സംസ്ഥാനത്ത് എങ്ങനേയും ബിജെപിയുടെ നില മെച്ചപ്പെടുത്താനൊരുങ്ങുകയാണ് ബിജെപി കേന്ദ്ര നേതൃത്വം. എല്ലായിപ്പോഴും വിജയ പ്രതീക്ഷ പുലര്‍ത്തുന്നവരാണ് സംസ്ഥാന ബിജെപി. എന്നാല്‍ ഫലം വരുമ്പോള്‍ തോല്‍വിയായിരിക്കും ഉണ്ടാകുക. ഇതിന് മാറ്റം വരുത്തുന്നതിനാണ് കേന്ദ്രം ശ്രമിക്കുക.

വിജയമുണ്ടായില്ലെങ്കില്‍ ഉത്തരവാദപ്പെട്ടവരും പ്രശ്‌നക്കാരും സംഘടനയോടു മറുപടി പറയേണ്ടി വരുമെന്നു ബിജെപി ഭാരവാഹികള്‍ക്കു സംസ്ഥാനത്തിന്റെ പാര്‍ട്ടി ചുമതലയുള്ള കേന്ദ്രമന്ത്രി പ്രള്‍ഹാദ് ജോഷിയാണ് താക്കീത് നല്‍കിയിരിക്കുന്നത്. ഉത്തരവാദിത്തം നിര്‍വഹിക്കാത്തവര്‍ സംഘടനാ സംവിധാനത്തിലുണ്ടാകാനിടയില്ല. നരേന്ദ്ര മോദി നടപ്പാക്കിയ പദ്ധതികള്‍ ജനങ്ങളിലെത്തിച്ചാല്‍ മാത്രം വിജയിക്കുമെന്നും മറ്റൊന്നും പറയേണ്ടതില്ലെന്നും ബിജെപി സംസ്ഥാന ഭാരവാഹികളുടെ വിവിധ യോഗങ്ങളിലായി അദ്ദേഹം പറഞ്ഞു.

ഗ്രൂപ്പിസം എന്ന വാക്കുപയോഗിച്ചില്ലെങ്കിലും സംസ്ഥാന നേതൃത്വത്തിലെ വഴക്കിനെക്കുറിച്ച് അദ്ദേഹം സൂചിപ്പിച്ചു. ഉത്തരവാദിത്തമുണ്ടായിട്ടും പ്രവര്‍ത്തിക്കാത്തവര്‍ക്കു നേതൃത്വത്തില്‍ നിന്നു ബൂത്തുകളിലേക്കു മടങ്ങാം. പാര്‍ട്ടി നേതൃത്വത്തെ മറികടന്നു പോകുന്നതിനെതിരെയുള്ള താക്കീതുകൂടിയായിരുന്നു അദ്ദേഹത്തിന്റെ നിലപാട്.

പ്രാദേശിക തലത്തില്‍ യോഗങ്ങള്‍ വിളിക്കുകയും ജനങ്ങളെ കാര്യങ്ങള്‍ ബോധ്യപ്പെടുത്തുകയും വേണം. ശബരിമല കാര്യത്തില്‍ രാഹുല്‍ ഗാന്ധി മിണ്ടാതിരുന്നപ്പോള്‍ ബിജെപി ശക്തമായ നിലപാടെടുത്തു ഭക്തര്‍ക്കൊപ്പം നിന്നുവെന്ന് അദ്ദേഹം ഓര്‍മിപ്പിച്ചു. അത്തരം രാഷ്ട്രീയം ജനങ്ങളിലെത്തിക്കണം. മോദി സര്‍ക്കാര്‍ സാധാരണക്കാര്‍ക്കു വേണ്ടി ചെയ്ത കാര്യങ്ങള്‍ ജനങ്ങളില്‍ വേണ്ടതുപോലെ എത്തിയില്ലെന്ന സൂചനയും നല്‍കി.

സംസ്ഥാന ജനറല്‍ സെക്രട്ടറിമാരുടെ യോഗത്തിലായിരുന്നു അദ്ദേഹം കൂടുതല്‍ കാര്യങ്ങള്‍ വിശദീകരിച്ചത്. തുടര്‍ന്നു തിരഞ്ഞെടുപ്പു മാനേജ്‌മെന്റ് കമ്മിറ്റി രൂപീകരിച്ചു. കെ. സുരേന്ദ്രനും ജോര്‍ജ് കുര്യനുമാണു കണ്‍വീനര്‍മാര്‍.

