അലങ്കാരമീനുകളെ വളര്‍ത്തുന്ന വീട്ടുമുറ്റത്തെ കുളത്തില്‍ വീണ് ഒരു വയസുള്ള കുഞ്ഞ് മരണപെട്ടു. കൊല്ലം അഞ്ചല്‍ പാലമുക്കില്‍ താമസിക്കുന്ന വിഷ്ണു, ശ്രുതി ദമ്ബതികളുടെ മകന്‍ ശ്രേയസാണു മരിച്ചത്. കുഞ്ഞിന്റെ അച്ഛന്‍ വിഷ്ണു അലങ്കാരമത്സ്യങ്ങളുടെ വിൽപ്പനയാണ് നടത്തുന്നത്.

ശ്രേയസ് തൊട്ടിലില്‍ കിടന്നുറങ്ങുന്നത് കണ്ടിട്ടാണ് അമ്മ ശ്രുതി വീടിന് പുറത്തേക്കിറങ്ങിയത്. വിഷ്ണുവിന് ചോറുകൊടുക്കാനായാണ് ശ്രുതി വീടിന് പുറത്തേക്ക് പോയത്. ഈ സമയത്ത് വിഷ്ണുവിന്റെ അമ്മ ജലജ വീടിനുള്ളിലുണ്ടായിരുന്നു.

തൊട്ടിലില്‍ കിടന്നുറങ്ങുകയായിരുന്ന കുഞ്ഞ് പക്ഷേ ഉറക്കമുണര്‍ന്നത് ആരും അറിഞ്ഞില്ല. കുഞ്ഞ് വീടിന് പുറത്തേക്കിറങ്ങി. തൊട്ടിലില്‍നിന്ന് കുഞ്ഞിനെ കാണാതായപ്പോള്‍ നടത്തിയ അന്വേഷണത്തിലാണ് കുളത്തില്‍ കുഞ്ഞിനെ കണ്ടെത്തിയത്.

ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. ലോക്ഡൗണ്‍ കാലത്ത് ഉപജീവനമായാണ് മീന്‍വളര്‍ത്തലും അലങ്കാര മീന്‍കുഞ്ഞുങ്ങളുടെ വില്‍പ്പനയും വിഷ്ണു തുടങ്ങിയത്. ടാര്‍പ്പോളിന്‍ കൊണ്ട് വീടിനോട് ചേര്‍ന്നുതന്നെയാണ് കുളം നിർമ്മിച്ചിരിക്കുന്നത്.