ഇനിയാണ് ബഹുമാനപ്പെട്ട മുഖ്യമന്ത്രീ, പണി പാളാന്‍ പോകുന്നത്. ഇതുവരെയുള്ള അങ്ങയുടെ കളികള്‍ക്കെല്ലാം കേരളം ഒപ്പം നിന്നു. എന്നാല്‍ ഇത്തവണത്തെ കളി കുറച്ച് കടുത്തതാണെന്ന് പറയാതിരിക്കാന്‍ കഴിയില്ലെന്നാണ് പൊതുജന സംസാരം.

രണ്ട് മുഖ്യധാരാ പാര്‍ട്ടികളാണ് മുഖ്യമന്ത്രിക്കെതിരെ രംഗത്തുള്ളത്. ഒന്ന് മുസ്ലീം ലീഗും രണ്ട് ബി ജെ പിയും. മുസ്ലീം സമുദായത്തെ മുഖ്യമന്ത്രിക്കും സര്‍ക്കാരിനുമെതിരെ തിരിക്കാന്‍ മുസ്ലീം ലീഗും ഹിന്ദു സമുദായത്തെ മുഖ്യമന്ത്രിക്കെതിരെ തിരിക്കാന്‍ ബി ജെ പിയും കച്ച മുറുക്കുന്നു.

ഫലത്തില്‍ കേരളത്തില്‍ പച്ചയായ വര്‍ഗീയത കൊടുമ്പിരി കൊള്ളുകയാണ്. ന്യൂനപക്ഷക്ഷേമ വകുപ്പ് മുഖ്യമന്ത്രി ഏറ്റെടുത്തതുമായി ബന്ധപ്പെട്ടാണ് ലീഗ് അദ്ദേഹത്തിനെതിരെ തിരിഞ്ഞിരിക്കുന്നത്. എന്നാല്‍ മുസ്ലീം സമുദായത്തംഗത്തിന് നല്‍കാറുള്ള ന്യൂനപക്ഷ ക്ഷേമ വകുപ്പ് മുഖ്യമന്ത്രി ഏറ്റെടുത്തത് ന്യൂനപക്ഷ പ്രീണനമാണെന്നാണ് ബി ജെ പിയുടെ അഭിപ്രായം.

പിണറായി കളിച്ച അതേ കളി തന്നെയാണ് ലീഗും ബി ജെ പിയും കളിക്കാന്‍ പോകുന്നത്. വിവിധ സമുദായങ്ങളെ കൈയിലെടുത്തു കൊണ്ടാണ് പിണറായി ഇക്കഴിഞ്ഞ തെരഞ്ഞടുപ്പില്‍ മൃഗീയ ഭൂരിപക്ഷം നേടിയത്. നായരെയും ക്രിസ്ത്യാനികളെയും മുസ്ലിങ്ങളെയും അദ്ദേഹം ഒപ്പം നിര്‍ത്തിയത് ചില നിഗൂഢ കളികള്‍ കളിച്ചിട്ടാണ്.

ന്യൂനപക്ഷക്ഷേമ വകുപ്പ് മുഖ്യമന്ത്രി ഏറ്റെടുത്തതിനെ എല്ലാവരും സ്വാഗതം ചെയ്തതായാണ് കണ്ടതെന്നും ഏതെങ്കിലും കൂട്ടര്‍ക്ക് ആശങ്കയുള്ളതായി തോന്നുന്നില്ലെന്നും ആണ് ഇതിന് മുഖ്യമന്ത്രി പറഞ്ഞ മറുപടി. മുസ്ലീം ലീഗടക്കം ഇതിനെതിരെ രംഗത്തെത്തിയിട്ടുണ്ടെന്ന് മാധ്യമങ്ങള്‍ ശ്രദ്ധയില്‍പ്പെടുത്തിയപ്പോള്‍ ലീഗ് അല്ല വകുപ്പ് തീരുമാനിക്കുന്നതെന്നും മുസ്ലീംലീഗിനല്ല മുസ്ലീം ജനങ്ങളുടെ അട്ടിപ്പേറവകാശമെന്നും പിണറായി പരിഹസിച്ചു.

മുസ്ലീംജനവിഭാഗത്തിന് എന്നിലും ഈ സര്‍ക്കാരിലും വിശ്വാസമുണ്ടെന്ന് എല്ലാവര്‍ക്കുമറിയാം. ന്യൂനപക്ഷക്ഷേമ വകുപ്പ് മുഖ്യമന്ത്രി ഏറ്റെടുത്തു എന്നതിനെ എല്ലാവരും സ്വാഗതം ചെയ്തതായാണ് പൊതുവില്‍ കണ്ടത്. മുസ്ലീം ലീഗല്ല വകുപ്പ് തീരുമാനിക്കുന്നത്. മുസ്ലീം ജനവിഭാഗം ന്യൂനപക്ഷമാണ്.

