തിരഞ്ഞെടുപ്പില്‍ കേരളമെന്നോ കശ്മീരെന്നോ കര്‍ണാടകയോ എന്നൊന്നുമില്ല. ഏത് സ്ഥലവും പ്രചാരണത്തിനിടെ കടന്നുവരാം. ഏതായാലും മലപ്പുറത്ത് മലയാളത്തില്‍ തകര്‍ത്ത് മനോജ് തിവാരി.  എന്‍ഡിഎ മലപ്പുറം നിയോജക മണ്ഡലം കണ്‍വെന്‍ഷനിലാണ്  ബിജെപി എംപി മനോജ് തിവാരി തകര്‍ത്തത്.  നടനും ഗായകനുമായ തിവാരി മലപ്പുറത്തിനോട് മലയാളത്തില്‍ നമസ്‌കാരം പറഞ്ഞാണ് സംസാരിച്ച് തുടങ്ങിയത്. ഒരുമയുടെ പ്രാധാന്യം വര്‍ണിക്കുന്ന ഗാനവും അദ്ദേഹം ആലപിച്ചു.

നമ്മള്‍ക്ക് പല ഭാഷയായിരിക്കാം വേഷമായിരിക്കാം മതമായിരിക്കാം എന്നാല്‍ ബിജെപിയുടെ കാഴ്ചയില്‍ ഭാരതീയന്‍ എന്നു മാത്രമേ ഉണ്ടായിരിക്കുകയുള്ളൂ. ത്യാഗത്തിന്റെ പര്യായമാണ് ബിജെപി. രണ്ട് എംപിമാരുണ്ടായിരുന്ന ബിജെപി ഇന്ന് മുന്നൂറില്‍ പരം എംപിമാരുമായി ജൈത്രയാത്ര തുടരുന്നു. എ.പി. അബ്ദുള്ളക്കുട്ടി ലോകത്തിലെ തന്നെ ഒന്നാം സ്ഥാനത്തുള്ള പാര്‍ട്ടിയുടെ ദേശീയ ഉപാധ്യക്ഷനാണ്. അങ്ങനെയൊരാളെയാണ് മലപ്പുറത്ത് ബിജെപി കൊണ്ടു വന്നിട്ടുള്ളത്.  

പാക്കിസ്ഥാന്റെ പട്ടാള മേധാവിയുടെ അടുത്തിടെയുണ്ടായ പ്രസ്താവന മോദി ഭരണത്തിന് വലിയൊരു അംഗീകാരം തന്നെയാണ്. കശ്മീര്‍ വിഷയത്തില്‍ ഞങ്ങള്‍ക്കിനി ഒന്നും കൊടുക്കാനുമില്ല വാങ്ങാനുമില്ലെന്ന് പറഞ്ഞ് അപേക്ഷയുടെ ഭാഷയുമായി പാക്കിസ്ഥാന്‍ മുന്നോട്ട് വന്നിരിക്കുന്നു.

എന്നാല്‍ കൊവിഡ് വാക്‌സിന്‍ നല്‍കിക്കൊണ്ടാണ് ഭാരതം പാക്കിസ്ഥാന് മറുപടി കൊടുത്തത്. ഇതുതന്നെയാണ് മറ്റെല്ലാ രാജ്യങ്ങളോടും ഭാരതത്തിന്റെ മനോഭാവമെന്നും അദ്ദേഹം കൂട്ടിച്ചേര്‍ത്തു. ന്യൂനപക്ഷങ്ങളെ ബി.ജെ.പിയിലേയ്ക്ക് കൂടുതല്‍ അടുപ്പിക്കുക ലക്ഷ്യമിട്ടുള്ള തന്ത്രങ്ങളാണ ബി.ജെ.പി അണിയറയില്‍ പയറ്റുന്നത്.

തദ്ദേശ തിരഞ്ഞെടുപ്പില്‍ ഈ നീക്കം സ്ഥാനാര്‍ഥി നിര്‍ണയത്തില്‍ വരെ പ്രതിഫലിച്ചു. ഏതായാലും ഈ നീക്കം ഇത്തവണ ഫലം കാണുമോ എന്ന് കാത്തിരുന്നു കാണാം.