മറ്റ് സ്ഥലങ്ങളില്‍ നിന്നും വ്യത്യസ്ഥമായി കഴക്കൂട്ടം ചൂട് പിടിക്കുകയാണ്. ശബരിമല വിഷയം ഏറ്റവുമധികം ആഞ്ഞടിക്കുന്നതും കഴക്കൂട്ടത്ത് തന്നെയാണ്.

അതിനിടെ മന്ത്രി കടകംപള്ളി സുരേന്ദ്രനെ പൂതന എന്ന് വിളിച്ച് ബിജെപി സ്ഥാനാര്‍ഥി ശോഭാ സുരേന്ദ്രന്‍. വിശ്വാസികളെ ഇല്ലാതാക്കാനെത്തിയ പൂതന അവതാരമാണ് കടകംപള്ളി സുരേന്ദ്രനെന്നാണ് ശോഭാ സുരേന്ദ്രന്‍ ആരോപിച്ചത്.

പാര്‍ട്ടിയിലെ അസ്വാരസ്യങ്ങള്‍ക്ക് ശേഷം കേന്ദ്രമന്ത്രി വി. മുരളീധരനും ശോഭാ സുരേന്ദ്രനും ആദ്യമായി ഒരുമിച്ചു പങ്കെടുത്ത മണ്ഡലം കണ്‍വന്‍ഷനിലായിരുന്നു പരാമര്‍ശം. ശബരിമല വിഷയവും ദേവസ്വം മന്ത്രിയായ കടകംപള്ളി സുരേന്ദ്രന്റെ നിലപാടുമാണ് കഴക്കൂട്ടത്തെ പ്രചാരണത്തില്‍ ശോഭാ സുരേന്ദ്രന്റെ മുഖ്യ ആയുധം.

കേന്ദ്രമന്ത്രി വി. മുരളീധരനും ശബരിമല വിഷയത്തില്‍ ദേവസ്വംമന്ത്രിയെ കടന്നാക്രമിച്ചു. പാര്‍ട്ടിയിലെ പ്രശ്‌നങ്ങള്‍ക്കും സ്ഥാനാര്‍ഥി നിര്‍ണയത്തിലെ അസ്വാരസ്യങ്ങള്‍ക്കുമെല്ലാം ശേഷം ആദ്യമായി ഒരേവേദിയിലെത്തിയ ശോഭയെ വി. മുരളീധരന്‍ ഷാളണയിച്ച് സ്വീകരിച്ചു. ശോഭയുമായി പ്രശ്‌നങ്ങളുണ്ടെന്നതെല്ലാം മാധ്യമങ്ങളുടെ പ്രചാരണം മാത്രമാണെന്ന് പറഞ്ഞ വി. മുരളീധരന്‍, ശോഭയുടെ സ്ഥാനാര്‍ഥിത്വത്തെ എതിര്‍ത്തിട്ടില്ലെന്നും വിശദീകരിച്ചു. പ്രശ്‌നങ്ങളൊന്നുമില്ലെന്ന് മുരളീധരന്‍ വിശദീകരിച്ചെങ്കിലും ശോഭാ സുരേന്ദ്രന്‍ അതിനേക്കുറിച്ച് പരാമര്‍ശിച്ചേയില്ല.

കാര്യവട്ടം ധര്‍മ ശാസ്താ ക്ഷേത്ര മുറ്റത്താണ് ശോഭ സുരേന്ദ്രന്റെ പര്യടനത്തിന് തുടക്കമായത്. നൂറു കണക്കിനു സ്ത്രീകള്‍ ഉള്‍പ്പെടെയുള്ളവര്‍ക്കു നടുവില്‍ വിരിഞ്ഞ താമരപ്പൂ ഉയര്‍ത്തിക്കാട്ടിയാണ് ശോഭ സുരേന്ദ്രന്‍ തീപ്പൊരി പ്രസംഗം നടത്തിയത്.

