ഒരാഴ്ചയായി തുടരുന്ന ട്രിപ്പിള്‍ ലോക് ഡൗണ്‍ അവസാനിച്ചു. എറണാകുളം, തൃശൂര്‍, തിരുവനന്തപുരം ജില്ലകളില്‍ ഇന്നു രാവിലെ മുതല്‍ ട്രിപ്പിള്‍ ലോക്ഡൗണ്‍ ഒഴിവാക്കി. മലപ്പുറത്തു ട്രിപ്പിള്‍ ലോക്ഡൗണ്‍ തുടരും. മലപ്പുറം ഒഴികെയുള്ള 3 ജില്ലകളില്‍ കോവിഡ് രോഗ സ്ഥിരീകരണ നിരക്ക് (ടിപിആര്‍) 25 ശതമാനത്തിനു താഴെയാവുകയും സജീവ കേസുകള്‍ കുറയുകയും ചെയ്ത സാഹചര്യത്തിലാണ് സാധാരണ ലോക്ഡൗണിലേക്കു മാറുന്നത്. അതേസമയം കോവിഡ് വ്യാപനം തുടരുന്ന സാഹചര്യത്തില്‍ സംസ്ഥാനത്ത് ലോക്ഡൗണ്‍ ഈ മാസം 30 വരെ നീട്ടി.

കോവിഡ് ബാധിച്ചു വീടുകളില്‍ കഴിയുന്നവര്‍ പുറത്തു പോകാതെ നോക്കാന്‍ നിരീക്ഷണം ശക്തമാക്കി. ഇങ്ങനെ കഴിയുന്നവര്‍ വീടുകളില്‍ ഉണ്ടോയെന്ന് ഉറപ്പാക്കുന്നതിനു പൊലീസ് കണ്‍ട്രോള്‍ റൂമില്‍ നിന്നു ഫോണ്‍ ചെയ്ത് അന്വേഷിക്കും.

കണ്ടെയ്ന്‍മെന്റ് സോണുകളില്‍ നിര്‍മാണപ്രവര്‍ത്തനം നടത്തുന്നതിനു തടസ്സമില്ല. നിര്‍മാണസാമഗ്രികള്‍ വില്‍ക്കുന്ന കടകള്‍ക്കു പ്രവര്‍ത്തനാനുമതിയുണ്ട്. ഇതു നടപ്പായില്ലെങ്കില്‍ പ്രത്യേക നിര്‍ദേശം നല്‍കും.

കൃഷിക്കാര്‍ക്കു വിത്തിറക്കാനുള്ള ക്രമീകരണങ്ങള്‍ക്കായി പ്രത്യേക ഇളവ് നല്‍കും. വിത്തിറക്കാനും കൃഷിപ്പണിക്കും പോകുന്നവര്‍ക്കു പാസ് വേണ്ട; സ്വയം സാക്ഷ്യപ്പെടുത്തിയ സത്യവാങ്മൂലം കരുതണം.

കോവിഡ് വാക്‌സീനുകള്‍ കേരളത്തില്‍ ഉല്‍പാദിപ്പിക്കാനുള്ള സംവിധാനം സംബന്ധിച്ചു വിദഗ്ധരുമായി സര്‍ക്കാര്‍ ചര്‍ച്ച നടത്തി വരികയാണെന്നു മുഖ്യമന്ത്രി പിണറായി വിജയന്‍. തിരുവനന്തപുരത്തെ ഇന്‍സ്റ്റിറ്റിയൂട്ട് ഓഫ് അഡ്വാന്‍സ്ഡ് വൈറോളജി ക്യാംപസില്‍ വാക്‌സീന്‍ കമ്പനികളുടെ ശാഖകള്‍ ആരംഭിക്കാന്‍ കഴിയുമോ എന്നാണു പരിശോധിക്കുന്നത്.

ഭക്ഷ്യ സിവില്‍ സപ്ലൈസ്, ഫുഡ് കോര്‍പറേഷന്‍ ഓഫ് ഇന്ത്യ, പോസ്റ്റല്‍, തുറമുഖം, സാമൂഹികനീതി, വനിതാ ശിശുക്ഷേമം, മൃഗസംരക്ഷണം എന്നീ വകുപ്പുകളിലെ ഫീല്‍ഡ് ജീവനക്കാരെ കൂടി വാക്‌സിനേഷനുള്ള മുന്‍ഗണനാ വിഭാഗത്തില്‍ ഉള്‍പ്പെടുത്തും.

