പോരാളി ഷാജിയെന്ന സൈബര്‍ പോരാളിയെ തീര്‍ന്നെന്നും തീര്‍ത്തെന്നും തരത്തിലുള്ള പ്രചരണമാണ് സോഷ്യല്‍ മീഡിയയിലാകെ നടക്കുന്നത്. എന്നാല്‍ അതിനേക്കാള്‍ വേഗത്തില്‍ ഉയര്‍ത്തെഴുന്നേറ്റിരിക്കുകയാണ്.

സിപിഎമ്മിന്റെ സൈബര്‍ മുഖമായിരുന്ന പോരാളി ഷാജിയെ കൂട്ടത്തോടെ അണ്‍ഫോളോ ചെയ്ത് സൈബര്‍ സഖാക്കള്‍ രംഗത്തെത്തി. ഡിവൈഎഫ്‌ഐ സംസ്ഥാന സെക്രട്ടറി എ.എ.റഹീമിനെ പേരെടുത്തുപറഞ്ഞു വിമര്‍ശിച്ചതാണ് ഷാജിക്ക് വിനയായത്. പാര്‍ട്ടിക്കെതിരെ വരുന്ന വിമര്‍ശനങ്ങള്‍ മുഖമില്ലാത്തവരുടെതാണെന്നും പോരാളി ഷാജി നിഗൂഢമായ അജ്ഞാത സംഘമാണെന്നും ചാനല്‍ ചര്‍ച്ചയ്ക്കിടെ റഹീം പറഞ്ഞതാണു ഷാജിയെ പ്രകോപിപ്പിച്ചത്.

റഹീമിന്റെ 'ഗുഡ് സര്‍ട്ടിഫിക്കറ്റും' പാര്‍ട്ടിയുടെ ശമ്പളവും തനിക്കു വേണ്ടെന്നു പറഞ്ഞ് ഷാജി വെല്ലുവിളി ഉയര്‍ത്തിയതിനു പിന്നാലെയാണ് 'വി ലവ് സിപിഎം' ഉള്‍പ്പെടെയുള്ള പേജുകളും സൈബര്‍ സഖാക്കളും പോരാളി ഷാജി പേജ് ഡിസ്‌ലൈക്ക് ചെയ്യാന്‍ ആവശ്യപ്പെട്ട് പോസ്റ്റുകളിട്ടത്.

ഏഴരലക്ഷത്തോളം ഫോളോവേഴ്‌സുണ്ടായിരുന്ന പേജിലെ ഫോളോവര്‍മാരില്‍ പതിനായിരത്തോളം പേര്‍ ഈ ആഹ്വാനം വന്ന് ആദ്യ മൂന്നു മണിക്കൂറിനിടെത്തന്നെ ഡിസ്‌ലൈക്കടിച്ചു. ഇപ്പോള്‍ 7.3 ലക്ഷത്തിലേക്ക് ഫോളോവേഴ്‌സിന്റെ എണ്ണം താഴ്ന്നു.

കെ.കെ.ശൈലജയെ മന്ത്രിസ്ഥാനത്തുനിന്നു നീക്കുന്നതായുള്ള തീരുമാനം വന്നയുടന്‍ 'കോപ്പ്' എന്ന് പോസ്റ്റ് ചെയ്തു ഷാജി പ്രതിഷേധിച്ചിരുന്നു. 'മഹാമാരികൊണ്ട് ലോകം വീര്‍പ്പുമുട്ടിയപ്പോഴും ഈ കൊച്ചു കേരളത്തെ മരണത്തില്‍ മുക്കിക്കൊല്ലാതെ പിടിച്ചു നിര്‍ത്താന്‍ ടീച്ചര്‍ വഹിച്ച പങ്ക് അവിസ്മരണീയം. ആരോഗ്യരംഗം പരാജയപ്പെട്ടിരുന്നുവെങ്കില്‍ മരണസംഖ്യ വര്‍ധിക്കുമായിരുന്നു. ഒരു പക്ഷേ, തുടര്‍ഭരണം നഷ്ടപ്പെടുമായിരുന്നു...' ഈ തീരുമാനം ഒരുപാട് അമ്മമനസ്സുകളില്‍ വേദനയുണ്ടാക്കുമെന്നത് തീര്‍ച്ചയാണെന്നും പറഞ്ഞുകൊണ്ട് ഷാജി വീണ്ടും പോസ്റ്റിട്ടു.

പാര്‍ട്ടി തീരുമാനം വന്ന ശേഷം പിജെ ആര്‍മിയും കെ.കെ. ശൈലജയ്ക്കുവേണ്ടി വാദിച്ചു രംഗത്തെത്തിയിരുന്നു. പാര്‍ട്ടി വിമതരല്ല പാര്‍ട്ടിക്കൊപ്പം തന്നെയെന്ന് കുറിച്ചുകൊണ്ട് അതൃപ്തി രേഖപ്പെടുത്തിയെങ്കിലും പണിപാളുമെന്ന് ഉറപ്പായതോടെ പിജെ ആര്‍മി പാര്‍ട്ടി ലൈനിലേക്ക് അതിവേഗം തിരിച്ചെത്തി. സൈബര്‍ സഖാക്കള്‍ കൂട്ടത്തോടെ ഡിസ്‌ലൈക്കടിക്കാന്‍ തുടങ്ങിയതോടെ കഴിഞ്ഞ ദിവസം രാത്രി മൂന്നു മണിക്കൂറിലേറെ സമയം പേജ് അണ്‍പബ്ലിഷാക്കിയിരുന്നു. രാത്രി 12 മണിയോടെ പേജ് വീണ്ടു ലൈവായതോടെ ഡിസ്‌ലൈക്കുകള്‍ തുരുതുരെ എത്തി. ഇതിനിടെ ഗുഡ്‌ബൈ പറഞ്ഞുകൊണ്ടുവന്ന ഷാജിയുടെ പോസ്റ്റിനു താഴെ ഷാജിയെ അനുകൂലിച്ചും പ്രതികൂലിച്ചും അനുശോചനമര്‍പ്പിച്ചും കമന്റുകളും വന്നു നിറഞ്ഞു.

