നിയമസഭാ തിരഞ്ഞെടുപ്പിൽ ശക്തമായ പോരാട്ടം നടക്കുന്ന മണ്ഡലമാണ് തൃത്താല. യൂത്ത് കോൺഗ്രസ് നേതാവ് വിടി ബൽറാമിനെതിരെ സിപിഎം എംബി രാജേഷിനെ ഇറക്കിയതോടെയാണ് മത്സരം കടുത്തത്. ഇപ്പോഴിതാ തന്റെ സുഹൃത്തുകൂടിയായ ബൽറാമിന് എല്ലാവിധ ആശംസകളും നേർന്ന് ഫേസ്ബുക്ക് കുറിപ്പിലൂടെ രംഗത്തെത്തിയിരിക്കുകയാണ് ഐക്യരാഷ്ട്രസഭയുടെ ദുരന്തലഘൂകരണ വിഭാഗം തലവൻ മുരളി തുമ്മാരുകുടി.

രാജീവ് ഗാന്ധിയുടെ നവോദയ വിദ്യാലയത്തിന്റെ സൃഷ്ടിയായ ബൽറാമിനെ ആകസ്മികമായി രാഹുൽ ഗാന്ധി രാഷ്ട്രീയത്തിലേക്ക് കൈപിടിച്ച് കയറ്റിയതിനെക്കുറിച്ചാണ് കുറിപ്പിൽ പറയുന്നത്. തന്റെ രാഷ്ട്രീയ ജീവിതത്തിലെ ഏറ്റവും വെല്ലുവിളി നിറഞ്ഞ തിരഞ്ഞെടുപ്പിലൂടെയാണ് ബൽറാം കടന്നു പോകുന്നതെന്ന് അദ്ദേഹം കുറിച്ചു.

ഐ ടി യിലും ടെലികോമിലും ഒക്കെ നടത്തിയ വിപ്ലവകരങ്ങളായ ഇടപെടലുകളുടെ പേരിലാണ് ശ്രീ രാജീവ് ഗാന്ധി കൂടുതലും അറിയപ്പെടുന്നത്. ഐ ടി രംഗത്തെ ഒരു ആഗോള ശക്തിയും സാന്നിദ്ധ്യവുമാകാൻ അതെത്ര മാത്രം ഇന്ത്യയെ സഹായിച്ചു എന്ന് ഇന്ന് നമുക്കറിയാം.
പക്ഷെ ഇതിലും വിപ്ലവകരമായ ഒരു സമൂഹമാറ്റത്തിന് അദ്ദേഹം വിത്തിട്ടിരുന്നു. പക്ഷേ ഇത് നാം വേണ്ടത്ര മനസ്സിലാക്കിയിട്ടില്ല എന്ന് പറഞ്ഞായിരുന്നു തുടങ്ങിയത്.

ഗ്രാമപ്രദേശത്തുനിന്നുള്ള കുട്ടികൾക്ക് റെസിഡൻഷ്യൽ ആയി നല്ല വിദ്യാഭ്യാസം നൽകണം എന്ന ലക്ഷ്യത്തോടെ രാജീവ് ഗാന്ധിയാണ് ഇന്ത്യയിലെ ഓരോ ജില്ലയിലും ഓരോ നവോദയ വിദ്യാലയങ്ങൾ സ്ഥാപിച്ചത്.

ഇന്നിപ്പോൾ ഐ ഐ ടി ഉൾപ്പടെ ഉന്നത വിദ്യാഭ്യാസ സ്ഥാപനങ്ങൾ ഏതെടുത്താലും ആപേക്ഷികമായി നവോദയ വിദ്യാലയത്തിലെ കുട്ടികൾ ഏറെ കൂടുതലാണ്. ഇന്നും അവിടെ അഡ്മിഷൻ നേടുന്നവരും ഒത്തിരിയാണ്. അത് പിന്നീട് തൊഴിൽ രംഗത്തും പ്രതിഫലിക്കുമല്ലോ.

