സ്ഥാനാർഥി നിർണ്ണയം പാളിച്ചയാകുമോ എന്നാണ് ഇപ്പോൾ സി പി എം പ്രാദേശിക നേതൃത്വത്തിനുള്ള ആശങ്ക .അത് ഏറെ കുറെ പ്രകടമാകുന്ന തരത്തിലേക്കാണ് കാര്യങ്ങൾ നീങ്ങുന്നത് .സി പി എം സെക്രട്ടറിയേറ്റിന്റെ വെട്ടിനിരത്തൽ തുടർന്നാൽ ഏതൊക്ക രീതിയിൽ പാർട്ടിക്ക് നഷ്ടമുണ്ടാകും എന്നത് പ്രവചനാതീതമാണ് .

അതിനാൽ പാർട്ടി ഒന്നടങ്കം ഇപ്പോൾ വെട്ടിലാകുന്ന സാഹചര്യമാണ് എറണാകുളത്തേയും ആലപ്പുഴയിലേയും വിഭാഗീയത വരച്ചു വയ്ക്കുന്നത്... പ്രാദേശിക വികാരം മറികടന്ന് ഒരു സ്‌ഥാനാർത്ഥിയെയും ജയിപ്പിക്കുക എന്നത് സാധ്യമായ കാര്യമായി കണക്കാക്കാൻ കഴിയുന്നതല്ല .

മന്ത്രിമാരിൽ പലരും ഇക്കുറി മത്സരരംഗത്തുണ്ടാകില്ല എന്നത് ഏറ്റവും ശ്രദ്ധേയമായ കാര്യാമാണ് .തദ്ദേശ തിരഞ്ഞെടുപ്പിൽ കാര്യാമായ മുന്നേറ്റം നടത്താൻ ഇടതുമുന്നണിക്ക് കഴിഞ്ഞു .എന്നാൽ ഇത് അമിതാവേശത്തിനുള്ള കാരണമായി കരുതരുത് എന്നാണ് പ്രാദേശിക നേതൃത്വം വിലയിരുത്തുന്നത് .നിയമസഭാ തിരഞ്ഞെടുപ്പിൽ  സി പി എം ജില്ലാ കമ്മറ്റിയെ വിശ്വാസത്തിലെടുക്കാതെ സംസ്ഥാന സെക്രട്ടേറിയറ്റ് നടത്തുന്ന ഏകാധിപത്യ തീരുമാങ്ങൾ വിലപ്പോകില്ല എന്നാണ് പ്രാദേശിക നേതൃത്വം പ്രതിഷേധത്തിലൂടെ അറിയിക്കുന്നത് .

പോസ്റ്ററുകൾ സംസ്‌ഥാന നേതൃത്വത്തിനെതിരെ നിരവധിയിടങ്ങളിൽ ഇതിനോടകം പ്രത്യക്ഷപെട്ടു കഴിഞ്ഞു .അതിനാൽ തന്നെ ഏതു നിലയ്ക്കാണ് ഇത് പിണറായി വിജയൻറെ തുടർഭരണ സാധ്യതകളെ ബാധിക്കുക എന്നത് കാണേണ്ടിയിരിക്കുന്നു .

ഇതിനിടയിൽ ഗ്രൂപ്പ് പോര് പരസ്യമാക്കി കളമശ്ശേരി സിപിഎമ്മിലും പോസ്റ്റർ യുദ്ധം ഉണ്ടായിരിക്കുകയാണ് . കളമശ്ശേരിയിൽ പി. രാജീവിനെ സ്ഥാനാർത്ഥിയാക്കുന്നതിനെതിരെയാണ് കെ. ചന്ദ്രൻപിള്ള വിഭാഗം മണ്ഡലത്തിൽ പോസ്റ്ററുകൾ പതിച്ചത്. കളമശ്ശേരിയിൽ പി. രാജീവ് വേണ്ട, ചന്ദ്രൻപിള്ള മതിയെന്നാണ് പോസ്റ്ററുകളിലുള്ളത്.

ഇതോടെ ജില്ല നേതൃത്വവും ആശയക്കുഴപ്പത്തിലാണ് .സിഐടിയു നേതാവായ ചന്ദ്രൻപിള്ളയ്ക്ക് അനുകൂലമായി കളമശ്ശേരി മണ്ഡലത്തിൽ ഇന്നലെ രാത്രി മുതലാണ് പോസ്റ്ററുകൾ പ്രത്യക്ഷപ്പെട്ടത്. വ്യവസായ മേഖലയായ ഏലൂരിലെ പാർട്ടി ഓഫീസിന് എതിർവശത്തും മുനിസിപ്പാലിറ്റി ഓഫീസിന് മുമ്പിലും കളമശ്ശേരി പാർട്ടി ഓഫീസിന് മുൻ ഭാഗത്തുമാണ് കൂടുതൽ പോസ്റ്ററുകളും പതിച്ചിരുന്നത്.

പ്രബുദ്ധതയുള്ള കമ്യൂണിസ്റ്റുകാർ പ്രതികരിക്കും, ചന്ദ്രൻപിള്ള കളമശ്ശേരിയുടെ സ്വപ്നം, വെട്ടി നിരത്തൽ എളുപ്പമാണ് വോട്ട് പിടിക്കാനാണ് പാട്, പി രാജീവിനെ വേണ്ട എന്നിങ്ങനെയാണ് ചില പോസ്റ്ററുകളിലുള്ളത്.ഇത്തരം പ്രാദേശിക ഭിന്നതകൾ ഒളിഞ്ഞു തെളിഞ്ഞും ഉണ്ടാകുന്നത് പാർട്ടിക്ക് തലവേദനയായി മാറിയിരിക്കുകയാണ് .