പൊതുവിദ്യാലയങ്ങളില്‍ ഒന്നാംക്ലാസിലേക്കുള്ള പ്രവേശനത്തിനുള്ള ഓണ്‍ലൈന്‍ അപക്ഷാസമര്‍പ്പണത്തിന് തുടക്കമായി. മറ്റു ക്ലാസുകളിലേക്കുള്ള പ്രവേശനത്തിനുള്ള അപേക്ഷകള്‍ 26 മുതല്‍ നല്‍കാം.

കോവിഡ് സാഹചര്യം പരിഗണിച്ച് കഴിഞ്ഞ വര്‍ഷത്തേതുപോലെ ഇക്കുറിയും ഓണ്‍ലൈന്‍ പ്രവേശനമാണ് നടത്തുന്നത്.

സമ്പൂര്‍ണ പോര്‍ട്ടലിലൂടെയാണ് (sampoorna.kite.kerala.gov.in) ) ഓണ്‍ലൈന്‍ പ്രവേശന നടപടികള്‍. ഇതിനു പറ്റാത്തവര്‍ക്ക് ഫോണില്‍ ബന്ധപ്പെട്ടും പ്രവേശനം നേടാം. ടി.സി.ക്കുള്ള അപേക്ഷകളും ഓണ്‍ലൈന്‍ വഴി നല്‍കാം. ലോക്ഡൗണ്‍ പിന്‍വലിച്ചശേഷം സ്‌കൂളില്‍ രക്ഷിതാക്കള്‍ക്ക് നേരിട്ടെത്തിയും പ്രവേശനം തേടാം.

പ്രവേശനസമയത്ത് ഏതെങ്കിലും രേഖകള്‍ ഹാജരാക്കാന്‍ കഴിയാത്തവര്‍ക്ക് താത്കാലികപ്രവേശനം നല്‍കാം. ഇതരസംസ്ഥാനങ്ങള്‍, വിദേശരാജ്യങ്ങള്‍ എന്നിവിടങ്ങളില്‍നിന്നുവരുന്ന കുട്ടികള്‍ക്ക് ഇപ്രകാരം പ്രവേശനം നല്‍കാം. സാധാരണ സ്‌കൂള്‍പ്രവേശനത്തിനുള്ള അപേക്ഷാഫോറത്തിലെ വിവരങ്ങള്‍തന്നെയാണ് രക്ഷിതാക്കള്‍ ഓണ്‍ലൈനിലും നല്‍കേണ്ടത്. ആധാര്‍ നമ്പര്‍ രേഖപ്പെടുത്തണം.

ആധാറിന് അപേക്ഷിച്ചിട്ടില്ലെങ്കില്‍ ഇല്ല എന്നു രേഖപ്പെടുത്താം. അപേക്ഷിച്ചിട്ട് നമ്പര്‍ ലഭിക്കാന്‍ കാത്തിരിക്കുന്നവരാണെങ്കില്‍ എന്റോള്‍മെന്റ് ഐ.ഡി. നമ്പര്‍ നല്‍കണം.