ഈ തിരഞ്ഞെടുപ്പില്‍ കടകംപള്ളി സുരേന്ദ്രനെ എതിരാളിയായി കിട്ടിയതില്‍ ഞാന്‍ ദൈവത്തോടു നന്ദി പറയുന്നു. ഇവിടുത്തെ ജനങ്ങളുടെ വോട്ട് നേടി മന്ത്രിയായ ശേഷം ശബരിമലയിലെ വിശ്വാസങ്ങള്‍ ചവിട്ടിയരയ്ക്കാനുള്ള ദുഷ്‌ചെയ്തികള്‍ക്കു നേതൃത്വം നല്‍കിയ അദ്ദേഹത്തിനുള്ള ശിക്ഷ ഇത്തവണ ഈ നാടു തന്നെ നല്‍കും. ഞാനിവിടേക്കു വരുന്നുവെന്ന് അറിഞ്ഞ് സന്തോഷത്തോടെ വിളിച്ചവരില്‍ ബിജെപിക്കാര്‍ മാത്രമല്ല, കോണ്‍ഗ്രസിന്റെയും സിപിഎമ്മിന്റെയും ആള്‍ക്കാരുമുണ്ട്. ഈശ്വര നിയോഗമാണിത്. മികച്ച ഭൂരിപക്ഷത്തിലുള്ള വിജയം ഉറപ്പെന്നും ശോഭ സുരേന്ദ്രന്‍ പറഞ്ഞു.

ശബരിമലയും ശരണം വിളിയും പ്രചാരണത്തില്‍ ശക്തമായി. അയ്യപ്പക്ഷേത്ര ദര്‍ശനം നടത്തി ക്ഷേത്ര മുറ്റത്തു നിന്ന് ശരണം വിളികളോടെയാണ് ശോഭയുടെ പര്യടനം ആരംഭിച്ചത്. ദേവസ്വം മന്ത്രിയുടെ മണ്ഡലത്തില്‍ ശബരിമല തന്നെയാണു ബിജെപിക്ക് മുഖ്യശരണം. എന്നാല്‍ അതിനൊപ്പം കഴക്കൂട്ടം ബൈപാസ് വികസനത്തിനായി മോദി സര്‍ക്കാര്‍ 860 കോടി ചെലവഴിച്ചതുള്‍പ്പെടെയുള്ള വികസനവും ചര്‍ച്ചയാക്കുമെന്നും ശോഭ പറഞ്ഞു.

അനിശ്ചിതത്വങ്ങള്‍ക്കൊടുവില്‍ വൈകി കൈവന്ന മത്സര ടിക്കറ്റുമായി എത്തിയ ശോഭയ്ക്ക് ആവേശകരമായ സ്വീകരണമാണ് പാര്‍ട്ടി ഒരുക്കിയത്. കാര്യവട്ടം ജംക്ഷനില്‍ നിന്ന് പുഷ്പ വൃഷ്ടിയും പഞ്ചവാദ്യവും വെടിക്കട്ടുമായാണ് സ്ഥാനാര്‍ഥിയെ വരവേറ്റത്.

കര്‍ണാടക ഉപമുഖ്യമന്ത്രി അശ്വന്ത് നാരായണനും എത്തിയിരുന്നു. ക്ഷേത്ര ദര്‍ശനം നടത്തിയിറങ്ങിയ ശോഭയ്ക്കു മത്സരത്തിനു കെട്ടിവയ്ക്കാനുള്ള തുക നല്‍കിയത് ക്ഷേത്രത്തിലെ മാതൃ സമിതി. ഒട്ടേറെ ഇരുചക്ര വാഹനങ്ങളുടെ അകമ്പടിയോടെ നടന്ന റോഡ് ഷോ മണ്ഡലത്തിലെ പ്രധാന റോഡുകളിലൂടെയെല്ലാം കടന്നു പോയി. തര്‍ക്കങ്ങളെല്ലാം മാറ്റിവച്ച് ശോഭയുടെ വിജയത്തിനായി ബിജെപിക്കാര്‍ ഒറ്റക്കെട്ടാണ്.