന്‍ പ്രത്യേകം ശ്രദ്ധിക്കണം.




ഇന്നു വാക്സിന്‍ സ്വീകരിക്കാന്‍ കഴിയാത്ത കുട്ടികള്‍ക്ക് തിങ്കളാഴ്ചയും, ചൊവ്വാഴ്ചയും ആരോഗ്യ പ്രവര്‍ത്തകര്‍ വീട്ടിലെത്തി നല്‍കും.ഇത്തരത്തില്‍ വീടുകളിലെത്തുന്ന സന്നദ്ധ പ്രവര്‍ത്തകരും കോവിഡ് പ്രതിരോധ മുന്‍കരുതലുകള്‍ സ്വീകരിക്കും.

വാക്സിന്‍ വിതരണത്തിനു നിയോഗിക്കപ്പെട്ടിട്ടുള്ള ഓരോരുത്തര്‍ക്കും മൂന്നു വീതം മാസ്‌കുകളും ഫേസ് ഷീല്‍ഡുകളും 100 മില്ലി ലിറ്ററിന്റെ രണ്ടു സാനിറ്റൈസറുകളും നല്‍കിയിട്ടുണ്ട്. ആരോഗ്യകേന്ദ്രങ്ങള്‍, അങ്കണവാടികള്‍, സ്വകാര്യ ആശുപത്രികള്‍, സന്നദ്ധ സംഘടനകളുടെ കെട്ടിടങ്ങള്‍ എന്നിവിടങ്ങളിലാണ് രാവിലെ എട്ടു മുതല്‍ വൈകുന്നേരം അഞ്ചു വരെ ബൂത്തുകള്‍ പ്രവര്‍ത്തിക്കുക. ഇതിനു പുറമേ 45 ട്രാന്‍സിറ്റ് ബൂത്തുകളും 40 മൊബൈല്‍ ബൂത്തുകളുമുണ്ടാകും.

റെയില്‍വെ സ്റ്റേഷനുകള്‍, ബസ് സ്റ്റാന്‍ഡുകള്‍, ബോട്ടു ജെട്ടികള്‍ എന്നിവിടങ്ങളിലാണു ട്രാന്‍സിറ്റ് ബൂത്തുകള്‍ പ്രവര്‍ത്തിക്കുക. അന്യസംസ്ഥാനത്തൊഴിലാളികളുടെ താമസസ്ഥലങ്ങള്‍, ഉത്സവ സ്ഥലങ്ങള്‍, കല്യാണ മണ്ഡപങ്ങള്‍ തുടങ്ങിയ കേന്ദ്രങ്ങളിലെത്തി മരുന്നു വിതരണം ചെയ്യാനാണു മൊബൈല്‍ ബൂത്തുകള്‍ ഏര്‍പ്പെടുത്തിയിരിക്കുന്നത്.