സ്വപ്നയും സ്വര്‍ണവും കാരണം തദ്ദേശ തെരഞ്ഞെടുപ്പില്‍ എല്‍ഡിഎഫ് തകരുമെന്നാണ് പലരും പ്രവചിച്ചത്. അതോടെ പിണറായി വിജയന്‍ അമേരിക്കയില്‍ ചികിത്സയ്ക്ക് പോകുമെന്നും വേറെയാരെങ്കിലും മുഖ്യമന്ത്രി പദം ഏറ്റെടുക്കുമെന്നും വാര്‍ത്ത വന്നു.

എന്നാല്‍ ഫലം വന്നതോടെ സ്വപ്നയും സ്വര്‍ണവുമെന്നുമേറ്റില്ലെന്ന് ബോധ്യമായി. ജനങ്ങളുടെ പട്ടിണി മാറ്റാനായി കൊറോണ കാലത്ത് കിട്ടിയ ഭക്ഷ്യ കിറ്റ് മാത്രമാണ് ഗുണം ചെയ്തത്. അതേ അവസ്ഥയാണ് വീണ്ടും ഉണ്ടായിരിക്കുന്നത്.

കസ്റ്റംസ് കോടതിയില്‍ സമര്‍പ്പിച്ച സത്യവാങ്മൂലത്തിനെ തന്നെ വെട്ടിലാക്കുന്ന കാര്യങ്ങളാണ് പുറത്തായത്. മുഖ്യമന്ത്രി പിണറായി വിജയനെതിരെ മൊഴി നല്‍കാന്‍ സ്വപ്ന സുരേഷിന് മേല്‍ സമ്മര്‍ദ്ദമുണ്ടായെന്ന് പൊലീസ് ഉദ്യോഗസ്ഥയുടെ മൊഴിയാണ് കാര്യങ്ങള്‍ മാറ്റിമറിച്ചത്.

മുഖ്യമന്ത്രിയുടെ പേര് പറയാന്‍ ഇഡി ഉദ്യോഗസ്ഥര്‍ സ്വപ്നയെ നിര്‍ബന്ധിച്ചുവെന്നാണ് മൊഴി. സ്വപ്നയുടെ സുരക്ഷാ ഡ്യൂട്ടിയിലുണ്ടായിരുന്ന സിജി വിജയനാണ് മൊഴി നല്‍കിയത്. സ്വപ്നയുടെ ശബ്ദരേഖ ചോര്‍ന്നത് അന്വേഷിച്ച സംഘത്തിനാണ് സിജി മൊഴി നല്‍കിയത്.

സ്വപ്‌നയുടെ എസ്‌കോര്‍ട്ട് ഡ്യൂട്ടിയില്‍ ഉണ്ടായിരുന്ന പൊലീസ് ഉദ്യോഗസ്ഥയുടെ മൊഴി ദൂരവ്യാപകമായ ഫലമുണ്ടാക്കും. സ്വപ്‌നയുടെ ശബ്ദരേഖ ചോര്‍ന്നതുമായി ബന്ധപ്പെട്ട അന്വേഷണത്തിലാണ് എസ്‌കോര്‍ട്ട് ഡ്യൂട്ടിയിലുണ്ടായിരുന്ന ഉദ്യോഗസ്ഥയുടെ മൊഴിയെടുത്തത്.

നിര്‍ബന്ധിച്ച് മൊഴി പറയിപ്പിക്കുന്നത് ശ്രദ്ധയില്‍പെട്ടു. ഏറ്റവും നിര്‍ബന്ധപൂര്‍വം മൊഴി പറയിപ്പിച്ചത് രാധാകൃഷ്ണന്‍ എന്ന ഉദ്യോഗസ്ഥനാണെന്നും പൊലീസുകാരി മൊഴി നല്‍കിയിട്ടുണ്ട്.

അതേസമയം, യുഎഇ കോണ്‍സുലേറ്റ് വഴി നടന്ന നിയമവിരുദ്ധമായ ഇടപാടുകളില്‍ മുഖ്യമന്ത്രിക്കും സ്പീക്കര്‍ക്കും മന്ത്രിസഭയിലെ മൂന്ന് മന്ത്രിമാര്‍ക്കും മുഖ്യമന്ത്രിയുടെ പേഴ്‌സണല്‍ സ്റ്റാഫിനും പങ്കുണ്ടെന്ന് സ്വപ്‌ന സുരേഷ് വെളിപ്പെടുത്തിയതായി കസ്റ്റംസ് ഹൈക്കോടതിയില്‍ അറിയിച്ചിരുന്നു.

