ലേറ്റായെങ്കിലും ലേറ്റസ്റ്റാ... കഴക്കൂട്ടത്തെ സ്ഥാനാര്ത്ഥിയായി ശോഭ സുരേന്ദ്രനെ പ്രഖ്യാപിച്ചതോടെ നെഞ്ചിടിപ്പോടെ കടകംപള്ളി സുരേന്ദ്രന്; ഇന്ന് കളത്തിലിറങ്ങുന്ന ശോഭ സുരേന്ദ്രന് തുടക്കമിടുന്നത് റോഡ് ഷോയോടെ; ശബരിമല വിഷയം ശക്തമായി ഉന്നയിക്കുമെന്ന് ശോഭ സുരേന്ദ്രന്; ശബരിമലമന്ത്രിക്ക് എണ്ണിയെണ്ണി ഉത്തരം പറയേണ്ടി വരും
കഴക്കൂട്ടം നിയോജക മണ്ഡലത്തില് ശക്തമായ സ്ഥാനാര്ത്ഥിയേയാണ് ബിജെപി രംഗത്തിറക്കിയത്. ശബരിമല വിഷയത്തില് ശ്രദ്ധേയമായ സമരം നടത്തിയ ശോഭ സുരേന്ദ്രന് എത്തുന്നതോടെ കടകംപള്ളിയുടെ മാപ്പ് വീണ്ടും ചര്ച്ചയാകുകയാണ്.
ഇന്ന് കഴക്കൂട്ടം മണ്ഡലത്തിലെത്തുന്ന ശോഭ പറയുന്നത് താനല്ല മത്സരിക്കുന്നതെന്നാണ്. വിശ്വാസികളും കടകംപള്ളിയും തമ്മിലുള്ള മത്സരമായിരിക്കുമെന്നാണ് ശോഭ പറയുന്നത്. ഇന്ന് കാര്യവട്ടം മുതല് കഴക്കൂട്ടംവരെയുള്ള റോഡ് ഷോയോടെയാണ് ശോഭ മത്സരത്തിനെത്തുന്നത്.
അനിശ്ചിതാവസ്ഥയ്ക്ക് വിരാമമിട്ട് എന്.ഡി.എ സ്ഥാനാര്ത്ഥിയായി ശോഭാ സുരേന്ദ്രനെ പ്രഖ്യാപിച്ചതോടെ കഴക്കൂട്ടം മണ്ഡലത്തിലെ മത്സര ചിത്രം തെളിഞ്ഞു. ശക്തമായ ത്രികോണ മത്സരത്തിനാണ് മണ്ഡലം വേദിയാവുന്നത്.
നിലവിലെ എം.എല്.എയും മന്ത്രിയുമായ കടകംപള്ളി സുരേന്ദ്രന് ഒരാഴ്ച മുമ്പ് തന്നെ പ്രചാരണം തുടങ്ങി. ആദ്യ പട്ടികയില് ഉള്പ്പെട്ട യു.ഡി.എഫിന്റെ ഡോ.എസ്.എസ്. ലാലിനും രംഗത്തിറങ്ങാനായി.
എന്.ഡി.എ സ്ഥാനാര്ത്ഥിയുടെ കാര്യത്തില് മാത്രമാണ് ആശയക്കുഴപ്പം നിലനിന്നിരുന്നത്. ശോഭാ സുരേന്ദ്രന് എത്തുന്നതോടെ ശക്തമായ മത്സരം നടക്കുന്ന മണ്ഡലമായി കഴക്കൂട്ടം മാറി. ഇടതുപക്ഷം തികഞ്ഞ ശുഭാപ്തി വിശ്വാസം പുലര്ത്തുന്ന മണ്ഡലങ്ങളിലൊന്നാണ് കഴക്കൂട്ടം. അട്ടിമറി വിജയം ലക്ഷ്യമിട്ടാണ് കോണ്ഗ്രസ് എസ്.എസ് ലാലിനെ രംഗത്തിറക്കിയത്. എന്നാല് കഴിഞ്ഞ നിയമസഭാ തിരഞ്ഞെടുപ്പില് ബി.ജെ.പിയുടെ വി. മുരളീധരന് രണ്ടാം സ്ഥാനത്തെത്തിയതാണ് എന്.ഡി.എയുടെ ആത്മവിശ്വാസത്തിന്റെ അടിത്തറ
കടകംപള്ളി സുരേന്ദ്രന് 1996ലെ നിയമസഭാ തിരഞ്ഞെടുപ്പില് കഴക്കൂട്ടം മണ്ഡലത്തില് 24,000 ത്തിലധികം വോട്ടുകളുടെ ഭൂരിപക്ഷത്തില് ജയിച്ചിരുന്നു. സി.പി.എം സംസ്ഥാന കമ്മിറ്റി അംഗം. 2007 മുതല് 2016 വരെ പാര്ട്ടി ജില്ലാ സെക്രട്ടറിയായി പ്രവര്ത്തിച്ചു. 2016ലെ തിരഞ്ഞെടുപ്പില് കഴക്കൂട്ടം മണ്ഡലത്തില് 7347 വോട്ടുകളുടെ ഭൂരിപക്ഷത്തില് വിജയിച്ചു. വിദ്യാര്ത്ഥി ,യുവജന സംഘടനകളിലൂടെ മുഖ്യധാരാ രാഷ്ട്രീയത്തിലെത്തി.