വിദേശത്തു ജോലിക്കോ പഠനത്തിനോ പോകുന്നവര്‍ക്കു വാക്‌സിനേഷന്‍ നിര്‍ബന്ധമാണെങ്കില്‍ നല്‍കുമെന്ന് മുഖ്യമന്ത്രി അറിയിച്ചു. ആവശ്യമെങ്കില്‍ സര്‍ട്ടിഫിക്കറ്റില്‍ പാസ്‌പോര്‍ട്ട് നമ്പര്‍ ചേര്‍ത്തു നല്‍കും.

സംസ്ഥാനത്ത് കോവിഡ് മരണം വര്‍ധിക്കുന്നത് ആശങ്കയുളവാക്കുന്നു. ഇന്നലെ 142 പേരാണ് മരണമടഞ്ഞത്. ഇതോടെ ആകെ മരണം 6,994 ആയി. നിലവില്‍ ഐസിയുവില്‍ 3,975 പേരും വെന്റിലേറ്ററില്‍ 1,523 പേരുമാണ് ചികിത്സയില്‍ കഴിയുന്നത്.




ഇന്നലെ 1,33,558 സാംപിളുകളുടെ ഫലം വന്നപ്പോള്‍ 29,673 പേര്‍ക്ക് കോവിഡ് സ്ഥിരീകരിച്ചു. രോഗ സ്ഥിരീകരണ നിരക്ക് (ടിപിആര്‍) 22.22%. ഇതില്‍ 1,976 പേരുടെ സമ്പര്‍ക്ക ഉറവിടം വ്യക്തമല്ല. സംസ്ഥാനത്തിനു പുറത്തുനിന്നെത്തിയ 215 പേരും 129 ആരോഗ്യപ്രവര്‍ത്തകരും പോസിറ്റീവായി. ഇന്നലെ 41,032 പേര്‍ കോവിഡ് മുക്തരായി. നിലവില്‍ ചികിത്സയിലുള്ളത് 3,06,346 പേര്‍.

സംസ്ഥാനത്ത് കോവിഡ് കേസുകളുടെ എണ്ണം കുറയുന്നുണ്ടെങ്കിലും വരും ദിവസങ്ങളില്‍ മരണസംഖ്യ ഉയര്‍ന്നേക്കാമെന്നാണ് ആരോഗ്യവിദഗ്ധരുടെ അഭിപ്രായമെന്നു മുഖ്യമന്ത്രി പറഞ്ഞു. രണ്ടാം തരംഗത്തില്‍ ഏറ്റവും കൂടുതല്‍ കേസുകള്‍ റിപ്പോര്‍ട്ട് ചെയ്തത് ഈ മാസം 12ന് ആണ് 43,529. ആ ദിവസങ്ങളിലുണ്ടായ വൈറസ് ബാധ മൂര്‍ച്ഛിക്കുന്നതും മരിക്കുന്നതും ഇപ്പോഴാണ്.

ഇന്നലെ രേഖപ്പെടുത്തിയ മരണങ്ങളില്‍ മിക്കതിനും കാരണമായ വൈറസ് ബാധ ഉണ്ടായത് 2 മുതല്‍ 6 വരെ ആഴ്ച മുന്‍പായിരിക്കാം. അത്രയും മുന്‍പ് വൈറസ് ബാധിതരായവരില്‍ പലര്‍ക്കും രോഗം മൂര്‍ച്ഛിക്കുന്നതും ഓക്‌സിജനും വെന്റിലേറ്ററുകളുമൊക്കെ ആവശ്യമായി വരുന്നതും ഈ ദിവസങ്ങളിലായിരിക്കും. അതിനാല്‍ എല്ലാ ആശുപത്രികളിലും ആവശ്യത്തിന് വെന്റിലേറ്ററുകള്‍, ഓക്‌സിജന്‍, ഐസിയു കിടക്കകള്‍ എന്നിവ ഉറപ്പാക്കണമെന്നു കലക്ടര്‍മാരോടു നിര്‍ദേശിച്ചിട്ടുണ്ടെന്നു മുഖ്യമന്ത്രി പറഞ്ഞു.