കോണ്‍ഗ്രസുകാരുടെ പ്രിയപ്പെട്ട പത്രമാണ് മനോരമയും മാതൃഭൂമിയും. ഭരണപക്ഷത്തിന്റെ ശ്രേയാംസ്‌കുമാറിന്റെ കൈകളിലാണ് മാതൃഭൂമി എങ്കിലും പത്രം പ്രതിപക്ഷത്തിന്റേ റോളിലാണ് പലപ്പോഴും പ്രവര്‍ത്തിക്കുന്നത്. ഇപ്പോള്‍ ആ മാതൃഭൂമിയും ഭരണ തുടര്‍ച്ച പറയുന്നു. ഇതോടെ ഏഴോളം ദേശീയ സംസ്ഥാന മാധ്യമങ്ങളാണ് ഭരണ തുടര്‍ച്ച പറഞ്ഞത്. ചെന്നിത്തല ഹരിപ്പാട് പൊട്ടിക്കരഞ്ഞതിന് ശേഷമുള്ള ആദ്യ സര്‍വേ എന്ന പ്രത്യേകതയുമുണ്ട്.

നിയമസഭാ തിരഞ്ഞെടുപ്പില്‍ ഇടതുമുന്നണി സര്‍ക്കാര്‍ 75 മുതല്‍ 83 വരെ സീറ്റുകള്‍ നേടുമെന്നാണ് മാതൃഭൂമി സിവോട്ടര്‍ അഭിപ്രായ സര്‍വേ പറയുന്നത്. കേരളം കാത്തിരിക്കുന്ന നിയമസഭാ തിരഞ്ഞെടുപ്പില്‍ ഏത് മുന്നണി ഭരണം നേടും, കേരളം എങ്ങനെ ചിന്തിക്കുന്നു എന്നറിയാന്‍ മാതൃഭൂമി ന്യൂസ് നടത്തിയ അഭിപ്രായ സര്‍വേ ഫലത്തിലാണ് ഇടതുമുന്നണിയുടെ തിരിച്ചുവരവ് പ്രവചിക്കുന്നത്.

75മുതല്‍ 83 സീറ്റ് വരെ ലഭിക്കുമെന്നാണ് സര്‍വെ ഫലം. യുഡിഎഫിന് 56 64 സീറ്റുകള്‍ നേടാനാവുമെന്നും സര്‍വേ ഫലം പറയുന്നു. എന്‍ഡിഎ 02 സീറ്റുകള്‍ നേടുമെന്നും സര്‍വെ പറയുന്നു. എല്‍ഡിഎഫ് 79ഉം യുഡിഎഫ് 60ഉം ബിജെപി ഒരു സീറ്റും നേടുമെന്നാണ് സര്‍വേ ഫല ശരാശരി. എല്‍ഡിഎഫിന് 40.9 ശതമാനം വോട്ടുകളും യുഡിഎഫിന് 37.9 ശതമാനം വോട്ടുകളും എന്‍ഡിഎയ്ക്ക് 16.6 ശതമാനം വോട്ടുകളുമാണ് സര്‍വേ പ്രവചിക്കുന്നത്.

ഈ സര്‍ക്കാരിനോട് എതിര്‍പ്പുണ്ട്, മാറണം എന്നാഗ്രഹിക്കുന്നവര്‍ 40.5 ശതമാനം പേരാണ്. സര്‍ക്കാരിനോട് എതിര്‍പ്പുണ്ട് എന്നാല്‍ സര്‍ക്കാര്‍ മാറേണ്ടതില്ലെന്ന് 27.6 ശതമാനം പേര്‍ അഭിപ്രായപ്പെടുന്നു. സര്‍ക്കാരിനോട് എതിര്‍പ്പില്ല, സര്‍ക്കാര്‍ മാറേണ്ടതില്ല എന്ന് 31.9 ശതമാനം പേര്‍ അഭിപ്രായപ്പെടുന്നു.

പ്രതിപക്ഷത്തിന് 42.6 ശതമാനം പേര്‍ മോശം റേറ്റിങ് നല്‍കിയപ്പോള്‍ 34.4 ശതമാനം പേര്‍ മികച്ചതെന്ന് അഭിപ്രായപ്പെട്ടു. 20.1 ശതമാനം പേര്‍ ശരാശരിയെന്ന് രേഖപ്പെടുത്തി. 2.9 ശതമാനം പേര്‍ അഭിപ്രായമില്ലെന്നും രേഖപ്പെടുത്തി.

