ജയിലധികൃതർ പ്രതിയെ ആൻ്റിജൻ ടെസ്റ്റ് നടത്തിയ ശേഷമേ പോലീസ് കസ്റ്റഡി നൽകാവൂവെന്ന് തിരുവനന്തപുരം പോക്സോ കോടതി ഉത്തരവിട്ടു.

പ്രതിയെ കോടതി അനുമതിയോടെ കസ്റ്റഡിയിൽ വാങ്ങി തെളിവെടുപ്പിന് ശേഷം പ്രതിയെ തിര്യെ ഏൽപ്പിക്കുമ്പോൾ അന്വേഷണ സംഘമടക്കം പോലീസ് സ്റ്റേഷനിലെ പോലീസുകാർക്കും കോവിഡ് പടർന്ന സാഹചര്യത്തിലാണ് കോടതി ഉത്തരവ്. പൂന്തുറ പീഡന കേസിൽ പ്രായപൂർത്തിയാകാത്ത പെൺകുട്ടിയെ പീഡിപ്പിച്ച പ്രതിയെ കസ്റ്റഡിയിൽ വച്ച് ചോദ്യം ചെയ്ത് തെളിവ് ശേഖരണത്തിനായി വിട്ടു നൽകുന്ന പോലീസ് കസ്റ്റഡി അപേക്ഷ പരിഗണിക്കവേയാണ് ജഡ്ജി കെ.വി. രജനീഷ് ജയിൽ സൂപ്രണ്ടിന് നിർണ്ണായക ഉത്തരവ് നൽകിയത്.

സമാനമായ കേസുകളിൽ മുമ്പ് കസ്റ്റഡി നൽകിയ കേസുകളിൽ പോലീസ് സ്റ്റേഷനിലെ മുഴുവൻ പോലീസ് ഉദ്യോഗസ്ഥരും ക്വാറൻ്റയിനിൽ പോകേണ്ടി വന്ന് പോലീസ് സ്റ്റേഷൻ പ്രവർത്തനം അവതാളത്തിലായ സംഭവങ്ങൾ നിരീക്ഷിച്ചാണ് കോടതി ഉത്തരവ്.

പ്രൊഡക്ഷൻ വാറണ്ട് പ്രകാരം ഹാജരാക്കിയ പൂന്തുറ പീഡന കേസ് പ്രതിയെ വെള്ളിയാഴ്ച ഉച്ചയ്ക്ക് 1.30 മുതൽ ഞായറാഴ്ച്ച ഉച്ചയ്ക്ക് 1.30 വരെ പൂന്തുറ സർക്കിൾ ഇൻസ്പെക്ടർക്ക് കോടതി വിട്ടു നൽകി.

കുറ്റകരമായ നരഹത്യാശ്രമ കേസിലടക്കം പ്രതിയായ യുവാവിനെയാണ് കസ്റ്റഡി വിട്ടത്. ഇരയായ പെൺകുട്ടിയെ ഇയാൾ ഭീഷണിപ്പെടുത്തിയതിനെ തുടർന്ന് ഇര അന്വേഷണവുമായി സഹകരിക്കുന്നില്ലെന്ന് പൂന്തുറ പോലീസ് സമർപ്പിച്ച കസ്റ്റഡി അപേക്ഷയിലും സർക്കിൾ ഇൻസ്പെക്ടർ സമർപ്പിച്ച സത്യവാങ്മൂലത്തിലും പറയുന്നു.

മാതാപിതാക്കളുടെ സംരക്ഷണയിൽ കഴിഞ്ഞ മൈനർ പെൺകുട്ടിയെ തട്ടിക്കൊണ്ടുപോയ പ്രതി വാടക വീട്ടിൽ കൊണ്ടുചെന്ന് പീഡിപ്പിച്ചെന്നാണ് മാതാപിതാക്കളുടെ പരാതിയിൽ കേസ് എടുത്തത്. മെഡിക്കൽ പരിശോധനയിൽ (aggravating penetrating sexual inter course) ലൈംഗിക പീഡനം സ്ഥിരീകരിച്ചിട്ടുണ്ട്. അതേ സമയം പ്രതിയെ ഭയന്ന് ലൈംഗിക ബന്ധം നടന്നിട്ടില്ലെന്ന മൊഴിയിൽ പെൺകുട്ടി ഉറച്ചു നിൽക്കുന്നതാണ് പോലീസിന് തലവേദനയാകുന്നത്.

അതിനാൽ പോക്സോ നിയമത്തിലെ താരതമ്യേന ഗൗരവം കുറഞ്ഞ നിസ്സാര വകുപ്പായ 9 , 10 എന്നിവയും ഇന്ത്യൻ ശിക്ഷാ നിയമത്തിലെ 366 വകുപ്പുമാണ് എഫ്. ഐ. ആറിൽ ചുമത്തിയിട്ടുള്ളത്.

ആർ റ്റി പി സി ആർ പരിശോധന ഫലം ലഭ്യമാകാൻ 2 ദിവസമെങ്കിലും കാത്തിരിക്കേണ്ടി വരുന്ന സാഹചര്യത്തിലാണ് 2 മണിക്കൂറിൽ ഫലം ലഭ്യമാകുന്ന ആൻ്റിജൻ ടെസ്റ്റ് നടത്താൻ കോടതി ഉത്തരവിട്ടത്.