കഴിഞ്ഞ ദിവസം സ്ത്രീധന പീഡനത്തില്‍ മരണമടഞ്ഞ വിസ്മയയുടെ മരണത്തില്‍ പ്രതികരണവുമായി നിരവധി താരങ്ങൾ രംഗത്ത് എത്തിയിരുന്നു. കൂടാതെ ഈ സംഭവത്തില്‍ സ്ത്രീധനം സംബന്ധിച്ചും, ഭര്‍ത്യപീഡനം സംബന്ധിച്ചും വലിയ ചര്‍ച്ചകളാണ് സമൂഹ മാധ്യമങ്ങളില്‍ നടന്നുകൊണ്ടിരിക്കുന്നത്.നിരവധി ആളുകളാണ് പ്രതികരണവുമായി മുന്നോട്ട് വരുന്നത്.

ഇപ്പോളിതാ, മാതാപിതാക്കള്‍ക്കുള്ള ഒരു മുന്നറിയിപ്പ് പോലെ ഒരു കുറിപ്പാണ് ഗായിക സിത്താര കൃഷ്ണ കുമാര്‍ ഫേസ്ബുക്കില്‍ കുറിപ്പ് പങ്കുവെച്ചിരിക്കുന്നത്. കല്യാണത്തിനായി സ്വർണം വാങ്ങില്ലെന്ന് നിങ്ങൾ ഉറപ്പിച്ചു പറയൂ , സ്ത്രീധനം ചോദിക്കുന്നവരെ ജീവിതത്തിൽ വേണ്ടെന്ന് പറയൂ, പഠിപ്പും ജോലിയും,പിന്നെ അതിലേറെ സന്തോഷവും സമാധാനവുമാണ് വലുതെന്ന് ഉറക്കെ പറയൂ എന്ന് കുറിപ്പിലൂടെ താരം വ്യക്തമാക്കുന്നുണ്ട്.

സിത്താര കൃഷ്ണ കുമാറിന്റെ ഫേസ്ബുക്ക് കുറിയ്പ്പിന്റെ പൂർണരൂപം:

പെൺകുഞ്ഞുങ്ങളെ പഠിക്കാൻ അനുവദിക്കൂ, യാത്ര ചെയ്യാൻ അനുവദിക്കൂ, സഹിക്കൂ, ക്ഷമിക്കൂ എന്നുപറഞ്ഞു പഠിപ്പിക്കലല്ല വേണ്ടത്!! ഉള്ളതും ഇല്ലാത്തതുമായ പണംകൊണ്ട് സ്വർണവും പണവും ചേർത്ത് കൊടുത്തയക്കൽ തെറ്റാണെന്ന് എത്ര തവണ പറയണം!! പ്രിയപ്പെട്ട പെൺകുട്ടികളെ....
കല്യാണത്തിനായി സ്വർണം വാങ്ങില്ലെന്ന് നിങ്ങൾ ഉറപ്പിച്ചു പറയൂ , സ്ത്രീധനം ചോദിക്കുന്നവരെ ജീവിതത്തിൽ വേണ്ടെന്ന് പറയൂ, പഠിപ്പും ജോലിയും,പിന്നെ അതിലേറെ സന്തോഷവും സമാധാനവുമാണ് വലുതെന്ന് ഉറക്കെ പറയൂ!!! കല്യാണമല്ല ജീവിതത്തിന്റെ ഒരേയൊരു ലക്ഷ്യം!!