സ്ത്രീപീഡന പരാതി അറിയിക്കാനുള്ള ചാനല്‍ പരിപാടിയില്‍ യുവതിയോട് ക്ഷുഭിതയായി പെരുമാറിയ വനിതാ കമ്മീഷന്‍ അധ്യക്ഷ എം സി ജോസഫൈനെതിരെ വ്യാപക പ്രതിഷേധം ഉയരുന്നു. ഇപ്പോളിതാ, സി.പി.എം അനുകൂല ഫേസ്ബുക് പേജായ പോരാളി ഷാജിയും വനിതാ കമ്മീഷന്‍ അധ്യക്ഷക്കെതിരെ രംഗത്തുവന്നിരിക്കുകയാണ്.

ഇത്രയും ക്ഷമയില്ലാത്ത, ബ്രൂട്ടലായി സംസാരിക്കുന്ന ഒരു സ്ത്രീയെ വനിതാ കമ്മീഷനായി നിയമിച്ച സര്‍ക്കാര്‍ അടിയന്തിരമായി ആ തെറ്റ് തിരുത്തണം.പോരാളി ഷാജി ഫേസ്ബുക്ക് കുറിപ്പിലൂടെ പറഞ്ഞു. ദുരിതം അനുഭവിക്കുന്ന സ്ത്രീകള്‍ക്ക് ഒരു വാക്കുകൊണ്ടുപോലും ആശ്വാസം നല്‍കാന്‍ കഴിയാത്ത ജോസഫൈന് വനിതാ കമ്മീഷന്‍ എന്ന മഹത്തായ പദവിയില്‍ ഇരിക്കാന്‍ അര്‍ഹതയല്ല എന്നും പോരാളി ഷാജി കുറിച്ചു.

പോരാളി ഷാജിയുടെ ഫേസ്ബുക്ക് കുറിപ്പ് വായിക്കാം:

വനിതാ കമ്മീഷന്‍ ആണുപോലും...

ഇത്രയും ക്ഷമയില്ലാത്ത, ബ്രൂട്ടലായി സംസാരിക്കുന്ന ഒരു സ്ത്രീയെ വനിതാ കമ്മീഷനായി നിയമിച്ച സര്‍ക്കാര്‍ അടിയന്തിരമായി ആ തെറ്റ് തിരുത്തണം.

എം സി ജോസഫൈന്‍ അവരുടെ രാഷ്ട്രീയ ജീവിതത്തില്‍ ഒരുപാട് കഷ്ടപ്പാടുകളും ത്യാഗങ്ങളും അനുഭവിച്ചു വളര്‍ന്നുവന്നതാണ്. അങ്ങനെയാണ് അവര്‍ പാര്‍ട്ടിയുടെ സംസ്ഥാന കമ്മറ്റിയില്‍ എത്തിയത്.

പക്ഷേ ദുരിതം അനുഭവിക്കുന്ന സ്ത്രീകള്‍ക്ക് തന്റെ ഒരു വാക്കുകൊണ്ടുപോലും ആശ്വാസം നല്‍കാന്‍ കഴിയാത്ത അവര്‍ വനിതാ കമ്മീഷന്‍ എന്ന മഹത്തായ പദവിയില്‍ ഇരിക്കാന്‍ അര്‍ഹതയല്ല എന്നുപറയേണ്ടി വരുന്നതില്‍ വിഷമമുണ്ട്.

വനിതാ കമ്മീഷനിലേക്ക് പരാതി പറയാന്‍ വിളിക്കുന്നവരെല്ലാം അതിന്റെ നിയമം വ്യവസ്ഥകള്‍ അറിയണമെന്നില്ല.

പോലീസ് സ്റ്റേഷനില്‍ പരാതി കൊടുക്കാഞ്ഞത് ഒരു മഹാ അപരാധമായി പോയി. അതുകൊണ്ട് പീഡനമെല്ലാം നിങ്ങള്‍ സഹിച്ചോ എന്നുപറയുന്നതിന്റ യുക്തി എന്താണാവോ?

ഇത്തരത്തില്‍ പെരുമാറുന്ന ഒരു കമ്മീഷന്റെ മുന്നില്‍ പരാതിയുമായി പോകുന്നതിനേക്കാള്‍ നല്ലത് ഭര്‍ത്താവിന്റെ തല്ലുകൊണ്ട് ചാകുന്നതാണ്, അല്ലെങ്കില്‍ ആത്മഹത്യ ചെയ്യുന്നതാണ് നല്ലതെന്ന് ആര്‍ക്കെങ്കിലും തോന്നിയാല്‍ അവരെ കുറ്റപ്പെടുത്താന്‍ കഴിയില്ല...