ഹൈക്കമാന്‍ഡിനെ പോലും നോക്കുകുത്തിയാക്കി ഇത്തവണ പ്രതിപക്ഷ നേതാവായ രമേശ് ചെന്നിത്തല ഓരോ സ്ഥലത്തും സ്ഥാനാര്‍ത്ഥികളെ നിശ്ചയിച്ച് ഐശ്വര്യ കേരള യാത്ര മുന്നോട്ട് പോകുകയാണ്.പാലായില്‍ നല്ല നടനായ മാണി സി കാപ്പന് സീറ്റ് കൊടുത്തത് പോട്ടെ, കണ്ട സകല സിനിമാക്കാരേയും എന്തിന് കോമഡിക്കാരേയും വിളിച്ച് വരുത്തി സീറ്റ് നല്‍കുകയാണ്.

ധര്‍മ്മജന്‍ ബോള്‍ഗാട്ടിക്കാണ് ചെന്നിത്തല ആദ്യം സീറ്റ് ഉറപ്പ് നല്‍കിയത്. ഇതിന് പിന്നാലെയാണ് യുദ്ധ ചിത്രങ്ങളുടെ സംവിധായകനായ പട്ടാളക്കാരന്‍ മേജര്‍ രവിയും എത്തുന്നത്. അതിന് പിന്നാലെ രമേശ് പിഷാരടിയും ഇടവേള ബാബുവും രംഗത്തെത്തി. സീറ്റ് വേണ്ടേ വേണ്ടെന്ന് ഇരുവരും പറയുന്നെങ്കിലും നല്ലവനായ ചെന്നിത്തല എല്ലാവര്‍ക്കും സീറ്റ് നല്‍കുമെന്ന കട്ട വാശിയാണ്. ഇതോടെ കോമഡി പ്രതീക്ഷിച്ച ജനങ്ങള്‍ക്ക് കോണ്‍ഗ്രസ് നേതാക്കള്‍ നല്‍കുന്നത് നല്ലൊരുയുദ്ധമായിരിക്കും. സീറ്റ് മോഹികളുടെ ഒന്നൊന്നര വരവായിരിക്കും ഇനി കാണുക.

നടനും സംവിധായകനുമായ രമേഷ് പിഷാരടിക്കൊപ്പം നടനും നിര്‍മാതാവുമായ ഇടവേള ബാബുവും ഹരിപ്പാട്ട് ഐശ്വര്യ കേരളയാത്ര വേദിയിലാണ് എത്തിയത്. കെപിസിസി പ്രസിഡന്റ് മുല്ലപ്പള്ളി രാമചന്ദ്രനും ഉമ്മന്‍ചാണ്ടിയും ഇരുവരെയും സ്വീകരിച്ചു. കോണ്‍ഗ്രസ് നേതാക്കളുടെ ഇടപെടലിനെ തുടര്‍ന്ന് ഇരുവരും കോണ്‍ഗ്രസ് വേദിയിലേയ്ക്ക് എത്തുകയായിരുന്നു. രമേഷ് പിഷാരടി നേരത്തെ ഉമ്മന്‍ചാണ്ടിയുമായും രമേശ് ചെന്നിത്തലയുമായും ചര്‍ച്ച നടത്തിയിരുന്നു.

ഐശ്വര്യ കേരള യാത്ര കൊച്ചിയിലെത്തിയപ്പോള്‍ മേജര്‍ രവി ചെന്നിത്തലയ്‌ക്കൊപ്പം തൃപ്പൂണിത്തുറയിലെ വേദി പങ്കിട്ടത് വാര്‍ത്തായിരുന്നു. പിന്നാലെയാണ് സിനിമാ രംഗത്തുനിന്ന് കൂടുതല്‍ പേര്‍ അണിനിരക്കുന്നത്. നടന്‍ ധര്‍മജന്‍ ബോള്‍ഗാട്ടി കോണ്‍ഗ്രസിനായി മല്‍സരിക്കുമെന്ന വാര്‍ത്തകളുണ്ടായിരുന്നു. പാര്‍ട്ടി ആവശ്യപ്പെട്ടാല്‍ മല്‍സരിക്കാന്‍ തയാറാണെന്ന നിലപാടിലാണ് ധര്‍മജന്‍.

