സ്ത്രീധന പീഡനവുമായി ബന്ധപ്പെട്ട വിഷയങ്ങള് ഗൗരവമായി കണ്ട് കുറ്റവാളികള്ക്ക് കടുത്ത ശിക്ഷ ഉറപ്പാക്കുമെന്നു മുഖ്യമന്ത്രി.... പരാതി നല്കാന് സംവിധാനം.... ആര്.നിശാന്തിനി നോഡല് ഓഫീസര്
സ്ത്രീധന പീഡനവുമായി ബന്ധപ്പെട്ട വിഷയങ്ങള് ഗൗരവമായി കണ്ട് കുറ്റവാളികള്ക്ക് കടുത്ത ശിക്ഷ ഉറപ്പാക്കുമെന്നു മുഖ്യമന്ത്രി പിണറായി വിജയന്. സംസ്ഥാനത്തിന്റെ ചില ഭാഗങ്ങളില് ഈയടുത്ത ദിവസങ്ങളിലുണ്ടായ സംഭവങ്ങളുടെ പശ്ചാത്തലത്തിലാണ് മുഖ്യമന്ത്രി ഇങ്ങനെ പറഞ്ഞത്.
സ്ത്രീധനവുമായി ബന്ധപ്പെട്ട പരാതികളും പ്രശ്നങ്ങളും അന്വേഷിക്കുന്നതിന് പത്തനംതിട്ട ജില്ലാ പോലീസ് മേധാവി ആര്. നിശാന്തിനിയെ സ്റ്റേറ്റ് നോഡല് ഓഫീസര് ആയി നിയോഗിച്ചിട്ടുണ്ട്.
ഒരു വനിതാ എസ്ഐ അവരെ സഹായിക്കും. 9497999955 എന്ന നമ്പറില് ബുധനാഴ്ച മുതല് പരാതികള് അറിയിക്കാം. ഏതു പ്രായത്തിലുമുളള വനിതകള് നല്കുന്ന പരാതികള്ക്ക് മുന്തിയ പരിഗണന നല്കി പരിഹാരം ഉണ്ടാക്കാന് ജില്ലാ പോലീസ് മേധാവിമാര്ക്ക് നിര്ദേശം നല്കിയിട്ടുണ്ട്.
വനിതകള്ക്കെതിരെയുളള അതിക്രമങ്ങള് തടയുന്നതിനു ജില്ലകളില് നിലവിലുള്ള ഡൊമസ്റ്റിക് കണ്ഫ്ളിക്റ്റ് റെസല്യൂഷന് സെന്റര് സംവിധാനം കാര്യക്ഷമമായി നടപ്പിലാക്കാനും പരാതികളില് അടിയന്തിര നടപടി സ്വീകരിക്കാനും സംസ്ഥാന പോലീസ് മേധാവിക്ക് നിര്ദേശം നല്കി.
വനിതകള് നേരിടുന്ന സൈബര് അതിക്രമങ്ങള് സംബന്ധിച്ച പരാതികള് സ്വീകരിക്കുന്നതിനും പരിഹാരം കണ്ടെത്തുന്നതിനും അപരാജിത ഓണ്ലൈന് എന്ന സംവിധാനം ഇപ്പോള് നിലവിലുണ്ട്.
സ്ത്രീധനവുമായി ബന്ധപ്പെട്ട അതിക്രമങ്ങള് ഉള്പ്പെടെയുളള ഗാര്ഹിക പീഡനങ്ങള് സംബന്ധിച്ച് പരാതികള് നല്കുന്നതിന് ഇനി മുതല് ഈ സംവിധാനം ഉപയോഗിക്കാവുന്നതാണ്. ഇത്തരം പരാതികളുളളവര്ക്ക് aparajitha.pol@kerala.gov.in എന്ന വിലാസത്തിലേക്ക് മെയില് അയയ്ക്കാം. ഈ സംവിധാനത്തിലേക്കു വിളിക്കാനുള്ള മൊബൈല് നന്പര് 9497996992 നാളെ നിലവില് വരും.
കൂടാതെ പോലീസ് ആസ്ഥാനത്ത് 24 മണിക്കൂറും പ്രവര്ത്തിക്കുന്ന സംസ്ഥാന പോലീസ് മേധാവിയുടെ കണ്ട്രോള് റൂമിലും പരാതികള് അറിയിക്കാം.
"
https://www.facebook.com/Malayalivartha
