നിയമസഭാ തെരഞ്ഞെടുപ്പ് ഏപ്രില് ആറിന്... കോവിഡ് സാഹചര്യത്തില് പോളിങ് സ്റ്റേഷനുകളുടെ എണ്ണത്തിലും വര്ധന വരുത്തിയിട്ടുണ്ട്
കേരളത്തില് ഏപ്രില് ആറിന് നിയമസഭാ നടത്തുമെന്ന് കേന്ദ്ര തെരഞ്ഞെടുപ്പ് കമ്മീഷന് അറിയിച്ചു. മെയ് രണ്ടിനാണ് വൊട്ടെണ്ണല്. രാഷ്ട്രീയ പാര്ട്ടികള് പ്രതീക്ഷിച്ചതില് നിന്നും വ്യത്യസ്തമായി ഒറ്റഘട്ടമായാണ് കേരളത്തില് തെരഞ്ഞെടുപ്പ് നടത്തുന്നത്. മാര്ച്ച് മൂന്നിന് തെരഞ്ഞെടുപ്പ് വിജ്ഞാപനം പുറപ്പെടുവിക്കും. കേരളത്തിനൊപ്പം കേന്ദ്രഭരണ പ്രദേശമായ പുതുച്ചേരി ഉള്പ്പെട അഞ്ചു സംസ്ഥാനങ്ങളിലേക്കുള്ള തെരഞ്ഞെടുപ്പ് തീയതിയും തെരഞ്ഞെടുപ്പ് കമ്മിഷന് പ്രഖ്യാപിച്ചു.
തെരഞ്ഞെടുപ്പ് തീയതി പ്രഖ്യാപിച്ച സാഹചര്യത്തില് പെരുമാറ്റച്ചട്ടം നിലവില് വന്നതായി തെരഞ്ഞെടുപ്പ് കമ്മീഷന് വ്യക്തമാക്കി. കോവിഡ് സാഹചര്യത്തില് പോളിങ് സ്റ്റേഷനുകളുടെ എണ്ണത്തിലും വര്ധന വരുത്തിയിട്ടുണ്ട്. 2016ല് കേരളത്തില് പോളിങ് സ്റ്റേഷനുകളുടെ എണ്ണം 21,498 ആയിരുന്നു. ഇത് ഇക്കുറി 40,771 ആയി വര്ധിപ്പിക്കും. പോളിങ് സ്റ്റേഷനുകളുടെ എണ്ണത്തില് 89.65 ശതമാനമാണ് വര്ധന.
ഏപ്രില് അവസാനത്തോടെ സംസ്ഥാനത്ത് തെരഞ്ഞെടുപ്പ് നടത്തുമെന്ന പ്രതീക്ഷയിലായിരുന്നു രാഷ്ട്രീയ പാര്ട്ടി നേതാക്കള്. അതുകൊണ്ട് തന്നെ അപ്രതീക്ഷിതമായി ഇത്ര നേരത്തെയെത്തിയ തെരഞ്ഞെടുപ്പില് സ്ഥാനാര്ത്ഥികളെ നിശ്ചയിക്കുന്നത് ഉള്പ്പെടെയുള്ള കാര്യങ്ങളിലേക്ക് ഇന്നു മുതല് തന്നെ രാഷ്ട്രീയ പാര്ട്ടികള്ക്ക് അടിയന്തിരമായി കടക്കേണ്ടിവരും.
മാതൃകാ പെരുമാറ്റച്ചട്ടം നിലവില് വന്നതോടെ സര്ക്കാരിന് പുതിയ പ്രഖ്യാപനങ്ങളും ഉദ്ഘാടനങ്ങളുമൊന്നും നടത്താനാവില്ല. മന്ത്രിസഭ ചേര്ന്ന് നിര്ണായക തീരുമാനങ്ങളെടുക്കാനോ ഫയലുകളില് ഒപ്പിടാനോ മന്ത്രിമാര്ക്കും അനുവാദമുണ്ടാക്കില്ല. പാലാരിവട്ടം പാലം ഒഴികെ മുന്നിശ്ചയിച്ച പ്രകാരം പ്രധാന പദ്ധതികളുടേയെല്ലാം ഉദ്ഘാടനം ഇതിനോടകം സംസ്ഥാന സര്ക്കാര് പൂര്ത്തിയാക്കിയിട്ടുണ്ട്. ഇന്ന് നിര്മ്മാണം പൂര്ത്തിയാവുന്ന പാലാരിവട്ടം പാലം മിനുക്കുപണികള് പൂര്ത്തിയാക്കി അടുത്ത ആഴ്ച ഉദ്ഘാടനം ചെയ്യാനിരിക്കുന്നതിനിടെയാണ് തെരഞ്ഞെടുപ്പ് പ്രഖ്യാപനം.
https://www.facebook.com/Malayalivartha