ചര്മ്മം ദാനം ചെയ്ത ആഷിഖ് വിജയന് ആദരാഞ്ജലികള് അര്പ്പിച്ച് വീണ ജോര്ജ്
കോട്ടയം മെഡിക്കല് കോളേജിലെ സ്കിന് ബാങ്കിന് ചര്മ്മം ദാനം ചെയ്ത ആഷിഖ് വിജയന് ആദരാഞ്ജലികള് അര്പ്പിച്ച് മുന് ആരോഗ്യ മന്ത്രി വീണ ജോര്ജ്. വേര്പാടിന്റെ വേദനയിലും അതിന് സന്നദ്ധരായ കുടുംബത്തോട് മുന് മന്ത്രി നന്ദിയും ആദരവും അറിയിച്ചു. സ്കിന് ബാങ്കുമായും ബേണ്സ് ഐസിയുവുമായും ബന്ധപ്പെട്ട് കോട്ടയം മെഡിക്കല് കോളേജ് ടീമിന്റെ ആത്മാര്ത്ഥ പ്രവര്ത്തനങ്ങള് വീണ ജോര്ജ് പരാമര്ശിച്ചു.
'കേരളത്തിന്റേയും കോട്ടയത്തിന്റേയും അവയവദാന രംഗത്ത് നാഴികക്കല്ലാവുകയാണ് ഈ ചരിത്ര നേട്ടം' എന്ന് സ്കിന് ബാങ്കിനെ കുറിച്ച് ആരോഗ്യ മന്ത്രി കെ മുരളീധരന് നടത്തിയ പരാമര്ശം വീണ ജോര്ജ് ചൂണ്ടിക്കാട്ടി. കഴിഞ്ഞ സര്ക്കാരിന്റെ കാലത്ത് കേരളത്തിന്റെ ആരോഗ്യ മേഖലയെയും ആരോഗ്യ മന്ത്രി എന്ന നിലയില് തന്നെയും ഏറ്റവുമധികം വ്യക്തിപരമായി ആക്രമിക്കുകയും അധിക്ഷേപിക്കുകയും ചെയ്തവരില് ഒരാളായ കെ മുരളീധരന് സത്യം പറയാന് നിര്ബന്ധിതനാകുന്നു എന്നുള്ളത് നല്ല കാര്യമാണെന്ന് വീണ ജോര്ജ് പറയുന്നു.
എന്നാല് ഈ പ്രസ്താവനയില് കെ മുരളീധരന് ബോധപൂര്വം ഒരു തെറ്റ് വരുത്തിയിട്ടുണ്ടെന്ന് വീണ ജോര്ജ് ചൂണ്ടിക്കാട്ടി. മേയ് മാസത്തിലാണ് കെ സോട്ടോയുടെ ലൈസന്സ് കിട്ടിയതെന്ന് പറയുന്നത് തെറ്റാണ്. ഫെബ്രുവരി മാസത്തില് തന്നെ കെ സോട്ടോയുടെ ലൈസന്സ് ലഭ്യമായിരുന്നു. കേരളത്തില് സ്കിന് ബാങ്കുകള് ഉണ്ടായിരുന്നില്ല. രണ്ടാം പിണറായി വിജയന് സര്ക്കാരിന്റെ കാലത്ത്, സ്കിന് ബാങ്കിന്റെ ആവശ്യകത തിരിച്ചറിയുകയും സ്കിന് ബാങ്ക് തുടങ്ങാന് തീരുമാനിക്കുകയും ചെയ്തു.
തിരുവനന്തപുരം മെഡിക്കല് കോളേജിലാണ് കേരളത്തിലെ ആദ്യ സ്കിന് ബാങ്ക് 6.75 കോടി രൂപ ചെലവഴിച്ച് സ്ഥാപിച്ചത്. രണ്ടാമതായി കോട്ടയം മെഡിക്കല് കോളേജിലും സജ്ജമാക്കി. മുരളീധരന് ഉള്പ്പെടെ ആക്രമിക്കുകയും ആക്ഷേപിക്കുകയും ചെയ്ത കഴിഞ്ഞ അഞ്ചു വര്ഷം നടപ്പിലാക്കിയ നൂതന സംവിധാനങ്ങളില് ഒന്ന് മാത്രമാണ് സ്കിന് ബാങ്ക്. ആധുനിക ബേണ്സ് ഐസിയുകള്, മില്ക്ക് ബാങ്കുകള്, റോബോട്ടിക് സര്ജറി തുടങ്ങി നൂതനങ്ങളായ ആയിരക്കണക്കിന് കാര്യങ്ങളും കെസിഡിസി, വണ്ഹെല്ത്ത് സെന്റര് ഫോര് നിപ റിസര്ച്ച്, രാജ്യാന്തര ആയുര്വേദ ഗവേഷണ കേന്ദ്രം തുടങ്ങിയ ഒട്ടേറെ പുതിയ സ്ഥാപനങ്ങളും വളരെ കൃത്യമായ ആലോചനയോടെ ശാസ്ത്രീയമായി പിണറായി സര്ക്കാരിന്റെ കാലത്ത് ആരംഭിച്ചിട്ടുണ്ടെന്ന് വീണ ജോര്ജ് ചൂണ്ടിക്കാട്ടി.
https://www.facebook.com/Malayalivartha
