നിയമസഭാ തെരഞ്ഞെടുപ്പിനായി സമര്‍പ്പിക്കപ്പെട്ട നാമനിര്‍ദേശ പത്രികകളുടെ സൂക്ഷ്മപരിശോധന പൂര്‍ത്തിയായി. സൂക്ഷ്മ പരിശോധനയ്ക്ക് ശേഷം സംസ്ഥാനത്ത് 140 മണ്ഡലങ്ങളില്‍ ആയി 1061 സ്ഥാനാര്‍ത്ഥികളാണ് മത്സരത്തിനുള്ളത്.

പത്രിക സമര്‍പ്പണത്തിനുള്ള അവസാന ദിനം കഴിഞ്ഞ 19 ആയിരുന്നു. 19 വരെ ലഭിച്ചത് 2180 അപേക്ഷകളാണ്. ഇത്രയും അപേക്ഷകളുടെ സൂക്ഷ്മ പരിശോധനയാണ് ഇന്നലെ നടന്നത്. പത്രികകള്‍ 22 വരെ പിന്‍വലിക്കാനായി സമയമുണ്ടെന്ന് മുഖ്യ തെരഞ്ഞെടുപ്പ് ഓഫീസര്‍ അറിയിച്ചു. ഏപ്രില്‍ ആറിനാണ് തെരഞ്ഞെടുപ്പ്.



മെയ് രണ്ടിനാണ് വോട്ടെണ്ണല്‍ നടക്കുക. തിരുവനന്തപുരം ജില്ലയില്‍ 14 മണ്ഡലങ്ങളിലായി മത്സരിക്കുന്നത് 107 പേര്‍. 23 പത്രിക തള്ളി. അതേസമയം ജില്ലയിലെ മുന്നണികളുടെ സ്ഥാനാര്‍ഥികളെല്ലാം സൂക്ഷ്മപരിശോധന കടമ്പ മറികടന്നു. മാര്‍ച്ച് 22 വരെ പത്രിക പിന്‍വലിക്കാം. ഇക്കുറി പ്രധാന സ്ഥാനാര്‍ഥികള്‍ക്കടക്കം വെല്ലുവിളിയായി അപരന്മാരുണ്ട്.

നേമത്ത് യു.ഡി.എഫ് സ്ഥാനാര്‍ഥി കെ. മുരളീധരന് വെല്ലുവിളിയായി മുരളീധരന്‍ നായരുണ്ട്. ബി.ജെ.പി സ്ഥാനാര്‍ഥി കുമ്മനം രാജശേഖരന് തലവേദനയായി രാജശേഖരനും മത്സരിക്കുന്നു.

അരുവിക്കരയില്‍ എല്‍.ഡി.എഫ് സ്ഥാനാര്‍ഥി ജി. സ്റ്റീഫന് ഡി. സ്റ്റീഫന്‍ വെല്ലുവിളിയുയര്‍ത്തും. വര്‍ക്കല, ചിറയിന്‍കീഴ്, നെടുമങ്ങാട്, കഴക്കൂട്ടം, തിരുവനന്തപുരം മണ്ഡലങ്ങളില്‍ യു.ഡി.എഫ് സ്ഥാനാര്‍ഥികള്‍ക്ക് സമാന പേരുകളില്‍ സ്ഥാനാര്‍ഥികളുണ്ട്.

വര്‍ക്കലയിലെ യു.ഡി.എഫ് സ്ഥാനാര്‍ഥി ബി.ആര്‍.എം. ഷെഫീറിന് ഷെഫീറും നെടുമങ്ങാട് പി.എസ്. പ്രശാന്തിന് പ്രശാന്ത് സിയും കഴക്കൂട്ടത്ത് എസ്.എസ്. ലാലിന് ലാലുമോനും തിരുവനന്തപുരത്ത് വി.എസ്. ശിവകുമാറിന് ശിവകുമാര്‍ കെയും വെല്ലുവിളിയാകും.