തിരഞ്ഞെടുപ്പ് സര്‍വേ ഫലങ്ങളുടെ കാലമാണിപ്പോള്‍. ആര് വാഴും ആര് വീഴും. ഏത് നേതാവിനാണ് ജനപ്രീതി അങ്ങനെ ഒരുപിടി കാര്യങ്ങളാണ് സര്‍വേകളില്‍ മാറ്റുരയ്ക്കപ്പെടുന്നത്. എപ്പോഴും തമിഴ് മണ്ണില്‍ വമ്പന്‍ ട്വിസ്റ്റ് ആണ്. തമിഴ് സിനിമ പോലെ തന്നെ. പിണറായിയുടെ ഉറ്റചങ്ക് കമല്‍ഹാസനോടും മോദിയുടെ തോഴനായ ഒരിടയ്ക്ക് ബി.ജെ.പി പാളയത്തില്‍ വരെ എത്തുമെന്ന് കണക്ക് കൂ്ട്ടിയ സാക്ഷാല്‍ രജനികാന്തുമൊക്കെ വാര്‍ത്തകളില്‍ വീണ്ടും നിറയുകയാണ്.

ഇരുവരും കൈകൊടുക്കുമോ എന്നതാണ് സസ്‌പെന്‍സ്. ഏതായാലും ഇതിനിടെ വരുന്ന നിയമസഭാ തിരഞ്ഞെടുപ്പില്‍ 158 സീറ്റുകള്‍ കോണ്‍ഗ്രസ്-ഡിഎംകെ സഖ്യം സ്വന്തമാക്കി സര്‍ക്കാരുണ്ടാക്കും എന്നാണ് ടൈംസ് നൗ-സീ വോട്ടര്‍ സര്‍വ്വേയിലെ പ്രവചനം. ഡിഎംകെ, കോണ്‍ഗ്രസ്, സിപിഎം, സിപിഐ, വിസികെ, എംഡിഎംകെ, മുസ്ലീം ലീഗ്, എംഎംകെ എന്നീ പ്രധാന പാര്‍ട്ടികളും ഏതാനും ചെറുപാര്‍ട്ടികളും ചേരുന്നതാണ് തമിഴ്നാട്ടിലെ യുപിഎ സഖ്യം. 2016ലേതിനേക്കാള്‍ 60 സീറ്റുകള്‍ ഇക്കുറി യുപിഎ സഖ്യം നേടും എന്നാണ് സര്‍വ്വേ ഫലം. അതേസമയം എന്‍ഡിഎ 65 സീറ്റിലൊതുങ്ങും. 2016ല്‍ എന്‍ഡിഎ സീറ്റ് നില 136 ആയിരുന്നു.

തമിഴ്നാട്ടില്‍ ഏറ്റവും കൂടുതല്‍ ആളുകള്‍ മുഖ്യമന്ത്രിയായി കാണാന്‍ ആഗ്രഹിക്കുന്നത് എംകെ സ്റ്റാലിനെ ആണ്. 38. 4 ശതമാനം ആളുകള്‍ ആണ് സ്റ്റാലിന്‍ മുഖ്യമന്ത്രിയാകണം എന്ന് അഭിപ്രായപ്പെട്ടിരിക്കുന്നത്. രണ്ടാം സ്ഥാനത്ത് ഉളളത് നിലവിലെ മുഖ്യമന്ത്രിയായ എടപ്പാടി പളനിസ്വാമിയാണ്. 31 ശതമാനം പേരാണ് പളനിസ്വാമിക്കൊപ്പമുളളത്. മുഖ്യമന്ത്രി സ്ഥാനത്തേക്കുളള പോരാട്ടത്തില്‍ മൂന്നാമത് ഉളളത് നടനും മക്കള്‍ നീതി മയ്യം നേതാവുമായ കമല്‍ ഹാസനാണ്. 7.4 ശതമാനം പേരാണ് കമലിനൊപ്പമുളളത്.

തൊട്ട് പിന്നാലെ സൂപ്പര്‍ താരം രജനീകാന്തുമുണ്ട്. എന്നാല്‍ ആരോഗ്യാവസ്ഥ പരിഗണിച്ച് രജനീകാന്ത് രാഷ്ട്രീയ പ്രവേശന നീക്കം ഉപേക്ഷിച്ചിരിക്കുകയാണ്. ജയിലില്‍ നിന്നിറങ്ങി രാഷ്ട്രീയ ജീവിതം അവസാനിപ്പിച്ച വികെ ശശികല 3.39 ശതമാനം വോട്ട് നേടി പിന്നാലെയുണ്ട്

കോണ്‍ഗ്രസ്-ഡിഎംകെ സഖ്യത്തിന് 43.2 ശതമാനം വോട്ട് ലഭിക്കുമെന്നും സര്‍വ്വേ പ്രവചിക്കുന്നു. 2016ല്‍ 39.4 ശതമാനം വോട്ടായിരുന്നു ഈ സഖ്യത്തിന് ലഭിച്ചിരുന്നത്. ഇത്തവണ 3.8 ശതമാനം വോട്ട് അധികം ലഭിക്കും. എന്‍ഡിഎയുടെ വോട്ട് ശതമാനം കുത്തനെ ഇടിയും. 32.1 ശതമാനം വോട്ടാണ് എന്‍ഡിഎയ്ക്ക് ലഭിക്കുക. 2016ല്‍ ഇത് 43.7 ശതമാനം ആയിരുന്നു. 11.6 ശതമാനം ആണ് എന്‍ഡിഎ വോട്ട് ശതമാനം ഇടിയുക.