കേരളത്തില്‍ സമൂഹ മാധ്യമ ഉപയോഗം ശക്തമാക്കാനും സാധാരണക്കാരുടെ ഭാഷയില്‍ സംസാരിക്കാനും കേന്ദ്ര പദ്ധതികള്‍ ജനങ്ങളിലെത്തിക്കാനും ഐടി സെല്‍ യോഗത്തില്‍ കേന്ദ്ര മന്ത്രി നിര്‍ദേശിച്ചു. പ്രാദേശിക ചുമതലയുള്ള നേതാക്കളുടെ യോഗത്തില്‍ കടുത്ത ഭാഷയിലാണ് അദ്ദേഹം സംസാരിച്ചത്.

സംസ്ഥാന തെരഞ്ഞെടുപ്പിനൊപ്പം ബിജെപിയെ ലോക ശ്രദ്ധയിലാക്കാനുള്ള ശ്രമത്തിലാണ് ബിജെപി. രാജ്യമെങ്ങും മാത്രമല്ല, അയല്‍രാജ്യങ്ങളില്‍ക്കൂടി പാര്‍ട്ടിയെ വ്യാപിപ്പിക്കുകയാണ് ബിജെപിയുടെ ലക്ഷ്യമെന്ന് ത്രിപുര മുഖ്യമന്ത്രി ബിപ്ലബ് ദേബ് കുമാര്‍ പറഞ്ഞു. നേപ്പാളിലും ശ്രീലങ്കയിലും ബിജെപി സര്‍ക്കാര്‍ രൂപീകരിക്കുകയാണ് ആഭ്യന്തരമന്ത്രി അമിത് ഷായുടെ പദ്ധതിയെന്നും അദ്ദേഹം കൂട്ടിച്ചേര്‍ത്തു.

2018ല്‍ ത്രിപുര നിയമസഭാ തിരഞ്ഞെടുപ്പിനായി തയാറെടുക്കവെ അമിത് ഷായുമായി നടത്തിയ സംഭാഷണത്തിലെ വിവരങ്ങളാണ് ബിപ്ലബ് പുറത്തുവിട്ടത്. ഇന്ത്യയിലെ എല്ലാ സംസ്ഥാനങ്ങളിലേക്കും വ്യാപിപ്പിച്ചശേഷം വിദേശത്തേക്കും പാര്‍ട്ടിയെ എത്തിക്കണമെന്ന കാര്യത്തെക്കുറിച്ച് അമിത് ഷാ സംസാരിച്ചിരുന്നുവെന്നാണ് ബിപ്ലബ് പറയുന്നത്.

സംസ്ഥാന ഗസ്റ്റ് ഹൗസില്‍ പാര്‍ട്ടിയുടെ നോര്‍ത്ത് ഈസ്റ്റ് സോണല്‍ സെക്രട്ടറി അജയ് ജാംവലിനൊപ്പം ഇരിക്കവെയാണ് അമിത് ഷാ ഇക്കാര്യം പറഞ്ഞത്. ബിജെപി നിരവധി സംസ്ഥാനങ്ങളില്‍ സര്‍ക്കാര്‍ രൂപീകരിച്ചുവെന്ന് ജാംവല്‍ പറഞ്ഞു. അതിനു മറുപടിയായാണ് ഇനി ശ്രീലങ്കയും നേപ്പാളും ഉണ്ടെന്ന് അമിത് ഷാ വ്യക്തമാക്കിയത്. നമുക്ക് ആ രാജ്യങ്ങളിലേക്കും കൂടി പാര്‍ട്ടിയെ വളര്‍ത്തണമെന്നും അമിത് ഷാ കൂട്ടിച്ചേര്‍ത്തുവെന്നും ബിപ്ലബ് വ്യക്തമാക്കി. ഇങ്ങനെ ലോകം പിടിക്കാന്‍ പോകുന്ന ബിജെപി കേരളത്തില്‍ എന്ത് നേടുമെന്ന ചോദ്യമാണ് ഇപ്പോഴും ശക്തമായി നിലകൊള്ളുന്നത്.