ഭാര്യയെ ആത്മഹത്യക്ക് പ്രേരിപ്പിച്ച രാജന്‍ പി ദേവിന്റെ മകന്‍ ഉണ്ണി പി. രാജനെയും അമ്മയെയും രക്ഷിക്കാന്‍ ഉന്നത ഇടപെടലെന്ന് സൂചന.

പോലീസ് കൃത്യമായി ഇടപെട്ടിരുന്നെങ്കില്‍ ഉണ്ണി പി രാജന്റെ ഭാര്യ പ്രിയങ്കയുടെ ആത്മഹത്യ ഒഴിവാക്കാമായിരുന്നു. മേയ് 12 നാണ് പ്രിയങ്ക അത്മഹത്യ ചെയ്തത്. മേയ് 11 നാണ് ഗാര്‍ഹിക പീഡനം ആരോപിച്ച് പ്രിയങ്ക പോലീസില്‍ പരാതി നല്‍കിയത്.

സാധാരണ ഗാര്‍ഹിക പീഡന പരാതി കിട്ടിയാല്‍ അപ്പോള്‍ തന്നെ പോലീസ് ഇടപെടാറുണ്ട്. എന്നാല്‍ രാജന്‍ പി. ദേവിന്റെ മരുമകളുടെ പരാതി വാങ്ങി ഫയലില്‍ വയ്ക്കുകയായിരുന്നു പോലീസ് . പ്രസ്തുത പരാതിയില്‍ അപ്പോള്‍ തന്നെ പോലീസ് ആക്റ്റ് ചെയ്തിരുന്നെങ്കില്‍ പ്രിയങ്കക്ക് ആത്മഹത്യ ചെയ്യേണ്ടി വരില്ലായിരുന്നു.

മേയ് 12 ന് ആത്മഹത്യ നടന്നിട്ടും ഇതുവരെ പ്രതിയെ അറസ്റ്റ് ചെയ്യാന്‍ പോലിസ് ശ്രമിച്ചിട്ടില്ല. സി പി എമ്മുമായി ആഴത്തില്‍ ബന്ധമുള്ള കുടുംബമാണ് രാജന്‍ പി. ദേവിന്റെത്. അദ്ദേഹത്തിന്റെ മകനെയും ഭാര്യയെയും അറസ്റ്റ് ചെയ്യാന്‍ പോലീസിന് വിഷമം തോന്നുക സ്വാഭാവികം.

ഉണ്ണി പി.രാജന്‍ കോവിഡ് പോസിറ്റീവാണെന്നാണ് പോലീസിന്റെ വിശദീകരണം. എന്നാല്‍ പരാതി കിട്ടിയിട്ടും നടപടിയെടുക്കാത്തതെന്തെന്ന് പോലീസ് വിശദീകരിക്കുന്നില്ല.

കേസില്‍ പ്രതിചേര്‍ക്കപ്പെട്ട ഉണ്ണി പി.രാജന്‍ദേവും അമ്മയും കോവിഡ് പോസിറ്റിവായി വീട്ടില്‍ ക്വാറന്റീലാണെന്നും പ്രദേശം കണ്ടെയ്ന്‍മെന്റ് സോണിലാണെന്നും പോലീസ് പറഞ്ഞു. കോവിഡ് നെഗറ്റീവായി ക്വാറന്റീന്‍ പൂര്‍ത്തിയായാല്‍ ഇവരെ അറസ്റ്റ് ചെയ്യുമെന്നും ഇവര്‍ നിരീക്ഷണത്തിലാണെന്നും പോലീസ് വ്യക്തമാക്കി. കേസില്‍ പോലീസ് ശക്തമായ അന്വേഷണമാണ് നടത്തുന്നതെന്നാണ് പറയുന്നത്. എന്നാല്‍ തത്കാലം അറസ്റ്റ് വേണ്ടെന്നും ഹൈക്കോടതി അവര്‍ക്ക് ജാമ്യം നല്‍കുകയാണെങ്കില്‍ നല്‍കട്ടെ എന്നുമാണ് സി പി എം നല്‍കിയ നിര്‍ദ്ദേശമെന്നറിയുന്നു.

കായികാധ്യാപികയുമായിരുന്ന വെമ്പായം സ്വദേശി പ്രിയങ്ക(25) മെയ് പന്ത്രണ്ടിന് ബുധനാഴ്ചയാണ് വെമ്പായത്തെ വീട്ടില്‍ ജീവനൊടുക്കിയത്. ഭര്‍ത്താവിന്റെയും ഭര്‍തൃവീട്ടുകാരുടെയും പീഡനമാണ് പ്രിയങ്ക ജീവനൊടുക്കാന്‍ കാരണമെന്നാണ് വീട്ടുകാരുടെ പരാതി. സംഭവത്തില്‍ വട്ടപ്പാറ പോലീസ് കേസ് രജിസ്റ്റര്‍ ചെയ്തു. തുടര്‍ന്ന് നെടുമങ്ങാട് ഡിവൈ.എസ്.പി.യുടെ നേതൃത്വത്തിലുള്ള പോലീസ് സംഘം കേസ് ഏറ്റെടുത്ത് അന്വേഷണം തുടങ്ങി.

