പതിനഞ്ചാം കേരള നിയമസഭയുടെ ആദ്യ സമ്മേളനം ആരംഭിച്ചു.... ആദ്യം സത്യപ്രതിജ്ഞ ചെയ്ത് അബ്ദുള്‍ ഹമീദ് മാസ്റ്റര്‍.... സത്യപ്രതിജ്ഞ അക്ഷരമാലാക്രമത്തില്‍.... ഇരിപ്പിടങ്ങള്‍ തയ്യാറാക്കിയിട്ടുള്ളത് സാമൂഹിക അകലം പാലിച്ച്

പതിനഞ്ചാം കേരള നിയമസഭയുടെ ആദ്യ സമ്മേളനം ആരംഭിച്ചു.... ആദ്യം സത്യപ്രതിജ്ഞ ചെയ്ത് അബ്ദുള്‍ ഹമീദ് മാസ്റ്റര്‍..സത്യപ്രതിജ്ഞ അക്ഷരമാലാക്രമത്തിലാണ്.

എംഎല്‍എമാരുടെ സത്യപ്രതിജ്ഞയാണ് ഇന്നത്തെ കാര്യപരിപാടി. 53 പുതുമുഖങ്ങള്‍ക്ക് ഇന്ന് യഥാര്‍ഥത്തില്‍ പ്രവേശനോത്സവമാണ്. രാവിലെ ഒമ്പത് മണിമുതല്‍ പ്രോടെം സ്പീക്കര്‍ പി.ടി.എ. റഹീമിനു മുമ്പാകെയാണ് അംഗങ്ങളുടെ സത്യപ്രതിജ്ഞ. അക്ഷരമാലാക്രമത്തിലാണ് അംഗങ്ങളെ വിളിക്കുന്നതും സത്യപ്രതിജ്ഞ ചെയ്യുന്നതും. സാമൂഹിക അകലം പാലിച്ചാണ് ഇരിപ്പിടങ്ങള്‍ തയ്യാറാക്കിയിട്ടുള്ളത്.


പതിനഞ്ചാം നിയമസഭയിലെ ആദ്യ എംല്‍എ സത്യപ്രതിജ്ഞ ചെയ്തു. അബ്ദുള്‍ ഹമീദ് മാസ്റ്റര്‍ അള്ളാഹുവിന്റെ നാമത്തില്‍ സത്യപ്രതിജ്ഞ ചെയ്തു. ആബിദ് ഹുസൈന്‍ തങ്ങള്‍ രണ്ടാമത് സത്യപ്രതിജ്ഞ ചെയ്തു.

നിയമസഭയില്‍ അംഗമായി സത്യപ്രതിജ്ഞ ചെയ്യുന്ന മന്ത്രിസഭയിലെ ആദ്യ അംഗമായി അഹമ്മദ് ദേവര്‍ കോവില്‍. കോഴിക്കോട് സൗത്തില്‍ നിന്നായിരുന്നു വിജയം. എം കെ അക്ബര്‍ നാലാമതായി സത്യപ്രതിജ്ഞ ചെയ്തു


അഞ്ചാമത് മഞ്ഞളാംകുഴി അലി സത്യപ്രതിജ്ഞ ചെയ്തു. ദൈവനാമത്തിലായിരുന്നു സത്യപ്രതിജ്ഞ. ഒ എസ് അംമ്പിക ആറാമതായി സത്യപ്രതിജ്ഞ ചെയ്തു. 15ആം നിയമസഭയില്‍ സത്യപ്രതിജ്ഞ ചെയ്യുന്ന ആദ്യ വനിത.




മന്ത്രി ജി ആര്‍ അനില്‍ ഏഴാമതായി സത്യപ്രതിജ്ഞ ചെയ്തു. എ പി അനില്‍ കുമാര്‍ എട്ടാമത്. അനൂപ് ജേക്കബ് ഒമ്പതാമതായി സത്യപ്രതിജ്ഞ ചെയ്തു. കെ ആന്‍സലന്‍ പത്താമത് സത്യപ്രതിജ്ഞ ചെയ്തു. പതിനൊന്നാമത് ആന്റണി ജോണ്‍ സത്യപ്രതിജ്ഞ ചെയ്തു.



അതേസമയം കോവിഡ് ബാധയും ക്വാറന്റീനും കാരണം ചില അംഗങ്ങള്‍ക്ക് തിങ്കളാഴ്ച സത്യപ്രതിജ്ഞ ചെയ്യാനാവില്ല. കെ. ബാബു, എ. വിന്‍സെന്റ് എന്നിവര്‍ എത്താനാവില്ലെന്ന് അറിയിച്ചിട്ടുണ്ട്. ഇവരുടെ സത്യപ്രതിജ്ഞ പിന്നീട് നടക്കും.

ചൊവ്വാഴ്ചയാണ് സ്പീക്കര്‍ തിരഞ്ഞെടുപ്പ്. നാമനിര്‍ദേശ പത്രിക തിങ്കളാഴ്ച ഉച്ചവരെ നല്‍കാം. ഭരണമുന്നണി സ്ഥാനാര്‍ഥി എം.ബി. രാജേഷാണ്. സ്പീക്കര്‍ തെരഞ്ഞെടുപ്പില്‍ യുഡിഎഫ് മത്സരിക്കും. വിഷ്ണുനാഥ് സ്പീക്കര്‍ സ്ഥാനാര്‍ത്ഥി.

26-നും 27-നും സഭ ചേരില്ല. 28-ന് ഗവര്‍ണര്‍ ആരിഫ് മുഹമ്മദ് ഖാന്‍ നയപ്രഖ്യാപനം നടത്തും. ജനുവരി 21-നായിരുന്നു കഴിഞ്ഞ സര്‍ക്കാരിന്റെ അവസാന നയപ്രഖ്യാപനം. സര്‍ക്കാര്‍ തുടരുന്നതിനാല്‍ ആ പ്രഖ്യാപനങ്ങള്‍തന്നെ ആവര്‍ത്തിക്കുമോ, പുതിയ പരിപാടികള്‍ പ്രഖ്യാപിക്കുമോ എന്നാണ് അറിയാനുള്ളത്.

പുതുക്കിയ ബജറ്റ് ധനമന്ത്രി കെ.എന്‍. ബാലഗോപാല്‍ ജൂണ്‍ നാലിന് അവതരിപ്പിക്കും. ജൂണ്‍ 14 വരെ 14 ദിവസം സമ്മേളനത്തിന് തീരുമാനിച്ചിട്ടുണ്ടെങ്കിലും കോവിഡ് സാഹചര്യം വിലയിരുത്തിയാവും കാര്യങ്ങള്‍.

പതിന്നാലാം കേരളനിയമസഭയിലെ 75 പേര്‍ വീണ്ടും തിരഞ്ഞെടുക്കപ്പെട്ടിട്ടുണ്ട്. അതിനു മുമ്പുള്ള മറ്റു നിയമസഭകളില്‍ അംഗമായിരുന്ന 12 പേരും ഈ സഭയിലുണ്ട്. ഉമ്മന്‍ചാണ്ടിയാണ് സീനിയര്‍. അദ്ദേഹം 12-ാം തവണയാണ് തുടര്‍ച്ചയായി സഭയിലെത്തുന്നത്.