ബിനീഷ് കോടിയേരിയെ ടാഗ് ചെയ്തുകൊണ്ടായിരുന്നു ഗുഡ് ബൈ സഖാക്കളെ, കമിങ് സൂണ്‍ എന്നു രേഖപ്പെടുത്തിയ പോസ്റ്റ്. ബിനീഷ് കോടിയേരിയുടെ ടാഗ് പിന്നീട് നീക്കംചെയ്തു.

ഗുഡ് ബൈ പറഞ്ഞു പോയെങ്കിലും രാത്രി വൈകി പേജില്‍ വിശദീകരണക്കുറിപ്പ് പോസ്റ്റ് ചെയ്തുകൊണ്ട് ഷാജി വീണ്ടും രംഗത്തെത്തി. വിശദീകരണം ഇങ്ങനെയാണ്. 'ഭയ ഭക്തി ബഹുമാനങ്ങള്‍ 'കമ്യൂണിസം' എന്ന ആശയത്തോടു മാത്രമാണ്. അല്ലാതെ ഇന്നലെ പൊട്ടി മുളച്ച വെട്ട് കിളി കൂട്ടങ്ങളോടല്ല. അതെപ്പോഴും ഓര്‍മയില്‍ വേണം. സോഷ്യല്‍ മീഡിയയില്‍ എതിരാളികള്‍ മാത്രമുണ്ടായിരുന്ന കാലത്താണ് ഈ പേജ് ഇവിടെ വരുന്നത്. ഇതിലും വലിയ അക്രമണങ്ങളും ഭീഷണികളും പൊങ്കാല പൂരങ്ങളും വന്നിട്ടും ഒരടി പിന്നോട്ട് പോയിട്ടില്ല.. ഒരടി.. പിന്നല്ലേ മക്കളെ ഇന്ന്. ആര്‍എസ്എസ് രാജ്യവ്യാപകമായി ഈ പേജിനെതിരെ ക്യാംപെയ്ന്‍ നടത്തിയിട്ടും നേരം പുലരുന്നത് മുതല്‍ നട്ടപ്പാതിരാ വരെ പോസ്റ്റ് ഇട്ടിട്ടുണ്ട്. അവര്‍ക്കെതിരെ തന്നെ

ഞാന്‍ എന്റെ പേജിലും ഗ്രൂപ്പിലും ഇട്ട് സപ്പോര്‍ട്ട് നല്‍കിക്കൊണ്ടു വന്ന പേജുകള്‍ ഒക്കെ തന്നെയേ ഇപ്പോഴുമിവിടെ ഉള്ളൂ. അല്ലാത്തതും ഉണ്ട്. ഇല്ലെന്നല്ല. ഞാന്‍ ഈ പേജിന് പുറത്ത് ഒരാളെയും തെറി പറയാന്‍ പോയിട്ടില്ല. പാര്‍ട്ടിയുടെ പേരില്‍ ഒരു പെണ്ണിനോടും മര്യാദ വിട്ട് പെരുമാറാന്‍ പോയിട്ടില്ല. വിമര്‍ശനങ്ങളുടെ പേരില്‍ ഒരു സഖാവിനെയും ഭീഷണിപ്പെടുത്തി ഓടിക്കാന്‍ പോയിട്ടില്ല. അതുകൊണ്ട് തന്നെ ആര്‍ക്കു മുന്നിലും തല കുനിക്കുകയുമില്ല.

പിന്നെ സഖാവ് റഹിമിനെതിരെ പറഞ്ഞത്. അദ്ദേഹം ഒരു ഉത്തരവാദപ്പെട്ട നേതാവാണ്. ഒരാളെയും അടച്ചാക്ഷേപിക്കാന്‍ പാടില്ല. അത് സഖാവേ നിങ്ങള്‍ മറന്നു പോയി.. നിങ്ങള്‍ അങ്ങനെ പറയാന്‍ പാടില്ലായിരുന്നു.. ഞാനും അങ്ങനെ പറയാന്‍ പാടില്ലായിരുന്നു.. പിന്നെ ഒരു അനുഭാവി, അല്ലെങ്കില്‍ ഒരു പൗരന്‍ എന്ന നിലയ്ക്ക് ഞാനെപ്പോഴും സാധാരണ ജനങ്ങളുടെ അഭിപ്രായമാണ് പറയുക.. അതുകൊണ്ടുതന്നെ വിമര്‍ശനങ്ങളും ഉണ്ടാവും അതിനേക്കാള്‍ ഇരട്ടി നന്മകളും ഈ പേജിലൂടെ തന്നെ നിങ്ങളില്‍ എത്തും.

അംഗീകരിക്കാന്‍ കഴിയാത്തവര്‍ ദയവായി ഒഴിഞ്ഞു പോകുമല്ലോ... എന്നായിരുന്നു പോരാളി ഷാജി എഴുതിയത്.