രാഹുല്‍ ഗാന്ധി വയനാട്ടില്‍ മത്സരിച്ചില്ലായിരുന്നെങ്കില്‍ കാണാമായിരുന്നു. ലോക്‌സഭ കാണാതെ രാഹുലിന് ഇരിക്കേണ്ടി വന്നേനെ. രാഹുല്‍ പ്രധാനമന്ത്രിയാകുമെന്ന് കണ്ട മലയാളികള്‍ രാഹുലിന് വയനാട് മാത്രമല്ല ആകെ 19 സീറ്റുകളാണ് നല്‍കിയത്.

ഈ നിയമസഭാ തെരഞ്ഞെടുപ്പില്‍ കോണ്‍ഗ്രസിന് 50 സീറ്റെങ്കിലും നേടിക്കൊടുക്കാനുള്ള ശ്രമത്തിലാണ് രാഹുല്‍ ഗാന്ധി. അതിന് രാഹുല്‍ ഗാന്ധി തന്നെ മുഖയമന്ത്രി സ്ഥാനാര്‍ത്ഥിയായി മത്സരിക്കേണ്ടി വരുമെന്നാണ് കോണ്‍ഗ്രസുകാര്‍ പോലും പറയുന്നത്.

സംസ്ഥാനത്ത് ഭരണത്തില്‍ തിരിച്ചെത്താന്‍ കോണ്‍ഗ്രസിന്റെ സിറ്റിംഗ് എം.എല്‍.എമാരുടെ എണ്ണം ഇപ്പോഴത്തെ 21ല്‍ നിന്ന് അമ്പതിനപ്പുറത്തേക്ക് കടത്തുകയെന്ന വെല്ലുവിളി അതിജീവിക്കാന്‍ എ.ഐ.സി.സി കഠിനാദ്ധ്വാനത്തിലാണ്.

90 മണ്ഡലങ്ങളിലെങ്കിലും കോണ്‍ഗ്രസ് നേരിട്ട് മത്സരിക്കുമെന്ന കണക്കുകൂട്ടലില്‍, 100 മണ്ഡലങ്ങളില്‍ അനുയോജ്യരായ സ്ഥാനാര്‍ത്ഥികളെ കണ്ടെത്താന്‍ എ.ഐ.സി.സിയുടെ നേതൃത്വത്തില്‍ മൂന്ന് ഏജന്‍സികളുടെ രഹസ്യ സര്‍വേകള്‍ പൂര്‍ത്തിയായി.

കെ.പി.സി.സി മുഖേന എ, ഐ ഗ്രൂപ്പ് നേതൃത്വങ്ങള്‍ സമര്‍പ്പിച്ച സാദ്ധ്യതാ പട്ടികയിലെ പേരുകള്‍ക്ക് പുറമേ, ഓരോ മണ്ഡലത്തിലും പേരുകളൊന്നും പറയാതെ ജനകീയ പരിവേഷമുള്ളവരെ കണ്ടെത്താനാണ് സര്‍വ്വേകളിലൂടെ ശ്രമിച്ചതെന്നാണ് വിവരം.

ഗ്രൂപ്പുകളുടെയോ വ്യക്തികളുടെയോ സ്ഥാപിത താല്പര്യങ്ങള്‍ ഇക്കുറി പാര്‍ട്ടി സ്ഥാനാര്‍ത്ഥി പട്ടികയില്‍ ഇടം പിടിക്കില്ലെന്ന കര്‍ശന മുന്നറിയിപ്പ് ഹൈക്കമാന്‍ഡ് നല്‍കിയതിന് പിന്നാലെയാണ്, സര്‍വേയിലേക്കും കോണ്‍ഗ്രസ് കടന്നത്. കൊല്‍ക്കത്ത, മുംബയ്, ബംഗളുരു എന്നിവിടങ്ങള്‍ കേന്ദ്രീകരിച്ചുള്ള മൂന്ന് ഏജന്‍സികളെയാണ് സര്‍വേയ്ക്കായി ചുമതലപ്പെടുത്തിയത്.