ജീവനൊടുക്കുന്നതിന് തലേദിവസം നടനും ഭര്‍ത്താവുമായ ഉണ്ണിക്കെതിരേ പ്രിയങ്ക വട്ടപ്പാറ പോലീസില്‍ പരാതി നല്‍കിയിരുന്നു. ഗാര്‍ഹിക പീഡനത്തിനിരയായെന്നും ഉണ്ണി നിരന്തരം ഉപദ്രവിച്ചെന്നും ചൂണ്ടിക്കാട്ടിയാണ് പ്രിയങ്ക പരാതി നല്‍കിയത്.

ഗാര്‍ഹിക പീഡനമെന്ന് പരാതി കിട്ടിയാല്‍ സാധാരണക്കാരാണെങ്കില്‍ ഉടന്‍ അകത്താവും.ഇത് മുന്തിയ ഇനം ആയതുകൊണ്ടാകാം നടപടിയുണ്ടാകാത്തത്.

അങ്കമാലിയില്‍ ഉണ്ണിയുടെ വീട്ടിലാണ് പ്രിയങ്കയും താമസിച്ചിരുന്നത്. ജീവനൊടുക്കുന്നതിന് രണ്ടുദിവസം മുമ്പ് പ്രിയങ്കയെ ഉപദ്രവിച്ച ശേഷം ഉണ്ണി വീട്ടില്‍നിന്ന് ഇറക്കിവിട്ടു. തുടര്‍ന്ന് പ്രിയങ്ക സഹോദരന്‍ വിഷ്ണുവിനെ വിളിച്ചുവരുത്തി സ്വന്തം വീട്ടിലേക്ക് വരികയായിരുന്നു. ഇതിനുപിന്നാലെയാണ് പോലീസ് സ്റ്റേഷനില്‍ പരാതി നല്‍കിയത്. ഇതിനുശേഷം വീട്ടിലെത്തിയ പ്രിയങ്കയ്ക്ക് മൊബൈലില്‍ ഒരുഫോണ്‍കോള്‍വന്നു. ഇതിനുപിന്നാലെയാണ് പ്രിയങ്ക കിടപ്പുമുറിയില്‍ തൂങ്ങിമരിച്ചത്.

വീട്ടില്‍നിന്ന് പുറത്താക്കിയ ശേഷം ഉണ്ണി പ്രിയങ്കയെ അസഭ്യം പറയുന്ന വീഡിയോ ദൃശ്യങ്ങള്‍ ബന്ധുക്കള്‍ പുറത്തുവിട്ടിരുന്നു. പ്രിയങ്ക സ്വന്തം മൊബൈല്‍ ഫോണില്‍ റെക്കോഡ് ചെയ്ത ദൃശ്യങ്ങളായിരുന്നു ഇത്. കേട്ടാലറയ്ക്കുന്ന ഭാഷയിലാണ് ഉണ്ണി ഭാര്യയെ തെറിവിളിക്കുന്നത്. ഇതെല്ലാം കേട്ട് പ്രിയങ്ക കരയുകയായിരുന്നു. ഇതിനൊപ്പം ഉണ്ണിയുടെ ആക്രമണത്തില്‍ പരിക്കേറ്റതിന്റെ പാടുകളും പ്രിയങ്ക ഫോണില്‍ റെക്കോഡ് ചെയ്തിരുന്നു. ഇതും ബന്ധുക്കള്‍ പുറത്തുവിട്ടിരുന്നു.

2019-ലാണ് പ്രിയങ്കയും ഉണ്ണിയും വിവാഹിതരായത്. കായിക അധ്യാപികയായിരുന്ന പ്രിയങ്കയും ഉണ്ണിയും പരിചയത്തിലാവുകയും പിന്നീട് വീട്ടുകാരുടെ സമ്മതപ്രകാരം വിവാഹിതരാവുകയുമായിരുന്നു. വിവാഹസമയത്ത് മുപ്പത് പവനോളമാണ് പ്രിയങ്കയുടെ വീട്ടുകാര്‍ നല്‍കിയത്. വിവാഹശേഷം വാഹനം വാങ്ങാനും ഫ്‌ളാറ്റ് വാങ്ങാനും പണം നല്‍കി. എന്നാല്‍ ഇതിനുശേഷവും ഉണ്ണി പി.രാജന്‍ദേവ് പണം ആവശ്യപ്പെട്ട് പ്രിയങ്കയെ നിരന്തരം മര്‍ദിച്ചിരുന്നതായാണ് വീട്ടുകാരുടെ ആരോപണം.

അന്തരിച്ച നടന്‍ രാജന്‍ പി.ദേവിന്റെ മകനാണ് ഉണ്ണി പി.രാജന്‍ദേവ്. രക്ഷാധികാരി ബൈജു,കാറ്റ്, ആട് 2 തുടങ്ങിയ സിനിമകളിലും സീരിയലുകളിലും ഉണ്ണി അഭിനയിച്ചിട്ടുണ്ട്.