വനം മന്ത്രി എ. കെ. ശരിന്ദ്രനെ കുരുക്കാനുള്ള ക്വട്ടേഷനായി ഇടുക്കി വനം വകുപ്പിലെ പണപ്പിരിവ് മാറാന്‍ സാധ്യതയുണ്ടെന്ന് സൂചന. മുട്ടില്‍ മരം മുറിയുമായി ബന്ധപ്പെട്ട് ശശീന്ദ്രനുമായി ഇടഞ്ഞ് നില്‍ക്കുന്ന സി പി ഐ പുതിയ നീക്കങ്ങളെ കൗതുകപൂര്‍വമാണ് നോക്കി കാണുന്നത്.

വനം വകുപ്പിലെ ഉന്നത ഉദ്യോഗസ്ഥരുടെ മൗനാനുവാദത്തോടെയാണ് പണപ്പിരിവെന്നാണ് ആക്ഷേപം ഉയര്‍ന്നിട്ടുള്ളത്. സംഭവം സംബന്ധിച്ച് പൊലീസ് സ്‌പെഷ്യല്‍ ബ്രാഞ്ചും വനംവകുപ്പും അന്വേഷണം ആരംഭിച്ചു. പരാതി ശരിയാണെന്നതിനുള്ള തെളിവുകള്‍ സ്‌പെഷ്യല്‍ ബ്രാഞ്ചിനു ലഭിച്ചിട്ടുണ്ട്. വനം വകുപ്പിലെ ഉന്നത ഉദ്യോഗസ്ഥര്‍ പിരിക്കുന്നുവെന്ന് പറയുമ്പോള്‍ അഴിമതിയുടെ മുന തിരിയുന്നത് വനം വകുപ്പിന് നേതൃത്വം നല്‍കുന്ന സംവിധാനത്തിലേക്കാണ്.

സിഎച്ച്ആര്‍ നിയമം ആയുധമാക്കി വനം വകുപ്പ് ജീവനക്കാര്‍ പണം പിരിവ് നടത്തുന്നുവെന്നാണ് ഇടുക്കിയിലെ ഏലം കര്‍ഷകരുടെ പരാതി. ഓണ ചെലവിനെന്ന് പറഞ്ഞാണ് ആയിരം മുതല്‍ പതിനായിരം രൂപ വരെയാണ് പിരിവ് വാങ്ങുന്നതെന്ന് ഏലം കര്‍ഷകര്‍ പറഞ്ഞു. ഇതിനെതിരെ അവര്‍ ചീഫ് കണ്‍സര്‍വേറ്റര്‍ ഓഫ് ഫോറസ്റ്റിന് പരാതിയും നല്‍കി. സംഭവത്തില്‍ പൊലീസ് സ്‌പെഷ്യല്‍ ബ്രാഞ്ചും അന്വേഷണം തുടങ്ങിയിട്ടുണ്ട്. ജീവനക്കാര്‍ക്ക് പണം കൈമാറുന്ന സിസിടിവി ദൃശ്യങ്ങള്‍ പരാതിക്കാര്‍ സ്‌പെഷ്യല്‍ ബ്രാഞ്ചിന് കൈമാറി.

കട്ടപ്പനക്കടുത്ത് പുളിയന്മലയിലുള്ള ഒരു ഏലത്തോട്ടമുടമയുടെ വീട്ടില്‍ വനം ഉദ്യോഗസ്ഥരെത്തി പണം വാങ്ങുന്നതിന്റെ ദൃശ്യങ്ങളാണ് പുറത്തുവന്നിരിക്കുന്നത്. തിരിച്ചറിയാതിരിക്കാന്‍ മഫ്തിയില്‍ ടാക്‌സി വാഹനങ്ങളിലെത്തിയാണ് പണപ്പിരിവ്. തോട്ടത്തിന്റെ വലിപ്പത്തിനനുസരിച്ചാണ് തുക നല്‍കേണ്ടത്.