രണ്ടാം പിണറായി സര്‍ക്കാറിലെ വകുപ്പ് വിഭജന വിജ്ഞാപനം ഇറങ്ങിയപ്പോള്‍ ഏറ്റവും ശ്രദ്ധിക്കപ്പെട്ടത് ന്യൂനപക്ഷക്ഷേമ വകുപ്പ് മുഖ്യമന്ത്രി ഏറ്റെടുത്തതായിരുന്നു. മലപ്പുറത്തുനിന്നുള്ള വി അബ്ദുറഹ്മാനായിരിക്കും വകുപ്പെന്നായിരുന്നു ആദ്യ സൂചന. ന്യൂനപക്ഷക്ഷേമ വകുപ്പിന്റെ പദ്ധതികള്‍ കൂടുതലും മുസ്ലിം വിഭാഗങ്ങള്‍ക്കാണ് കിട്ടുന്നതെന്ന പരാതി ചില െ്രെകസ്തവ സഭാ അധ്യക്ഷന്മാര്‍ ഉന്നയിച്ചിരുന്നത് വകുപ്പ് മുഖ്യമന്ത്രി തന്നെ ഏറ്റെടുക്കാനുള്ള കാരണമാകാമെന്നാണ് വിലയിരുത്തല്‍. അതായത് തങ്ങള്‍ക്ക് ലഭിക്കേണ്ട പല പദ്ധതികളും െ്രെകസ്തവര്‍ തട്ടിയെടുക്കും എന്നാണ് ലീഗ് ആരോപിക്കുന്നത്.

ന്യൂനപക്ഷ അവകാശങ്ങള്‍ മുസ്ലീം മതവിഭാഗങ്ങള്‍ കവര്‍ന്നെടുക്കുന്നെന്ന ആരോപണവുമായി സിറോ മലബാര്‍ സഭയടക്കം അടുത്തയിടെ പരസ്യമായി രംഗത്തെത്തിയിരുന്നു. െ്രെകസ്തവ സഭകളുടെ രോഷത്തെ തണുപ്പിച്ച് അവരെ തങ്ങള്‍ക്കൊപ്പം നിര്‍ത്താനുളള പിണറായി സര്‍ക്കാരിന്റെ രാഷ്ടീയ നീക്കമായിട്ടുകൂടിയാണ് തീരുമാനം വിലയിരുത്തപ്പെടുന്നത്.

മുഖ്യമന്ത്രി ന്യൂനപക്ഷ വകുപ്പ് ഏറ്റെടുത്ത നടപടിയെ സ്വാഗതം ചെയ്ത് കെസിബിസി രംഗത്തെത്തിയത് ആരോപണങ്ങളെ കൂടുതല്‍ കരുത്തുറ്റതാക്കുന്നു. ദീര്‍ഘകാലമായുള്ള ആവശ്യത്തിന്റെ ഫലമാണിതെന്നും കത്തോലിക്കാ മെത്രാന്‍ സമിതി പറയുന്നു.

യു ഡിഎഫ് അധികാരത്തില്‍ വന്നാല്‍ ന്യൂനപക്ഷ ക്ഷേമ വകുപ്പ് പതിവായി ലീഗിനാണെന്നും അതുവഴി ന്യൂനപക്ഷ ആനൂകൂല്യങ്ങള്‍ അടക്കമുളളവ ഒരു പ്രത്യേക മതവിഭാഗം മാത്രം കൈവശപ്പെടുത്തുന്നുഎന്നുമായിരുന്നു ചങ്ങനാശ്ശേരി അതിരൂപതയടക്കം പലപ്പോഴായി ഉന്നയിച്ചത്. ഇതിന്റെ പേരിലാണ് സഭ യുഡിഎഫിനോട് അകന്നതും.


കഴിഞ്ഞ പിണറായി സര്‍ക്കാരിന്റെ കാലത്ത് ന്യൂനപക്ഷ ക്ഷേമ വകുപ്പ് കെ ടി ജലീലിന് നല്‍കിയതിലും സിറോ മലബാര്‍ സഭാ നേതൃത്വത്തിന് കടുത്ത അതൃപ്തി ഉണ്ടായിരുന്നു. ഏതു സര്‍ക്കാര്‍ വന്നാലും ന്യൂനപക്ഷ ക്ഷേമം ഒരു പ്രത്യേക മതവിഭാഗത്തിന് മാത്രമായി തീറെഴുതി കൊടുക്കുന്നു എന്നായിരുന്നു ആക്ഷേപം. ഈ പരാതി പരിഹരിക്കാനാണ് പുതിയ സര്‍ക്കാരില്‍ ന്യൂനപക്ഷക്ഷേമ വകുപ്പ് മുഖ്യമന്ത്രി തന്നെ കൈവശം വച്ചതെന്നാണ് സൂചന. തീരുമാനത്തെ സ്വാഗതം ചെയ്യുന്നുവെന്നും എന്നാല്‍ പരസ്യ പ്രതികരണത്തിനില്ലെന്നുമാണ് കെസിബിസി ഒഴികെയുള്ള മറ്റ് വിവിധ സഭാ കേന്ദ്രങ്ങളുടെ പ്രതീക്ഷ.

ന്യൂനപക്ഷ ക്ഷേമം എന്ന ചെറിയ വകുപ്പിനെ സംസ്ഥാന പ്രാധാന്യമുള്ള ഒരു വകുപ്പാക്കി മാറ്റാനാണ് മുഖ്യമന്ത്രി അത് ഏറ്റെടുത്തതെന്നാണ് ബി ജെ പിയുടെ അഭിപ്രായം. ജാതിയില്‍ തൊട്ട് കളിച്ചാല്‍ കേരളത്തില്‍ സാധാരണ കളി പാളാറുണ്ട്. അതാണ് രണ്ട് ദിവസം പ്രായമായ ഒരു മന്ത്രി സഭക്ക് സംഭവിച്ചുകൊണ്ടിരിക്കുന്നത്