പാലക്കാട് യുവതി പൊള്ളലേറ്റ് മരണപ്പെട്ട സംഭവത്തിൽ ഭർത്താവിനെതിരെ ഗുരുതര ആരോപണങ്ങളുമായി ബന്ധുക്കൾ രംഗത്ത്. കാരപ്പാട് സ്വദേശി ശ്രീജിത്തിന്റെ ഭാര്യ ശ്രുതിയാണ് മരിച്ചത്. മകളെ മണ്ണെണ്ണയൊഴിച്ച്‌ തീകൊളുത്തി കൊന്നതാണെന്ന് പിതാവ് ശിവന്‍ പറഞ്ഞു.

'ഇരുവരും തമ്മില്‍ നേരത്തെ ചില പ്രശ്‌നങ്ങള്‍ ഉണ്ടായിരുന്നു.ശ്രീജിത്തിന് മറ്റൊരു സ്ത്രീയുമായി ബന്ധമുണ്ട്. ശ്രുതി ഇത് ചോദ്യം ചെയ്തതോടെയാണ് പ്രശ്‌നമുണ്ടായത്. ഇത് സംബന്ധിച്ചുള്ള തര്‍ക്കമാണ് കൊലപാതകത്തില്‍ കലാശിച്ചതെന്നാണ്' കുടുംബത്തിന്റെ ആരോപണം.

വിശദമായ അന്വേഷണം ആവശ്യപ്പെട്ട് പൊലീസില്‍ പരാതി നല്‍കുമെന്ന് ശ്രുതിയുടെ പിതാവ് വ്യക്തമാക്കി. സംഭവത്തില്‍ അസ്വഭാവിക മരണത്തിന് പൊലീസ് നേരത്തെ കേസെടുത്തിരുന്നകേസ് രജിസ്റ്റർ ചെയ്തതായിരുന്നു. യുവതിയുടെ മരണമൊഴിയും രേഖപ്പെടുത്തിയിട്ടുണ്ടെന്നാണ്സൂചനകൾ.

ജൂണ്‍ 18നാണ് ശ്രീജിത്തിന്റെ കിഴക്കഞ്ചേരിയിലെ വീട്ടില്‍ ശ്രുതിയെ പൊള്ളലേറ്റ നിലയില്‍ കണ്ടെത്തിയത്. ശ്രീജിത്ത് തന്നെയാണ് യുവതിയെ ആശുപത്രിയിലേക്ക് കൊണ്ടുപോയത്. തൃശൂര്‍ മെഡിക്കല്‍ കോളേജില്‍ ചികിത്സയിലിരിക്കെ കഴിഞ്ഞ തിങ്കളാഴ്ചയാണ് ശ്രുതി മരണത്തിന് കീഴടങ്ങിയത്.

മംഗലംഡാം ഒലിംകടവ് കുന്നത്ത് വീട്ടില്‍ ശിവന്‍ - മേരി ദമ്പതികളുടെ മകളാണ് ശ്രുതി. 12 വര്‍ഷം മുമ്പാണ് ശ്രുതിയും ശ്രീജിത്തും തമ്മില്‍ വിവാഹിതരായത്. ഇരുവർക്കും രണ്ടുമക്കളാണുള്ളത്.