ഇന്ത്യയിലെ സർക്കാർ സംവിധാനത്തിലും സ്വകാര്യമേഖലയിലും തലപ്പത്ത് ഗ്രാമങ്ങളിൽ നിന്നുള്ള നവോദയയിൽ പഠിച്ച പൂർവ്വവിദ്യാർത്ഥികൾ എത്തുന്ന ഒരു കാലം വരും.

അന്ന് നവോദയ ഉണ്ടാക്കുന്ന സാമൂഹ്യ ശൃംഖല കൂടി ആകുമ്പോൾ പതുക്കെ പതുക്കെ ഇന്ത്യയിലെ ഗ്രാമങ്ങളിൽ അത് സാമ്പത്തികവും, വിദ്യാഭ്യാസപരവും സാമൂഹ്യവും ആയ ഉണർവ്വ് ഉണ്ടാക്കും, കെട്ടുറപ്പും.

ഇതൊരു ചെറിയ കാര്യമല്ല. തൊള്ളായിരത്തി എൺപത്തി ആറിന് ശേഷം ഇത്രമാത്രം വ്യാപകമായതും വിഷനറി ആയതുമായ ഒരു നീക്കവും ഇന്ന് വരെ ഞാൻ വിദ്യാഭ്യാസ രംഗത്ത് കണ്ടിട്ടില്ല.

ഇപ്പോൾ ഇതൊക്കെ ഓർക്കാൻ കാരണമുണ്ട്. എൻ്റെ സുഹൃത്ത് വി ടി ബൽറാം തിരഞ്ഞെടുപ്പ് രംഗത്ത് ഉണ്ട്. എം എൽ എ ആയതിന് ശേഷമാണ് ഞാൻ അദ്ദേഹത്തെ പരിചയപ്പെടുന്നത്. അദ്ദേഹം നവോദയ വിദ്യാലയത്തിന്റെ സൃഷ്ടി ആണ്. അദ്ദേഹത്തിൽ നിന്നാണ് ഞാൻ നവോദയ വിദ്യാഭ്യാസത്തെപ്പറ്റി കൂടുതൽ മനസ്സിലാക്കിയത് എന്നും അദ്ദേഹം കൂട്ടിച്ചേർത്തു.

നവോദയ വിദ്യാലയത്തിൽ നിന്നും കോളേജിലെത്തി അദ്ദേഹം പഠിക്കാത്ത ബിരുദങ്ങൾ ഇല്ല. ബി എസ് സി, ബി ടെക്ക്, എൽ എൽ ബി, എം ബി എ എല്ലാം ഉണ്ട്. അതെ സമയം കോളേജ് കാലം തൊട്ടേ രാഷ്ട്രീയവും ഉണ്ട്. രണ്ടായിരത്തി പതിനൊന്നിൽ രാഹുൽ ഗാന്ധി "ബ്രിഗേഡിൻ്റെ" ഭാഗമായിട്ടാണ് അദ്ദേഹം ആദ്യം നിയമസഭയിൽ എത്തുന്നത്.

രാജീവ് ഗാന്ധി വിതച്ച ഒരു ആശയത്തിൽ നിന്നും വളർന്നു വന്ന യുവ പ്രതിഭയെ രാഹുൽ ഗാന്ധി കൈ പിടിച്ചുയർത്തിയത് ചരിത്രത്തിന്റെ ഒരു ആകസ്മികത തന്നെയാണ്.

തൻ്റെ രാഷ്ട്രീയ ജീവിതത്തിലെ ഏറ്റവും വെല്ലുവിളി നിറഞ്ഞ തിരഞ്ഞെടുപ്പിലൂടെയാണ് ശ്രീ ബൽറാം കടന്നു പോകുന്നത്. യുവാക്കളും പ്രതിഭാശാലികളും ആയ യുവാക്കൾ തമ്മിൽ ഇത്തവണ ഏറ്റവും ശക്തമായ രാഷ്ട്രീയ പോരാട്ടം നടക്കുന്ന മണ്ഡലമാണ് തൃത്താല. ഇത്തരം വെല്ലുവിളികൾക്ക് കൂടിയുള്ള തയ്യാറെടുപ്പായിരുന്നു ഇതുവരെയുള്ള രാഷ്ട്രീയ ജീവിതമെന്നും മുരളി പറഞ്ഞു.