മുഖ്യമന്ത്രിയുടെ പ്രകടനം മികച്ചതെന്ന് കൂടുതല്‍ പേരും അഭിപ്രായം രേഖപ്പെടുത്തി. 38.10% പേരും മുഖ്യമന്ത്രിയുടെ പ്രകടനം മികച്ചതെന്ന് അഭിപ്രായപ്പെട്ടപ്പോള്‍ ശരാശരി എന്ന് രേഖപ്പെടുത്തിയത് 37.2 ശതമാനം പേരാണ്. മുഖ്യമന്ത്രിയുടെ പ്രകടനം വളരെ മോശമെന്ന് 24.7 ശതമാനം പേര്‍ അഭിപ്രായം രേഖപ്പെടുത്തി.

ഉമ്മന്‍ ചാണ്ടിയുടെ തിരിച്ചുവരവ് നേട്ടമോ എന്ന ചോദ്യത്തിന് 47.7% നേട്ടമെന്നും 36.3% നേട്ടമല്ല എന്നും 16% പേര്‍ അഭിപ്രായമില്ല എന്നും അഭിപ്രായം രേഖപ്പെടുത്തി. ബിജെപി ഈ തിരഞ്ഞെടുപ്പില്‍ നില മെച്ചപ്പെടുത്തുമോ എന്ന ചോദ്യത്തോട് മാതൃഭൂമിസിവോട്ടര്‍ അഭിപ്രായ സര്‍വേയില്‍ 56.9ശതമാനവും ബിജെപി നില മെച്ചപ്പെടുത്തില്ലെന്നാണ് പ്രതികരിച്ചത്. 31.8 ശതമാനം പേര്‍ നില മെച്ചപ്പെടുത്തുമെന്നും 11.3 ശതമാനം പേര്‍ പറയാന്‍ കഴിയില്ലെന്നും പ്രതികരിച്ചു.

കിറ്റും പെന്‍ഷനും തിരഞ്ഞെടുപ്പില്‍ വലിയ ഗുണം ചെയ്യും എന്ന് കരുതുന്നവരാണ് 53.9 ശതമാനം. ചെറുതായി ഗുണംചെയ്യും എന്ന് 26.2 ശതമാനം പേര്‍ അഭിപ്രായപ്പെടുന്നു. ഗുണം ചെയ്യില്ല എന്ന് 18 ശതമാനം പേരും പറയുന്നു.

സര്‍ക്കാര്‍ വികസന മോഡലായി ഉയര്‍ത്തിക്കാട്ടുന്ന കിഫ്ബി ഗുണം ചെയ്‌തോ എന്ന ചോദ്യത്തോട് 37.3 ശതമാനം പേര്‍ ഗുണം ചെയ്യും എന്നാണ് പ്രതികരിച്ചത്. ഗുണം ചെയ്യില്ല എന്ന് 37.1 ശതമാനം പേരും പ്രതികരിച്ചു. ഇത് തിരഞ്ഞെടുപ്പിനെ ഒട്ടും ബാധിക്കില്ല എന്ന് 15.4 ശതമാനം പേരാണ് അഭിപ്രായപ്പെട്ടത്. പറയാന്‍ കഴിയില്ല എന്ന് പ്രതികരിച്ചവരാണ് 10.2 ശതമാനം പേര്‍.

സര്‍ക്കാരിന്റെ ക്ഷേമപ്രവര്‍ത്തനങ്ങള്‍ ഗുണം ചെയ്‌തെന്ന് മാതൃഭൂമിസീവോട്ടര്‍ സര്‍വേ ഫലം. കേരളം കാത്തിരിക്കുന്ന നിയമസഭാ തിരഞ്ഞെടുപ്പില്‍ ഏത് മുന്നണി ഭരണം നേടും, കേരളം എങ്ങനെ ചിന്തിക്കുന്നു എന്നറിയാന്‍ മാതൃഭൂമി ന്യൂസ് നടത്തിയ അഭിപ്രായ സര്‍വേ ഫലത്തിലാണ് കേരള സര്‍ക്കാരിന്റെ സൗജന്യ ഭക്ഷ്യക്കിറ്റും പെന്‍ഷനും ഗുണം ചെയ്തതായി വ്യക്തമാക്കുന്നത്.