തിരുവനന്തപുരം, കൊല്ലം, ആലപ്പുഴ, കോട്ടയം, തൃശൂര്‍ ജില്ലകളില്‍ നിന്ന് പരമാവധി ജനപ്രതിനിധികളെ നിയമസഭയിലേക്കെത്തിക്കാന്‍ കോണ്‍ഗ്രസിന് കഴിഞ്ഞില്ലെങ്കില്‍ അധികാരത്തിലേക്കുള്ള തിരിച്ചുവരവ് അസാദ്ധ്യമാണെന്നാണ് വിലയിരുത്തല്‍. മലപ്പുറത്ത് മുസ്ലിംലീഗിന് അപ്രമാദിത്വമാണ്. കോഴിക്കോട് ജില്ലയിലും ലീഗിന് മേല്‍ക്കൈയുണ്ടാകുമെന്നാണ് വിലയിരുത്തല്‍.

ലീഗ് കഴിഞ്ഞാല്‍ ചില മണ്ഡലങ്ങളില്‍ കോഴിക്കോട്ട് ഇടതിനാണ് മേല്‍ക്കൈ. കൂടുതല്‍ സീറ്റുകള്‍ ആ ജില്ലയില്‍ കോണ്‍ഗ്രസ് പ്രതീക്ഷിക്കുന്നില്ല. കണ്ണൂര്‍ ജില്ലയിലും ഏറിയാല്‍ മൂന്ന് സീറ്റ് വരെയാണ് പ്രതീക്ഷ. കാസര്‍കോട്ട് അഞ്ച് മണ്ഡലങ്ങളുള്ളതില്‍ ലീഗിനാണ് രണ്ട് സിറ്റിംഗ് സീറ്റുകളുള്ളത്. അവശേഷിച്ചവയില്‍ ഉദുമയില്‍ മാത്രമാണ് കോണ്‍ഗ്രസിന് അല്പമെങ്കിലും പ്രതീക്ഷ വയ്ക്കാവുന്നത്. പാലക്കാട് ജില്ലയില്‍ പരമാവധി രണ്ട് മുതല്‍ നാല് വരെ സീറ്റുകള്‍ നേടാനായേക്കും. വയനാട്ടില്‍ രണ്ടോ, ചിലപ്പോള്‍ മൂന്നുമോ നേടാനായേക്കാം.

കൊല്ലം, ആലപ്പുഴ ജില്ലകള്‍ ഇപ്പോഴത്തെ സ്ഥിതിയില്‍ കടുകട്ടിയാണ്. നാടാര്‍ ക്രിസ്ത്യന്‍ സംവരണമേര്‍പ്പെടുത്തിയതോടെ തിരുവനന്തപുരം ജില്ലയിലെ തെക്കന്‍ മണ്ഡലങ്ങള്‍ എങ്ങനെ പ്രതികരിക്കുമെന്നതും വെല്ലുവിളിയാണ്.

ആകര്‍ഷണീയ മുഖങ്ങളെ പരീക്ഷിച്ചാലേ പോരാടി നേടാനാവൂ. ഇടത് കോട്ടയായിരുന്ന തൃത്താല യുവാവായ വി.ടി. ബല്‍റാമിനെയും, പാലക്കാട് യുവാവായ ഷാഫി പറമ്പിലിനെയും ഇറക്കി 2011ലും, പറവൂര്‍ വി.ഡി. സതീശനെ ഇറക്കി 2001ലും പിടിച്ചെടുത്തതും ഹൈക്കമാന്‍ഡ് വിലയിരുത്തുന്നുണ്ട്.

ഇതുപോലെ മറ്റ് മണ്ഡലങ്ങളിലും പരീക്ഷണം നടത്താനാണ് രാഹുല്‍ ഗാന്ധി നോക്കുന്നത്. മുസ്ലീം ലീഗ് കൂടുതല്‍ സീറ്റുകള്‍ നേടുകയും കോണ്‍ഗ്രസിന് പ്രതീക്ഷിച്ച സീറ്റുകള്‍ നേടാന്‍ കഴിയാതെ വരുകയും ചെയ്താല്‍ അത് വലിയ വെല്ലുവിളിയാകും. കോണ്‍ഗ്രസിന്‌മേല്‍ ഘടക കക്ഷികള്‍ മേല്‍ക്കൈ നേടുകയും ചെയ്യും. ഇതൊഴിവാക്കാനാണ് രാഹുലിന്റെ നീക്കം.