തദ്ദേശ സ്വയംഭരണ സ്ഥാപനങ്ങളിലേയ്ക്കുള്ള തിരഞ്ഞെടുപ്പിനിടെ മൂവാറ്റുപുഴ നഗരസഭയിലേയ്ക്കു മല്‍സരിച്ച കോണ്‍ഗ്രസ് സ്ഥാനാര്‍ഥി ജോയ്‌സ് മേരിക്ക് ആശംസയുമായി രമേഷ് പിഷാരടി എത്തിയിരുന്നു.

ധര്‍മ്മജന് വേണ്ടി പ്രവര്‍ത്തിക്കേണ്ടതുകൊണ്ട് മത്സരിക്കുന്നില്ല എന്നാണ് രമേശ് പിഷാരടി പറയുന്നത്. കാലഘട്ടത്തിന്റെ ആവശ്യമാണ് കോണ്‍ഗ്രസിന്റെ വിജയം. ആവശ്യമല്ല അത്യാവശമാണ്. കോമഡിക്കാരെല്ലാം യുഡിഎഫിലേക്കാണല്ലോ എന്നാ ചിലരുടെ ചോദ്യം. ചിരിപ്പിക്കുന്നവരല്ലേ വന്നത് ഭീഷണിപ്പെടുത്തുന്നവരൊന്നുമല്ലല്ലോയെന്നും രമേശ് പിഷാരടി പറഞ്ഞത്. ഇവിടുത്തെ ജനാധിപത്യം പുലരുന്നതിന് ഭയപ്പാടില്ലാതെ സമീപിക്കാനും യുഡിഎഫ് വരണമെന്നും പിഷാരടി വ്യക്തമാക്കി.

പിഷാരടിയോട് ഉമ്മന്‍ ചാണ്ടിയുടെ ശബ്ദം അനുകരിക്കാന്‍ ആവശ്യപ്പെട്ട കോണ്‍ഗ്രസ് പ്രവര്‍ത്തകര്‍ക്ക് പിഷാരടി നല്‍കിയ മറുപടിയാണ് ഇപ്പോള്‍ ശ്രദ്ധ നേടുകയാണ്. ഇനി പഴയതുപോലെയല്ല, ഞങ്ങളുടേയെല്ലാം നേതാവാണ് അദ്ദേഹം എന്നാണ് ഉമ്മന്‍ ചാണ്ടിയെക്കുറിച്ചു രമേശ് പിഷാരടി ചിരി പടര്‍ത്തിക്കൊണ്ട് പറഞ്ഞത്.

രാഷ്ട്രീയ പ്രവേശം തുറന്നുപറഞ്ഞു കൊണ്ട് രമേശ് പിഷാരടിയുടെ വക പ്രസംഗവും വേദിയില്‍ ഉണ്ടായിരുന്നു. ആ സമയത്ത് പിഷാരടിയോട് കോണ്‍ഗ്രസ് പ്രവര്‍ത്തകര്‍ ഉമ്മന്‍ ചാണ്ടിയുടെ ശബ്ദം അനുകരിക്കാന്‍ ആവശ്യപ്പെടുകയായിരുന്നു. മുന്‍പും ഒരുപാട് വേദികളില്‍ രമേശ് പിഷാരടി ഉമ്മന്‍ ചാണ്ടിയുടേതടക്കം മറ്റ് രാഷ്ട്രീയ നേതാക്കളുടേയും ശബ്ദം അനുകരിച്ചിട്ടുണ്ട്.

എന്തായാലും സിനിമാക്കാരെ കൊണ്ട് കോണ്‍ഗ്രസ് നിറയ്ക്കുമ്പോള്‍ സീറ്റിനായി മേജര്‍ രവിയുടെ സിനിമ പോലെ ഒരു യുദ്ധം ഉറപ്പാണ്. അതേസമയം ഇവരെ വെല്ലാന്‍ സിപിഎം ഏത് സിനിമാക്കാരെ അണിനിരത്തുമെന്ന് കണ്ടറിയാം.