ഈ തെരഞ്ഞെടുപ്പ് കാലത്ത് ഒ രാജഗോപാല്‍ വായ് തുറക്കരുതെന്നാണ് ഓരോ ബിജെപിക്കാരനും ഇപ്പോള്‍ കോണ്‍ഗ്രസുകാരനും ആഗ്രഹിക്കുന്നത്.

വായ് തുറന്നാല്‍ അപ്പോള്‍ പിണറായിയേയും മറ്റ് നേതാക്കളേയും പുകഴ്ത്തിക്കളയും. എന്തിന് കുമ്മനത്തെ ഇരുത്തിക്കൊണ്ടാണ് തന്റെ പിന്‍ഗാമിയല്ല കുമ്മനമെന്ന് പറഞ്ഞത്. മുരളീധരന്‍ വന്നതോടെ ജയിക്കുമോ എന്ന സംശയവും പ്രകടിപ്പിക്കുന്നു.

അതേസമയം സി.പി.എമ്മുമായി ബി.ജെ.പി ധാരണയുണ്ടെന്ന ആര്‍.എസ്.എസ് സൈദ്ധാന്തികന്‍ ആര്‍. ബാലശങ്കറിന്റെ ആരോപണത്തിലും സിപിഎമ്മിന് രക്ഷകനായി രാജഗോപാലെത്തി. സ്‌കോര്‍ ചെയ്ത ചെന്നിത്തലയെ വെട്ടിലാക്കുന്ന പ്രസ്താവനയാണ് രാജഗോപാല്‍ നടത്തിയത്.

കേരളത്തില്‍ മുമ്പ് തിരഞ്ഞെടുപ്പില്‍ കോണ്‍ഗ്രസ് ലീഗ്ബി.ജെ.പി സഖ്യമുണ്ടായിട്ടുണ്ടെന്ന് മുതിര്‍ന്ന ബി.ജെ.പി നേതാവ് ഒ. രാജഗോപാല്‍ എം.എല്‍.എയുടെ വെളിപ്പെടുത്തല്‍. ബി.ജെ.പി നേതൃത്വത്തിന്റെ അനുമതിയോടെയായിരുന്നു സഖ്യമെന്നും, ഇത് പാര്‍ട്ടിക്ക് നേട്ടമുണ്ടാക്കിയെന്നും ഒരു ചാനലിന് നല്‍കിയ അഭിമുഖത്തില്‍ രാജഗോപാല്‍ തുറന്നുപറഞ്ഞു.

നേമത്ത് കെ. മുരളീധരന്‍ ശക്തനായ സ്ഥാനാര്‍ത്ഥിയാണെന്ന അഭിപ്രായപ്രകടനത്തിന് ശേഷമുള്ള ഈ വെളിപ്പെടുത്തല്‍ രാഷ്ട്രീയ വൃത്തങ്ങളില്‍ പുതിയ ചര്‍ച്ചകള്‍ക്ക് വഴിവയ്ക്കും.

വടക്കന്‍ കേരളത്തിലാണ് പ്രാദേശിക തലത്തിലുള്ള സഖ്യം പ്രധാനമായും ഉണ്ടായിരുന്നതെന്ന് രാജഗോപാല്‍ പറഞ്ഞു. മഞ്ചേശ്വരത്തും ഒറ്റപ്പാലത്തും ബി.ജെ.പിയുടെ വോട്ടുകള്‍ കൂടാന്‍ ഇത് കാരണമായി. പ്രായോഗിക രാഷ്ട്രീയത്തില്‍ ഇത്തരത്തില്‍ ചില ഒത്തുതീര്‍പ്പുകള്‍ വേണ്ടി വരും. അഡ്ജസ്റ്റുമെന്റ് നേതൃതലത്തില്‍ അറിഞ്ഞാല്‍ മതി. ജനങ്ങളോട് പറയേണ്ടതില്ല. എന്നാല്‍, എല്‍.ഡി.എഫുമായി വോട്ടുകച്ചവടം നടത്തിയെന്ന ബാലശങ്കറിന്റെ ആരോപണം അസംബന്ധമാണ്.

