നന്ദി വേണമണ്ണാ ദുബായ് നന്ദി വേണം എന്നാണ് സഖാക്കളായ സഖാക്കളെല്ലാം എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശനോട് പറയുന്നത്. ദുബായില്‍ പൊന്നുമോന്‍ അറബി പോലീസില്‍ പെട്ടപ്പോള്‍ രക്ഷിക്കാന്‍ നമ്മുടെ മുഖ്യമന്ത്രി മാത്രമേ ഉണ്ടായിരുന്നുള്ളൂ.

എന്നാല്‍ മുഖ്യമന്ത്രിക്കൊരു ആപത്തു വന്നപ്പോള്‍ കാല് മാറുകയാണ്. ആസന്നമായ നിയമസഭാ തെരഞ്ഞെടുപ്പില്‍ ചെന്നിത്തലയെ വെട്ടി ഉമ്മന്‍ ചാണ്ടി രംഗത്തെത്തിയതോടെയാണ് വെള്ളാപ്പള്ളിയുടെ മനസ് മാറിയത്. ഉമ്മന്‍ചാണ്ടി വന്നാലുള്ള തങ്ങളുടെ ചാകര കാലം മുന്നില്‍ കണ്ടാണ് വെള്ളാപ്പള്ളിയുടെ നിലപാട് മാറ്റം.

സോളര്‍ കേസില്‍ നിന്നു വ്യത്യസ്തമായി സ്വര്‍ണക്കള്ളക്കടത്തു കേസ് വളരെ ഗൗരവമേറിയതും രാജ്യസുരക്ഷയെ തന്നെ അപകടത്തിലാക്കുന്ന വിഷയവുമാണെന്നുമാണ് ഇതുവരെ ഉറങ്ങിക്കിടന്ന വെള്ളാപ്പള്ളി നടേശന്റെ വിധി.

ഇതു രാജ്യത്തെയും രാജ്യസുരക്ഷയെയും അട്ടിമറിക്കുന്ന വിഷയമാണ്. കഴിഞ്ഞ സര്‍ക്കാരിന്റെ കാലത്തുണ്ടായ സോളര്‍ കേസ് വെറും പെണ്ണുവിഷയമാണ്. അതിനു സ്വര്‍ണക്കള്ളക്കടത്തു കേസിന്റെയത്ര പ്രാധാന്യമുണ്ടെന്നു വിശ്വസിക്കുന്നില്ലെന്നും വെള്ളാപ്പള്ളി നടേശന്‍ വ്യക്തമാക്കി.

സ്വര്‍ണക്കള്ളക്കടത്തു കേസ് മുഖ്യമന്ത്രിയുടെ ഓഫിസ് കേന്ദ്രീകരിച്ചാണു നടന്നതെങ്കിലും മുഖ്യമന്ത്രി വിശ്വസിച്ചവര്‍ അദ്ദേഹത്തെ ചതിക്കുകയായിരുന്നു. അതുകൊണ്ടാണ് ഉപ്പു തിന്നവന്‍ വെള്ളം കുടിക്കട്ടെ എന്നു മുഖ്യമന്ത്രി പിണറായി വിജയന്‍ പറഞ്ഞതും എം. ശിവശങ്കറിനെ കയ്യൊഴിഞ്ഞതും. കേസ് കേന്ദ്ര ഏജന്‍സികള്‍ ഗൗരവമായി അന്വേഷിച്ചു കൊണ്ടിരിക്കുകയാണല്ലോ. അവര്‍ സത്യം കണ്ടെത്തട്ടെ.

സോളര്‍ കേസില്‍ ഇത്രയും നാളും അന്വേഷണം ഇല്ലായിരുന്നു. ഇപ്പോള്‍ വീണ്ടും കുത്തിപ്പൊക്കി കൊണ്ടു വന്നിരിക്കുന്നു. പരാതിയില്‍ അന്വേഷണം ഇല്ലെന്ന പരാതിക്കാരിയുടെ ആവശ്യം സര്‍ക്കാര്‍ അംഗീകരിച്ചു കേസ് സിബിഐയ്ക്കു വിടുകയായിരുന്നു. അന്വേഷണം നടക്കട്ടെ. സിബിഐ യ്ക്കു വിട്ടതില്‍ രാഷ്ട്രീയമുണ്ടോ ഇല്ലോയെന്നു രാഷ്ട്രീയക്കാര്‍ ചിന്തിക്കട്ടെ. അതില്‍ അഭിപ്രായം പറയുന്നില്ലെന്നും വെള്ളാപ്പള്ളി പറഞ്ഞു.

സംവരണ വിഷയത്തില്‍ പിന്നാക്ക വിഭാഗങ്ങളോട് അങ്ങേയറ്റത്തെ അനീതിയാണു സംസ്ഥാന സര്‍ക്കാര്‍ കാട്ടിയതെന്നും വെള്ളാപ്പള്ളി നടേശന്‍ ആരോപിച്ചു. സംവരണ കാര്യത്തില്‍ യോഗത്തിനു കടുത്ത എതിര്‍പ്പുണ്ട്. സര്‍ക്കാരിന്റെ നിലപാട് ഒട്ടും യുക്തിക്കു നിരക്കുന്നതല്ല. സവര്‍ണരുടെ സ്വാധീനമാണ് എല്‍ഡിഎഫില്‍ കൂടുതല്‍. ഘടകകക്ഷികളോടു കൂടിയാലോചന പോലും നടത്താതെയായിരുന്നു തീരുമാനം. ഇതു കടുത്ത അസന്തുലിതാവസ്ഥയുണ്ടാക്കുമെന്നും വെള്ളാപ്പള്ളി പറഞ്ഞു.

കോണ്‍ഗ്രസ് നേതാക്കളില്‍ പലരേക്കാളും കൊള്ളാവുന്നതു ഉമ്മന്‍ചാണ്ടിയാണ്. ഇടപെടുന്ന കാര്യത്തില്‍ നീതി നടപ്പാകണമെന്ന വാശിയും ആഗ്രഹവുമുള്ള നേതാവാണ് ഉമ്മന്‍ചാണ്ടി. എല്ലാം നീതിയോടെ നടക്കണമെന്ന ആഗ്രഹം അദ്ദേഹം പ്രകടിപ്പിച്ചിട്ടുണ്ടെങ്കിലും പലപ്പോഴും സാധിച്ചിട്ടില്ലെന്നു മാത്രം. ഉമ്മന്‍ചാണ്ടി ജനങ്ങള്‍ ഏറെ ഇഷ്ടപ്പെടുന്ന നേതാവാണ്. ജനകീയ സമീപനവും ഉള്ള നേതാവാണ്.

പിണറായി കര്‍ക്കശക്കാരനാണെന്നും ജനകീയനല്ലെന്നും അകന്നു നില്‍ക്കുമ്പോള്‍ നമുക്കു തോന്നും. പക്ഷേ, അടുക്കുമ്പോള്‍ നമുക്കു മനസ്സിലാകും, അദ്ദേഹം ജനകീയനാണ്, പാവമാണ്, മാന്യനാണ്. അകന്നു നിന്നു കാണുന്ന പിണറായിയും അടുത്തു നിന്നു കാണുന്ന പിണറായിയും രണ്ടും രണ്ടാണ്. അതേസമയം, ഉമ്മന്‍ചാണ്ടി അടുത്തു നില്‍ക്കുമ്പോഴും അകന്നു നില്‍ക്കുമ്പോഴും ഒരു പോലെയാണ്. ഇതാണ് അവര്‍ തമ്മിലുള്ള വ്യത്യാസം.