13ാംനമ്പര്‍ ഔദ്യോഗികവാഹനം ഇത്തവണ ഏറ്റെടുക്കാന്‍ തയ്യാറായത് മന്ത്രി പി. പ്രസാദ്... മന്‍മോഹന്‍ ബംഗ്ലാവ് ഏറ്റെടുത്ത് ഗതാഗത മന്ത്രി ആന്റണി രാജുവും.

തോമസ് ഐസക്കിന്റെ പിന്‍ഗാമിയായി 13ാംനമ്പര്‍ ഔദ്യോഗികവാഹനം ഇത്തവണ ഏറ്റെടുക്കാന്‍ തയ്യാറായത് മന്ത്രി പി. പ്രസാദാണ്.

അശുഭസംഖ്യയാണെന്ന അന്ധവിശ്വാസംകാരണം നമ്പര്‍ 13 ഔദ്യോഗിക വാഹനത്തിന് സ്വീകരിക്കുന്നതില്‍ മന്ത്രിമാര്‍ അത്ര തത്പരരല്ല. പ്രത്യേകിച്ചും യു.ഡി.എഫ്. സര്‍ക്കാരുകളുടെ കാലത്ത്.

വി.എസ്. അച്യുതാനന്ദന്‍ മുഖ്യമന്ത്രിയായിരുന്നപ്പോള്‍ എം.എ. ബേബിയാണ് 13ാം നമ്പര്‍ സ്‌റ്റേറ്റ് കാറില്‍ സഞ്ചരിച്ചത്. അതിനുശേഷം യു.ഡി.എഫ് സര്‍ക്കാരിന്റെകാലത്ത് ആര്‍ക്കും വേണ്ടാത്തതിനാല്‍ ഈ നമ്പര്‍തന്നെ വേണ്ടെന്നുവെച്ചു.

പിണറായി വിജയന്റെ ആദ്യസര്‍ക്കാരില്‍ 13ാം നമ്പര്‍ വാഹനം സ്വീകരിക്കാന്‍ ചില മന്ത്രിമാര്‍ വിമുഖത കാട്ടിയത് വാര്‍ത്തയായപ്പോള്‍ മന്ത്രി തോമസ് ഐസക് അത് ഏറ്റെടുക്കാന്‍ തയ്യാറായി. ഇത്തവണ ധനമന്ത്രി കെ.എന്‍. ബാലഗോപാലിന് പത്താംനമ്പര്‍ വാഹനമാണ്. ഇത്തവണ സത്യപ്രതിജ്ഞാദിവസം മന്ത്രി ജി.ആര്‍. അനിലിനാണ് 13ാം നമ്പര്‍ അനുവദിച്ചിരുന്നത്.

13ാം നമ്പര്‍ നിര്‍ഭാഗ്യമാണെന്നും, ദുശ്ശകുനമാണെന്നും കരുതിയാണ് ഈ നമ്പറിലുള്ള കാറും ആരും എടുക്കാതിരുന്നത്. മന്‍മോഹന്‍ ബംഗ്ലാവിനെ സംബന്ധിച്ചും ഇതേ പോലെ അന്ധ വിശ്വാസം നിലനില്‍ക്കുന്നുണ്ട്. മന്ത്രിമാര്‍ വാഴാത്ത ബംഗ്ലാവ് എന്നാണ് പൊതുവില്‍ മന്‍മോഹന്‍ ബംഗ്ലാവ് അറിയപ്പെട്ടിരുന്നത്.

മന്ത്രിമാരുടെ ഔദ്യോഗിക വാഹന നമ്പര്‍

മുഖ്യമന്ത്രി പിണറായി വിജയന്‍ ഒന്ന്. കെ.രാജന്‍ രണ്ട്. റോഷി അഗസ്റ്റിന്‍ മൂന്ന്. കെ. കൃഷ്ണന്‍കുട്ടിനാല്. എ.കെ. ശശീന്ദ്രന്‍ അഞ്ച്. അഹമ്മദ് ദേവര്‍കോവില്‍ ആറ്്. ആന്റണി രാജു ഏഴ്. സജി ചെറിയാന്‍ എട്ട്. എം.വി. ഗോവിന്ദന്‍ മാസ്റ്റര്‍ ഒമ്പത്. കെ.എന്‍. ബാലഗോപാല്‍ 10. പി. രാജീവ് 11. വി.എന്‍. വാസവന്‍ 12. പി. പ്രസാദ് 13. ജെ. ചിഞ്ചുറാണി 14. കെ. രാധാകൃഷ്ണന്‍ 15. വി. ശിവന്‍കുട്ടി 16. പി.എ. മുഹമ്മദ് റിയാസ് 17. പ്രൊഫ. ആര്‍. ബിന്ദു 18. ജി.ആര്‍. അനില്‍ 19. വീണാജോര്‍ജ് 20. വി. അബ്ദുറഹ്മാന്‍ 21.