സി.പി.എമ്മുമായി ബി.ജെ.പി ഇടപാടുണ്ടാക്കിയെന്ന ആരോപണം ശരിയല്ല. ബാലശങ്കര്‍ ആരോ പറയുന്നത് ഏറ്റുപറയുകയാണ്. കഴിഞ്ഞതവണ താന്‍ ജയിച്ച നേമത്ത് കെ. മുരളീധരന്‍ ശക്തനായ സ്ഥാനാര്‍ത്ഥിയാണ്. കരുണാകരന്റെ മകനായ മുരളീധരന് ജനങ്ങളുടെ വലിയ അംഗീകാരമുണ്ടെന്നും അദ്ദേഹം പറഞ്ഞു

അതേസമയം തിരഞ്ഞെടുപ്പില്‍ മുമ്പ് കോണ്‍ഗ്രസ് ലീഗ്ബി.ജെ.പി സഖ്യമുണ്ടായിട്ടുണ്ടെന്ന ഒ.രാജഗോപാലിന്റെ വെളിപ്പെടുത്തലിന് മറുപടിയുമായി നേമത്തെ യു.ഡി.എഫ് സ്ഥാനാര്‍ത്ഥി കെ.മുരളീധരന്‍ രംഗത്തെത്തി. കേരളത്തില്‍ ഒരിക്കലും കോണ്‍ഗ്രസ്, ബി.ജെ.പിയുമായി സഖ്യമുണ്ടാക്കിയിട്ടില്ലെന്ന് അദ്ദേഹം മാദ്ധ്യമങ്ങളോട് പറഞ്ഞു. എല്ലാ കാലത്തും ബി.ജെ.പിയെ എതിര്‍ത്തിട്ടുള്ളത് കോണ്‍ഗ്രസും യു.ഡി.എഫും മാത്രമാണ്. വിശ്വാസം ഈ തിരഞ്ഞെടുപ്പില്‍ പ്രധാന ചര്‍ച്ചയാവും. ബി.ജെ.പിയുമായി ഒരു അഡ്ജസ്റ്റുമെന്റിനും തയ്യാറായിട്ടില്ല.

സി.പി.എമ്മുമായി ബി.ജെ.പി ധാരണയുണ്ടെന്ന ആര്‍.എസ്.എസ് സൈദ്ധാന്തികന്‍ ആര്‍. ബാലശങ്കറിന്റെ ആരോപണം ബി.ജെ.പി കേന്ദ്ര നേതൃത്വവും തള്ളി. എല്‍.ഡി.എഫിനെയും യു.ഡി.എഫിനെയും ശക്തമായി എതിര്‍ത്താണ് ബി.ജെ.പി മുന്നോട്ട് പോകുന്നതെന്ന് ദേശീയ വക്താവ് ഗോപാലകൃഷ്ണ അഗര്‍വാള്‍ തൃശൂരില്‍ മാദ്ധ്യമങ്ങോട് പറഞ്ഞു. കൂട്ടുകെട്ടുണ്ടെന്നത് അദ്ദേഹത്തിന്റെ മാത്രം സൃഷ്ടിയാണ്.

ബാലശങ്കര്‍ വെളിപ്പെടുത്തിയതിന് മറുപടിയായാണ് ദേശീയ വക്താവിന്റെ പ്രതികരണം. ഇരു മുന്നണികള്‍ക്കുമെതിരെ ശക്തമായ ജനവികാരമാണ് കേരളത്തിലുള്ളത്. ഇത് ഉയര്‍ത്തിക്കൊണ്ടുവന്നത് ബി.ജെ.പിയാണ്. ഈ സാഹചര്യത്തില്‍ നീക്കുപോക്കുണ്ടെന്ന ആരോപണം ബാലിശമാണ്.ഇത്തവണ ബി.ജെ.പി മികച്ച വിജയം കൈവരിക്കും.
''

എന്തായാലും രാജഗോപാല്‍ ഒന്നും പറയരുതേ എന്നാണ് കോണ്‍ഗ്രസുകാരും ബിജെപിക്കാരും ആഗ്രഹിക്കുന്നത്. രാജേട്ടനെ തള്ളിപ്പറയാനും പറ്റില്ല വോട്ടും പോകും. കോലീബി സഖ്യം രാജേട്ടന്‍ ചര്‍ച്ചയാക്കിയപ്പോള്‍ യഥാര്‍ത്ഥത്തില്‍ ഞെട്ടിയത് ചെന്നിത്തലയുടെ മുഖ്യമന്ത്രി സ്വപ്നമാണ്.