പ്രധാനമന്ത്രി നരേന്ദ്ര മോദിയുടെ പ്രവര്‍ത്തനങ്ങളില്‍ തൃപ്തരാണോ എന്ന ചോദ്യത്തില്‍ 51.09 ശതമാനം ആളുകള്‍ ആണ് ഒട്ടും തൃപ്തരല്ലെന്ന് അഭിപ്രായപ്പെട്ടിരിക്കുന്നത്. 24.35 ശതമാനം ആളുകള്‍ മോദിയില്‍ ഏറെക്കുറെ തൃപ്തരാണ് എന്ന് അഭിപ്രായപ്പെട്ടിരിക്കുന്നത്. 17. 29 ശതമാനം പേരാണ് വളരെ തൃപ്തരാണെന്ന് അഭിപ്രായപ്പെട്ടിരിക്കുന്നത്. പറയാനാവില്ലെന്ന് 7.27 ശതമാനം പേരും അഭിപ്രായപ്പെട്ടിരിക്കുന്നു.

അതേസമയം പുതുച്ചേരിയില്‍ നേട്ടം ബി.ജെ.പിക്ക് . ഇത്തവണത്തെ പുതുച്ചേരി നിയമസഭ തിരഞ്ഞെടുപ്പില്‍ കോണ്‍ഗ്രസിനെ കാഴ്ചക്കാരാക്കി എന്‍ഡിഎ അധികാരത്തില്‍ വരുമെന്നാണ് അഭിപ്രായ സര്‍വ്വെ പ്രവചിച്ചിരിക്കുന്നത്. ആകെയുള്ള 30 സീറ്റുകളില്‍ 18 എണ്ണത്തിലും വിജയിച്ച് പുതുച്ചേരിയില്‍ എന്‍ഡിഎ സര്‍ക്കാര്‍ രൂപീകരിക്കുമെന്ന് സര്‍വ്വേ ഫലം പ്രവചിക്കുന്നു.

മെയ് രണ്ടിന് വോട്ടെണ്ണുമ്പോള്‍ ബിജെപിയുടെ നേതൃത്വത്തിലുള്ള എന്‍ഡിഎ മുന്നണി 16 മുതല്‍ 20 സീറ്റ് വരെ സ്വന്തമാക്കുമെന്നാണ് സര്‍വ്വെ അഭിപ്രായപ്പെടുന്നത്. കഴിഞ്ഞ നിയമസഭ തിരഞ്ഞെടുപ്പില്‍ എന്‍ഡിഎ മുന്നണിക്ക് 12 സീറ്റുകളാണ് ആകെ ലഭിച്ചത്. കോണ്‍ഗ്രസിന്റെ നേതൃത്വത്തിലുള്ള യുപിഎ മുന്നണിക്ക് ഇത്തവണ 12 മുതല്‍ 14 സീറ്റ് വരെ നേടിയേക്കുമെന്ന് സര്‍വ്വേ അഭിപ്രായപ്പെടുന്നു. ഒരു സീറ്റ് മറ്റുള്ളവര്‍ നേടുമെന്നും പറയുന്നു.

കോണ്‍ഗ്രസും ഡിഎംകെയും ചേര്‍ന്ന മുന്നണി കഴിഞ്ഞ തിരഞ്ഞെടുപ്പില്‍ 17 സീറ്റുകള്‍ നേടിയാണ് അധികാരത്തുലേറിയത്. ഇത്തവണത്തെ തിരഞ്ഞെടുപ്പില്‍ എന്‍ഡിഎ വോട്ടിംഗ് ശതമാനം വര്‍ദ്ധിപ്പിക്കുമെന്നും സര്‍വ്വേയില്‍ പറയുന്നു. കഴിഞ്ഞ തിരഞ്ഞെടുപ്പില്‍ ആകെ 30.5 ശതമാനാണ് എന്‍ഡിഎ നേടിയ വോട്ട്. ഇത്തവണ ഇത് 14.0 ശതമാനം വര്‍ദ്ധിപ്പിച്ച് 45.8 ശതമാനമാക്കുമെന്നാണ് സര്‍വ്വേയില്‍ അഭിപ്രായപ്പെടുന്നത്.

മുഖ്യമന്ത്രി സ്ഥാനത്തേക്ക് ഏറ്റവും കൂടുതല്‍ ആളുകള്‍ പിന്തുണച്ചിരിക്കുന്നത് ഡിഎംകെ അധ്യക്ഷന്‍ എംകെ സ്റ്റാലിനെ ആണ്. ബിജെപിയോടും നരേന്ദ്ര മോദിയോടും തമിഴ്‌നാട്ടിലെ വോട്ടര്‍മാര്‍ക്കുളള നിലപാടും സര്‍വ്വേയില്‍ വ്യക്തമാണ്. സര്‍വ്വേ ഫലം വിശദമായി അറിയാം. തമിഴ്നാട്ടില്‍ ഭരണം നിലനിര്‍ത്താന്‍ അണ്ണാഡിഎംകെ-ബിജെപി സഖ്യം കിണഞ്ഞ് പരിശ്രമിക്കുകയാണ്. സംസ്ഥാനത്ത് ഭരണവിരുദ്ധ വികാരം ശക്തമാണ്. മാത്രമല്ല ബിജെപിക്കും കേന്ദ്ര സര്‍ക്കാരിനും എതിരെയും ശക്തമായ വികാരം നിലനില്‍ക്കുന്നു.