സ്വര്‍ണക്കടത്ത്/ഡോളര്‍ കടത്ത് കേസിലെ മുഖ്യ പ്രതി സ്വപ്‌ന സുരേഷ് എറണാകുളത്തെ പ്രത്യേക സാമ്പത്തിക കോടതിയില്‍ നല്‍കിയ രഹസ്യമൊഴിയിലെ വിവരങ്ങളാണ് കസ്റ്റംസ് കമ്മീഷണര്‍ സുമിത് കുമാര്‍ സത്യവാങ്മൂലത്തില്‍ അറിയിച്ചത്.

എന്നാല്‍ തെരഞ്ഞെടുപ്പ് അടുത്തിരിക്കെ സ്വപ്‌നയുടെ മൊഴിയെന്ന പേരില്‍ കസ്റ്റംസ് ഹൈക്കോടതിയില്‍ നല്‍കിയ സത്യവാങ്മൂലം രാഷ്ട്രീയ പ്രേരിതമെന്നാണ് സര്‍ക്കാരും സിപിഎമ്മും ആരോപിച്ചത്. കസ്റ്റംസിനെതിരെ രൂക്ഷ ഭാഷയിലാണ് മുഖ്യമന്ത്രി പിണറായി വിജയന്‍ വിമര്‍ശനമുന്നയിച്ചത്.

സ്വര്‍ണക്കടത്തിനെ കുറിച്ച് ഇതുവരെ വ്യക്തമായ അന്വേഷണം നടന്നിട്ടില്ല. ആരാണ് സ്വര്‍ണം കടത്തിയത്, ആര്‍ക്ക് വേണ്ടിയാണ് കടത്തിയത്, ആരൊക്കെയാണ് കടത്തിയവര്‍ തുടങ്ങിയ കാര്യങ്ങളെ കുറിച്ചൊന്നും ഇതുവരെ വ്യക്തമായ അന്വേഷണം നടക്കുകയോ കുറ്റക്കാരെ കണ്ടെത്തുകയോ അന്വേഷണ ഏജന്‍സികള്‍ ചെയ്തിട്ടില്ലെന്നും മുഖ്യമന്ത്രി വിമര്‍ശനമുന്നയിച്ചിരുന്നു.

തെരഞ്ഞെടുപ്പ് മുന്നില്‍ കണ്ടാണ് കേന്ദ്ര ഏജന്‍സികളുടെ വിടുവേല. ഇപ്പോള്‍ കസ്റ്റംസാണ് തിരഞ്ഞെടുപ്പ് പ്രചാരണ പദ്ധതികള്‍ നയിക്കുന്നത്. കൃത്യമായ ചില കളികള്‍ നടക്കുന്നുണ്ട്.

ഇതുകൊണ്ടൊന്നും ജനക്ഷേമവുമായി മുന്നോട്ടുപോകുന്ന സര്‍ക്കാരിനെ ജനമനസുകളില്‍ ഇകഴ്ത്താന്‍ സാധിക്കില്ല. സര്‍ക്കാര്‍ ജനങ്ങള്‍ക്കൊപ്പമാണ്. ആ വിശ്വാസം ജനങ്ങള്‍ക്കുമുണ്ട്. വിവാദങ്ങള്‍ അതിന്റെ വഴിക്ക് പോകും. ജനങ്ങള്‍ ഞങ്ങള്‍ക്കൊപ്പമുണ്ടെന്നും പിണറായി പറഞ്ഞു.

അതേസമയം, സ്വര്‍ണക്കടത്ത് കേസില്‍ മൊഴി നല്‍കുന്നതിനായി അഭിഭാഷക ദിവ്യ എസ് കസ്റ്റംസിന് മുന്നില്‍ ഹാജരായി മൊഴി നല്‍കി. തിരുവനന്തപുരം കരമന സ്വദശിയായ ദിവ്യ കൈകുഞ്ഞുമായാണ് മൊഴിനല്‍കാന്‍ എത്തിയത്.

ദിവ്യയോട് ഫോണുകള്‍, ബാങ്ക് അക്കൗണ്ട് വിശദാംശങ്ങള്‍, പാസ്‌പോര്‍ട്ട് അടക്കം ഹാജരാക്കാനാണ് കസ്റ്റംസ് ആവശ്യപ്പെട്ടത്. കള്ളക്കടത്ത് സംഘവുമായി ബന്ധമില്ലെന്നും അടുത്തിടെ ലഭിച്ച സിം കാര്‍ഡുമായി ബന്ധപ്പെട്ട വിവരങ്ങള്‍ അറിയാനാണ് കസ്റ്റംസ് വിളിപ്പിച്ചതെന്നും ദിവ്യ മാധ്യമങ്ങളോട് പറഞ്ഞു.