വ്യക്തിയല്ല, പാര്‍ട്ടിനയമാണ് പ്രധാനം...  പുതുമുഖങ്ങളെമാത്രം ഉള്‍പ്പെടുത്തിയുള്ള പുതിയ മന്ത്രിസഭാ പ്രഖ്യാപനത്തിലൂടെ സി.പി.എം. ചൊവ്വാഴ്ച രാഷ്ട്രീയകേരളത്തെ അമ്പരപ്പിച്ചു.

എന്നാല്‍, പാര്‍ട്ടി ഉയര്‍ത്തിക്കാട്ടിയത് അവരുടെ പ്രഖ്യാപിത നയമാണ്. വ്യക്തിയല്ല, പാര്‍ട്ടിനയമാണ് പ്രധാനം എന്നതുതന്നെ. പല ഘട്ടങ്ങളിലായി ഇ.എം.എസ്. മുതല്‍ പിണറായി വിജയന്‍വരെ ആവര്‍ത്തിച്ച പ്രഖ്യാപനമാണത്.

പിണറായിക്കുപുറമേ ആരോഗ്യമന്ത്രി കെ.കെ. ശൈലജകൂടി മന്ത്രിസഭയിലെത്തുമെന്ന എല്ലാ പ്രചാരണങ്ങളെയും തള്ളിയാണ് പുതുമുഖങ്ങളെ വെച്ചുള്ള പട്ടികയ്ക്ക് സി.പി.എം. രൂപംനല്‍കിയത്.

മുഖ്യമന്ത്രിയെപ്പോലെത്തന്നെ ഇക്കഴിഞ്ഞ വര്‍ഷങ്ങളിലെ പ്രതിസന്ധിഘട്ടങ്ങളില്‍ ആരോഗ്യമന്ത്രി എന്ന നിലയില്‍ ശൈലജ പ്രകടിപ്പിച്ച ഭരണമികവിനെ കണക്കിലെടുക്കാമായിരുന്നു എന്ന് പാര്‍ട്ടിയിലെ അപൂര്‍വം ചിലര്‍ അഭിപ്രായപ്പെട്ടെങ്കിലും ഭൂരിപക്ഷം അംഗങ്ങളും പുതിയ പട്ടികയോട് ഐക്യപ്പെട്ടു.

പാര്‍ട്ടി പ്രതിനിധികള്‍ എന്ന നിലയില്‍ ജനസേവനം നടത്തുക എന്നതിനപ്പുറം വ്യക്തിപൂജയിലേക്കും ആരെയെങ്കിലും ഉയര്‍ത്തിക്കാട്ടുന്നതിലേക്കും ചില പ്രചാരണങ്ങള്‍ നീങ്ങുന്നുവെന്ന് പാര്‍ട്ടി തിരിച്ചറിഞ്ഞതിന്റെ ഫലമാണ് ഇപ്പോഴത്തെ പുതുമുഖ പരീക്ഷണം. അവസരം ലഭിക്കുമ്പോള്‍ അതനുസരിച്ച് പാര്‍ട്ടി പ്രതിനിധികള്‍ ഉയരുക എന്നതാവണം നയമെന്നും ഇവിടെ വ്യക്തി അപ്രസക്തമാണെന്നും കൂടി ഇതിലൂടെ വിളിച്ചുപറയുകയാണ് സി.പി.എം.

കെ.കെ. ശൈലജ പൊതു ഇടങ്ങളില്‍ പാര്‍ട്ടിയെക്കാള്‍ സ്വീകാര്യത അവര്‍ നേടിയെടുത്തു എന്നതാണ് കോവിഡ് കാലത്തുണ്ടായ പ്രതീതി.

അതത് കാലത്ത് പാര്‍ട്ടി നിശ്ചയിക്കുന്ന പേരുകള്‍ക്ക് ഈ പ്രതിച്ഛായ ഒരു പ്രതിസന്ധിയായി രൂപംകൊള്ളുന്ന സ്ഥിതി ഒഴിവാക്കാനുള്ള മുന്‍കരുതല്‍ കൂടിയാണ് ഇപ്പോഴത്തെ തീരുമാനം.

അതേസമയം പുതിയ മന്ത്രിസഭയുടെ സത്യപ്രതിജ്ഞ നാളെ സെന്‍ട്രല്‍ സ്റ്റേഡിയത്തില്‍ നടക്കും. എല്ലാ ഒരുക്കവും പൂര്‍ത്തിയായി . കോവിഡ് പ്രോട്ടോക്കോള്‍ കര്‍ശനമായി പാലിച്ചായിരിക്കും ചടങ്ങ് നടക്കുക.