ഇടുക്കിയില്‍ ഏലത്തോട്ടങ്ങളുള്ള സ്ഥലത്തെല്ലാം ഓണം, ക്രിസ്മസ്, ദീപാവലി തുടങ്ങിയ വിശേഷ ദിവസങ്ങളില്‍ വനംവകുപ്പ് ഉദ്യോഗസ്ഥര്‍ പിരിവിനിറങ്ങുമെന്നാണ് കര്‍ഷകര്‍ പറയുന്നത്. കാര്‍ഡമം ഹില്‍ റിസര്‍വിലെ നിയമങ്ങള്‍ ആയുധമാക്കിയാണ് പണപ്പിരിവ്. ഏലത്തിന് വിലയിടിഞ്ഞു നില്‍ക്കുന്ന സമയത്ത് നടത്തുന്ന നിയമ വിരുദ്ധ പിരിവ് സംബന്ധിച്ച് കാര്‍ഡമം ഗ്രോവേഴ്‌സ് അസ്സോസിയേഷന്‍ മുഖ്യ വനപാലകന് പരാതി നല്‍കി.

ആരോപണം മന്ത്രിയിലേക്ക് തിരിയാന്‍ സാധ്യതയുള്ളതു കൊണ്ട് ആഭ്യന്തര വകുപ്പ് അതി സൂക്ഷ്മായ നീക്കങ്ങളാണ് നടത്തുന്നത്. വനം വകുപ്പ് ഒരു ചെറിയ ഘടകകക്ഷിയെ ഏല്‍പ്പിക്കുമ്പോള്‍ ഇത്തരമൊരു അപകടം സി പി എം മുന്നില്‍ കണ്ടിരുന്നതാണ്.

ഓണപ്പിരിവ് വാര്‍ത്തയായപ്പോള്‍ തന്നെ ഉന്നതതല അന്വേഷണത്തിന് ഉത്തരവിടാന്‍ മുഖ്യമന്ത്രിയുടെ ഓഫീസ് വനംമന്ത്രിക്ക് നിര്‍ദ്ദേശം നല്‍കിയിരുന്നു.

ഇതിന്റെ അടിസ്ഥാനത്തില്‍ വനം വിജിലന്‍സ് മേധാവിയെ കൊണ്ട് അന്വേഷിപ്പിക്കാന്‍ മന്ത്രി തീരുമാനിച്ചു. ഉദ്യോസ്ഥര്‍ അഴിമതി നടത്തിയാല്‍ മന്ത്രിയുടെ ഓഫീസില്‍ നേരിട്ട് അറിയിക്കാം. കുറ്റക്കാര്‍ക്കെതിരെ കര്‍ശന നടപടിയുണ്ടാകുമെന്നും മന്ത്രി അറിയിച്ചു.



അടിയന്തര അന്വേഷണം നടത്തി റിപ്പോര്‍ട്ട് നല്‍കാനാണ് വനം വകുപ്പ് പ്രിന്‍സിപ്പല്‍ കണ്‍സര്‍വേറ്റര്‍ & ഹെഡ് ഫോറസ്റ്റ് ഫോഴ്‌സ് പി കെ കേശവന്‍ ഐ എഫ് എസി നെ മന്ത്രി എ കെ ശശീന്ദ്രന്‍ ചുമതലപ്പെടുത്തിയിരിക്കുന്നത്. അന്വേഷണത്തിന് പൊലീസ് സേവനം ആവശ്യമെങ്കില്‍ ഉപയോഗിക്കുമെന്നും മന്ത്രി അറിയിച്ചു.

അന്വേഷണത്തിന്റെ ആദ്യ ഘട്ടമായി ചില ഉദ്യോഗസ്ഥരെ സര്‍ക്കാര്‍ സസ്‌പെന്റ് ചെയ്തു. കൂടുതല്‍ ഉദ്യോഗസ്ഥര്‍ക്ക് പങ്കുണ്ടോ എന്നന്വേഷിക്കാന്‍ സര്‍ക്കാര്‍ തീരുമാനിച്ചിട്ടുണ്ട്. അപകടം തന്റെ നേരെ തിരിയാതിരിക്കാനുള്ള ശശീന്ദ്രന്റെ തന്ത്രങ്ങളായി ഇതിനെ കരുതുന്നവരുണ്ട് . എന്‍ സി പിയുടെ പ്രാദേശിക നേതാക്കള്‍ക്ക് സംഭവത്തില്‍ പങ്കുണ്ടോ എന്നും മന്ത്രി പരിശോധിക്കും.