ഭര്ത്തൃഗൃഹത്തില് അടുക്കളയോടു ചേര്ന്ന ഭാഗത്ത് എസ്.ബി.ഐ. ഡെപ്യൂട്ടി മാനേജരായ യുവതിയെ തൂങ്ങിമരിച്ചനിലയില്....
ഭര്ത്തൃഗൃഹത്തില് അടുക്കളയോടു ചേര്ന്ന ഭാഗത്ത് എസ്.ബി.ഐ. ഡെപ്യൂട്ടി മാനേജരായ യുവതിയെ തൂങ്ങിമരിച്ചനിലയില് കണ്ടെത്തി. ഉമയനല്ലൂര് പേരയം വൃന്ദാവനത്തില് വി.എസ്.ഗോപുവിന്റെ ഭാര്യ എസ്.എസ്.ശ്രീജ(32)യാണ് മരിച്ചത്.
കൊല്ലം ആനന്ദവല്ലീശ്വരം എസ്.ബി.ഐ.യില് ഡെപ്യൂട്ടി മാനേജരായിരുന്നു. തിരുവനന്തപുരം പൂജപ്പുര തമലം കൃഷ്ണഭവനില് ആര്.ശ്രീകണ്ഠന്റെയും സരസ്വതിയുടെയും മകളാണ്. അഞ്ചുവര്ഷംമുന്പായിരുന്നു വിവാഹം.
ഇന്നലെ രാത്രി എട്ടുമണിയോടെയാണ് വീട്ടിനുള്ളില് തൂങ്ങിനില്ക്കുന്നനിലയില് ശ്രീജയെ കണ്ടത്. ഉടന്തന്നെ കൊട്ടിയത്ത് സ്വകാര്യ ആശുപത്രിയില് എത്തിച്ചെങ്കിലും മരിച്ചിരുന്നു.
ഭര്ത്താവ് ഗോപു ഏഴുമണിയോടെ പാല് വാങ്ങാന് പുറത്തു പോയിരുന്നതായാണ് പോലീസിനു നല്കിയ മൊഴി. മടങ്ങിയെത്തിയപ്പോഴാണ് വര്ക്ക് ഏരിയയില് തൂങ്ങിനില്ക്കുന്നനിലയില് കണ്ടത്. ഉടന്തന്നെ നാട്ടുകാരുടെ സഹായത്തോടെ ആശുപത്രിയില് എത്തിക്കുകയായിരുന്നു.
ഗോപുവിന്റെ പ്രായംചെന്ന അച്ഛന് മാത്രമായിരുന്നു വീട്ടിലുണ്ടായിരുന്നത്. തിങ്കളാഴ്ച ആര്.ഡി.ഒ.യുടെ സാന്നിധ്യത്തില് ഇന്ക്വസ്റ്റ് നടപടികള് പൂര്ത്തിയാക്കി. തിരുവനന്തപുരം മെഡിക്കല് കോളേജ് ആശുപത്രിയില് നടത്തിയ സ്രവപരിശോധനയില് കോവിഡ് സ്ഥിരീകരിച്ചു. മൂന്നുമാസംമുന്പ് കോവിഡ് ബാധിച്ചെങ്കിലും ചികിത്സയ്ക്കുശേഷം കോവിഡ് മുക്തയായിരുന്നു.
ചൊവ്വാഴ്ച തിരുവനന്തപുരം മെഡിക്കല് കോളേജ് ആശുപത്രിയില് പോസ്റ്റ്മോര്ട്ടം നടത്തി. വൈകീട്ട് അഞ്ചിന് തിരുവനന്തപുരം ശാന്തികവാടത്തില് കോവിഡ് മാനദണ്ഡങ്ങള് പാലിച്ച് സംസ്കാരം നടത്തി.
https://www.facebook.com/Malayalivartha