ശബരിമലയില് ചിങ്ങമാസ പൂജകളുടെ ഭാഗമായി ഇന്നുമുതല് മൂന്നു ദിവസം ഭക്തര്ക്ക് ഓണസദ്യ.... ദേവസ്വം ജീവനക്കാരുടെ വകയാണ് തിരുവോണ ദിവസത്തെ സദ്യ, 23 ന് രാത്രി നട അടയ്ക്കും.... കന്നിമാസ പൂജകള്ക്കായി സെപ്തംബര് 16 ന് തുറക്കും
ശബരിമലയില് ചിങ്ങമാസ പൂജകളുടെ ഭാഗമായി ഇന്നുമുതല് മൂന്നു ദിവസം ഭക്തര്ക്ക് ഓണസദ്യ. ഇന്നു രാവിലെ 11 മുതല് മേല്ശാന്തി വി.കെ. ജയരാജ് പോറ്റിയുടെ വകയായാണ് ഉത്രാടദിന സദ്യ. ദേവസ്വം ജീവനക്കാരുടെ വകയാണ് തിരുവോണ ദിവസത്തെ സദ്യ. 22 ന് പൊലീസുകാരുടെ വകയാണ് ഓണസദ്യ.
ഇന്നലെ ഉച്ചപൂജയ്ക്ക് മുന്നോടിയായി കളഭാഭിഷേകം നടന്നു. കിഴക്കേ മണ്ഡപത്തില് തന്ത്രിയുടെ മുഖ്യ പരികര്മ്മി മനു നമ്ബൂതിരി ബ്രഹ്മകലശം പൂജിച്ചു. തുടര്ന്ന് ആഘോഷപൂര്വം പ്രദക്ഷിണം നടത്തി ശ്രീകോവിലില് എത്തിച്ചു.
അയ്യപ്പഭക്തര് ശരണംമുഴക്കി കാത്തുനില്ക്കെ കളഭം വിഗ്രഹത്തില് അഭിഷേകംചെയ്തു. ഉച്ചപൂജ, ഉദയാസ്തമയപൂജ, പടിപൂജ എന്നിവയും ഉണ്ടായിരുന്നു. 23 ന് രാത്രി നട അടയ്ക്കും. കന്നിമാസ പൂജകള്ക്കായി സെപ്തംബര് 16 ന് തുറക്കും.
അതേസമയം ഗുരുവായൂര് ക്ഷേത്രത്തില് ഉത്രാടക്കാഴ്ചക്കുല സമര്പ്പണം ഇന്ന് നടക്കും. രാവിലെ ശീവേലിക്ക് ശേഷം കൊടിമരച്ചുവട്ടില് അരിമാവണിഞ്ഞ തറയില് നാക്കിലവെച്ചാണ് കാഴ്ചക്കുല സമര്പ്പണം.
ക്ഷേത്രം മേല്ശാന്തി തിയ്യൂര് ശങ്കരനാരായണ പ്രമോദ് നമ്ബൂതിരി ഭഗവാനെ പ്രാര്ത്ഥിച്ച് ആദ്യകാഴ്ച്ചക്കുല സമര്പ്പിക്കും. തുടര്ന്ന് ഭക്തര് കാഴ്ച്ചക്കുല സമര്പ്പിക്കും. ആയിരത്തോളം പഴക്കുലകളാണ് കാഴ്ച്ചക്കുലകളായെത്തുക പതിവ്. ലഭിക്കുന്ന പഴക്കുലകളില് ഒരു വിഹിതം തിരുവോണത്തിന് പഴംപ്രഥമന് തയ്യാറാക്കാനും ദേവസ്വത്തിലെ ആനകള്ക്ക് നല്കാനും മാറ്റും. ബാക്കി വരുന്ന കുലകള് ക്ഷേത്രത്തിന് പുറത്തുവെച്ച് ലേലം ചെയ്യും.
തിരുവോണ നാളില് ആറന്മുള പാര്ഥ സാരഥിക്ക് നിവേദ്യത്തിനുള്ള വിഭവങ്ങളുമായി തിരുവോണത്തോണി ഉത്രാട സന്ധ്യയില് കാട്ടൂര് മഹാവിഷ്ണക്ഷേത്രക്കടവില് നിന്നും പമ്പാനദിയിലൂടെ യാത്ര തിരിക്കും. ആചാര പ്രകാരം മങ്ങാട്ട് ഭട്ടതിരിയാണ് തോണി യാത്രക്ക് നായകത്വം വഹിക്കുന്നത്. ഇതിനായി കോട്ടയം കുമാരനല്ലൂര് മങ്ങാട്ട് ഇല്ലം രവീന്ദ്രബാബു ഭട്ടതിരി ചുരുളി വള്ളത്തില് ആറന്മുളയില് എത്തിയിട്ടുണ്ട്.
