പിറവത്ത് കള്ളനോട്ട് നിര്‍മ്മാണ സംഘത്തെ പിടികൂടിയ സംഭവത്തില്‍ മുഖ്യസൂത്രധാരന്‍ അറസ്റ്റിലായി. കള്ളനോട്ട് അച്ചടിക്കാന്‍ നേതൃത്വം നല്‍കിയ പത്തനംതിട്ട കോന്നി സ്വദേശി മധുസൂദനന്‍ ആണ് പിടിയിലായത്. അങ്കമാലിയില്‍ നിന്നാണ് പോലീസ് സംഘം ഇയാളെ പിടികൂടിയത്.

മദ്ധ്യകേരളത്തിലെ വിവിധ ജില്ലകളില്‍ കള്ളനോട്ട് വിതരണം നടത്തിയ റാക്കറ്റാണ് പിറവത്ത് പിടിയിലായത്. തീവ്രവാദ വിരുദ്ധ സേനയും പോലീസും സംയുക്തമായി നടത്തിയ പരിശോധനയിലാണ് ആറംഗ സംഘം പിടിയിലായത്. ഇവരില്‍ നിന്നും ഏഴര ലക്ഷം രൂപയുടെ കള്ളനോട്ടും നോട്ട് അച്ചടിക്കുന്ന ഉപകരണങ്ങളും പോലീസ് കസ്റ്റ്ഡിയിലെടുത്തിരുന്നു.

15 ലക്ഷം രൂപയുടെ കള്ളനോട്ടുകള്‍ വിവിധ ഇടങ്ങളിലായി ചെലവഴിച്ചിട്ടുണ്ടെന്നും സംഘം പോലീസിന് മൊഴി നല്‍കി. ഉദയംപേരൂര്‍ കള്ളനോട്ട് കേസുമായി ബന്ധപ്പെട്ട് സംസ്ഥാന പോലീസിലെ തീവ്രവാദ വിരുദ്ധ സേന നടത്തുന്ന അന്വേഷണത്തിനിടെയാണ് പിറവത്തും കള്ളനോട്ട് സംഘമുണ്ടെന്ന വിവരം ലഭിക്കുന്നത്. തുടര്‍ന്ന് ഇന്ന് പുലര്‍ച്ചെയോടെയാണ് അന്വേഷണ സംഘം വീട്ടിലെത്തി പ്രതികളെ പിടികൂടിയത്.

വണ്ടിപ്പെരിയാര്‍ സ്വദേശിയായ സ്റ്റീഫന്‍ ആനന്ദ്, നെടുങ്കണ്ടം സ്വദേശി സുനില്‍കുമാര്‍, കോട്ടയം സ്വദേശി ഫൈസല്‍, തൃശൂര്‍ പീച്ചി സ്വദേശി ജിബി എന്നിവരെ സംഭവസ്ഥലത്തുവെച്ച്‌ അറസറ്റു ചെയ്തു. നിര്‍മ്മാണ കരാറുകാരെന്ന വ്യാജേന ഏഴുമാസം മുമ്ബാണ് ഇവര്‍ വീട് വാടകയ്‌ക്ക് എടുത്തത്.