കോണ്‍ഗ്രസിനൊപ്പം പ്രവര്‍ത്തിക്കാന്‍ തീരുമാനിച്ച നടന്‍ രമേഷ് പിഷാരടി കേരളത്തിലെ ഏത് മണ്ഡലത്തിലും മത്സരിക്കാന്‍ യോഗ്യനാണെന്നും സുഹൃത്തും നടനുമായ ധര്‍മജന്‍ ബോള്‍ഗാട്ടി. ദീര്‍ഘവീക്ഷണമുള്ള വ്യക്തിയാണ് പിഷാരടി. തെരഞ്ഞെടുപ്പില്‍ മത്സരിക്കുമോ ഇല്ലയോ എന്നത് നേതാക്കള്‍ തീരുമാനിക്കേണ്ട കാര്യമാണ്. നേതൃത്വം ആവശ്യപ്പെട്ടാല്‍ എവി‍ടെയും മത്സരിക്കാന്‍ താന്‍ തയാറാണെന്നും ധര്‍മജന്‍ പറഞ്ഞു.

തന്നോടൊപ്പം പിഷാരടി കൂടി കോണ്‍ഗ്രസിലേക്ക് വരുമ്ബോള്‍ കേരളത്തിലെ യുവാക്കള്‍ക്ക് കാര്യം മനസ്സിലാകും. വളരെ ആലോചിച്ചും ബുദ്ധിപൂര്‍വവും തീരുമാനമെടുക്കുന്നയാളാണ് പിഷാരടി. എന്നും കോണ്‍ഗ്രസ് അനുഭാവിയായിരുന്നു. ഞങ്ങള്‍ തമ്മില്‍ രാഷ്ട്രീയം സംസാരിക്കാറുണ്ട്. കഴിഞ്ഞ ദിവസം കണ്ടപ്പോള്‍ രാഷ്ട്രീയ പ്രവേശനത്തെ കുറിച്ച്‌ പറഞ്ഞിരുന്നു. ഇനിയും ഒരുപാട് പേര്‍ കോണ്‍ഗ്രസിലേക്ക് വരും.

18 വര്‍ഷമായി തുടരുന്ന കൂട്ടുകെട്ടാണ് ഞങ്ങള്‍ തമ്മില്‍. മത്സരിച്ചില്ലെങ്കില്‍ പിഷാരടി പ്രചാരണത്തിനിറങ്ങുമെന്ന് ഉറപ്പാണ്. അറിയപ്പെടുന്ന നേതാവായി മാറുമെന്നും ധര്‍മജന്‍ പറഞ്ഞു.

കോണ്‍ഗ്രസ് പ്രചാരണത്തിന്‍റെ മുന്‍നിരയിലുണ്ടാകുമെന്ന് ധര്‍മജന്‍ വ്യക്തമാക്കിയതിന് പിന്നാലെയാണ് ഉറ്റസുഹൃത്ത് രമേഷ് പിഷാരടിയും കോണ്‍ഗ്രസ് രാഷ്ട്രീയത്തിലേക്ക് കടക്കുന്നത്. അടുത്ത ദിവസം ഹരിപ്പാട് പ്രതിപക്ഷ നേതാവ് നയിക്കുന്ന ഐശ്വര്യ കേരള യാത്രയില്‍ പിഷാരടി പങ്കെടുക്കുമെന്നാണ് വിവരം.

അതേസമയം, ധര്‍മജന്‍ ബാലുശ്ശേരി മണ്ഡലത്തില്‍ മത്സരിക്കുമെന്ന് വ്യാപക അഭ്യൂഹമുണ്ട്. മണ്ഡലത്തിലെ നിരവധി പൊതു-സ്വകാര്യ ചടങ്ങുകളില്‍ ധര്‍മജന്‍ പങ്കെടുത്തിരുന്നു.