ഇന്ന് ഭട്ടതിരിയുടെ നേതൃത്വത്തില് കാട്ടുരിലെ 18 കുടുംബങ്ങളില് നിന്നുമുള്ള പ്രതിനിധികളുമായാണ് തിരുവോണത്തോണി പുറപ്പെടുന്നത്. നാളെ പുലര്ച്ചെയാണ് വിഭവങ്ങളുമായി തോണി ആറന്മുള ക്ഷേത്രക്കടവില് എത്തുന്നത്.
കോവിഡ് മാനദണ്ഡങ്ങള് പാലിച്ചാണ് ഇക്കുറി ചടങ്ങ്. ഇന്ന് രാവിലെ തോണി മൂക്കന്നൂര് കടവിലെത്തിച്ച് കഴുകി വൃത്തിയാക്കും. തുടര്ന്ന് കാട്ടൂര് ക്ഷേത്രക്കടവില് എത്തിക്കും.ക്ഷേത്രത്തില് നിന്നും ഭട്ടതിരി ചോതി നാളില് എത്തിച്ച നെല്ല് കുത്തിയ അരി ഉള്പ്പെടെയുള്ള സാധനങ്ങളാണ് തോണിയില് കൊണ്ടു പോകുക.
കാട്ടൂര് ക്ഷേത്രത്തിലെ ശീകോവിലില് നിന്നും മേല്ശാന്തി പകര്ന്ന് നല്കുന്ന ദീപം ഭട്ടതിരി തോണിയില് എടുത്ത് വയ്ക്കും. തുടര്ന്ന് ഭട്ടതിരിയും 18 കുടുംബങ്ങളിലെ പ്രതിനിധികളുമായി തിരുവോണത്തോണി വൈകിട്ട് ആറരയോടെ കാട്ടൂരില് നിന്നും ആറന്മുളയിലേക്ക് നീങ്ങും.
പള്ളിയോടങ്ങള് തിരുവോണത്തോണിക്ക് അകമ്ബടിയായി നീങ്ങും. അയിരൂര്, മേലുകര, കോഴഞ്ചേരി വഴി തിരുവോണ നാള് പുലര്ച്ചെ ആറന്മുള ക്ഷേത്രക്കടവില് എത്തും. തോണിയിലെ ദീപം ആറന്മുള ക്ഷേത്രശ്രീകോവിലിലെ കെടാവിളക്കിലേക്ക് പകരും. തോണിയില് എത്തിച്ച വിഭവങ്ങള് ഉപയോഗിച്ച് ദേവന് നിവേദ്യം സമര്പ്പിക്കും. ക്ഷേത്രത്തില് തിരുവോണ നാളില് നടക്കുന്ന ചടങ്ങുകളില് പങ്കെടുത്ത് അത്താഴപൂജ കഴിഞ്ഞ് ചെലവ് മിച്ചം പണക്കിഴി ഭണ്ഡാരത്തില് നിക്ഷേപിച്ച് ഭട്ടതിരി കുമാരനല്ലൂരിലേക്ക് കരമാര്ഗം മടങ്ങും.
കോവിഡ് നിയന്ത്രണങ്ങള് പൂര്ണമായും പാലിക്കുന്നതിനാല് തോണി യാത്രയില് നിയന്ത്രണങ്ങള് ഏര്പ്പെടുത്തിയിട്ടുണ്ട്. പങ്കെടുക്കാന് അവകാശമുള്ള കാട്ടൂരിലെ 18 നായര് കുടുംബങ്ങളിലെ അംഗങ്ങള്ക്ക് മാത്രമായിരിക്കും ഇക്കുറി മങ്ങാട്ട് ഭട്ടതിരിക്ക് ഒപ്പം തോണിയില് പ്രവേശനം.
ആചാര അനുഷ്ഠാനങ്ങള് നടത്തേണ്ട പരികര്മികള്, വാദ്യമേളക്കാര്, ദേവസ്വം ജീവനക്കാര് തുടങ്ങിയവര്ക്കും തോണിയില് ആറന്മുള യാത്രയില് പങ്കെടുക്കാന് കഴിയും. ആറന്മുള പള്ളിയോടങ്ങള് എല്ലാം ഇക്കാലമത്രയും തോണിക്ക് അകമ്ബടി സേവിച്ചിരുന്നു. എങ്കില് നിലവിലെ സാഹചര്യത്തില് അതിന് കഴിയുന്നില്ല. ആറന്മുളയില് നിന്നും തിരുവോണ തോണി ഇന്നലെ രാവിലെ കാട്ടൂരിലേക്ക് പുറപ്പെട്ടു.
https://www.facebook.com/Malayalivartha