അന്തര്ദേശീയ തലത്തില് അറിയപ്പെടുന്ന പൊതുജനാരോഗ്യ വിദഗ്ദ്ധനാണ് ഡോ.എസ്.എസ്. ലാല്. ഇന്ത്യയുള്പ്പെടെ വിവിധ രാജ്യങ്ങളില് ലോകാരോഗ്യ സംഘടനയുടെയും മറ്റു ചില അന്താരാഷ്ട്ര സംഘടനകളുടെയും ഉയര്ന്ന ഉദ്യോഗസ്ഥനായി പ്രവര്ത്തിച്ചിരുന്നു.
ഇപ്പോള് തിരുവനന്തപുരത്തുള്ള ഗ്ലോബല് ഇന്സ്റ്റിറ്റിയൂട്ട് ഒഫ് പബ്ലിക് ഹെല്ത്തില് പൊതുജനാരോഗ്യ വിഭാഗത്തിന്റെ പ്രൊഫസറും തലവനുമാണ്. ലോകാരോഗ്യ സംഘടനയുടെ ഒരു ആഗോള സമിതിയുടെ വൈസ് ചെയര്മാനും മറ്റു പല സമിതികളില് അംഗവുമാണ്.മെഡിക്കല് ബിരുദം കൂടാതെ എം.പി.എച്ച്, എം.ബി.എ,പി.എച്ച്.ഡി തുടങ്ങിയ വിദ്യാഭ്യാസ യോഗ്യതകളും ഉണ്ട്.നിയമസഭാ തിരഞ്ഞെടുപ്പില് ആദ്യ മത്സരം.
ബി.ജെ.പിയുടെ കരുത്തുറ്റ പ്രാസംഗികരിലൊരാളാണ് ശോഭാ സുരേന്ദ്രന്. ബാലഗോകുലത്തിലൂടെ പൊതുപ്രവര്ത്തനത്തിന് തുടക്കം. ഇപ്പോള് ബി.ജെ.പിയുടെ സംസ്ഥാന വൈസ് പ്രസിഡന്റ്. 2004ല് വടക്കാഞ്ചേരി ഉപതിരഞ്ഞെടുപ്പില് ബി.ജെ.പി സ്ഥാനാര്ത്ഥിയായിരുന്നു.
2011 ല് പുതുക്കാട് നിയമസഭാ മണ്ഡലത്തിലും 2014ല് പാലക്കാട് ലോക് സഭാ മണ്ഡലത്തിലും മത്സരിച്ച് പരാജയപ്പെട്ടു. 2019ല് ആറ്റിങ്ങല് ലോക് സഭാ മണ്ഡലത്തില് മത്സരിച്ച് 2,48,081 വോട്ടുകള് നേടി. ആദ്യ സ്ഥാനാര്ത്ഥി പട്ടികയില് ഉള്പ്പെടാതിരുന്ന ശോഭ, ബി.ജെ.പി കേന്ദ്ര നേതൃത്വത്തിന്റെ ഇടപെടലോടെയാണ് കഴക്കൂട്ടത്ത് എത്തുന്നത്.
കഴക്കൂട്ടത്ത് ശോഭാ സുരേന്ദ്രന്റെ പേര് ആദ്യം തന്നെ ഉയര്ന്നതാണ്. എന്നാല് സംസ്ഥാന നേതൃത്വത്തിന്റെ അതൃപ്തി മൂലം ആദ്യ പട്ടികയില് ഇടം നേടാനായില്ല. പകരം കേന്ദ്രമന്ത്രി വി. മുരളീധരനോ കോണ്ഗ്രസില്വരുന്ന അപ്രതീക്ഷിത സ്ഥാനാര്ത്ഥിയോ വരുമെന്നും കേട്ടു. എന്നാല് കേന്ദ്ര നേതൃത്വത്തിന്റെ ഇടപെടലിനെ തുടര്ന്നാണ് ശോഭയ്ക്ക് വീണ്ടും നറുക്ക് വീണത്.
"
https://www.facebook.com/Malayalivartha