കോവിഡ് പ്രതിരോധവാക്‌സീന്റെ ഇന്ത്യയിലെയും പ്രത്യേകിച്ച് കേരളത്തിലെയും ഫലപ്രാപ്തിയില്‍ വീണ്ടും ആശങ്ക ഉയരുന്നു. രണ്ടാം ഡോസ് വാക്‌സിനേഷന്‍ എടുത്തശേഷം രാജ്യത്താകെ 87,000ലേറെ ആളുകള്‍ കോവിഡ് പോസിറ്റീവായ സാഹചര്യത്തില്‍ പ്രതിരോധം പാളുകയാണോ എന്ന സംശയത്തിലാണ് കേന്ദ്ര സര്‍ക്കാര്‍.

രണ്ടു കുത്തിവയ്പുകളും സ്വീകരിച്ചശേഷവും കോവിഡ് ബാധിച്ചതില്‍ 46 ശതമാനം കേസുകളും കേരളത്തിലാണെന്നത് കേരള സര്‍ക്കാരിനും തിരിച്ചടിയാകുന്നു.

ഇതില്‍തന്നെ കോവിഷീല്‍ഡാണോ കോവാക്‌സിനാണോ കൂടുതല്‍ ഫലപ്രദം എന്നതുള്‍പ്പെടെ പഠനങ്ങളിലേക്ക് നീങ്ങുകയാണ് ആരോഗ്യവകുപ്പ്. ഇതോടകം കേരളത്തില്‍ 62 ശതമാനം ജനങ്ങള്‍ കോവിഡ് ഒന്നാം ഡോസ് വാക്‌സീന്‍ സ്വീകരിച്ചുകഴിഞ്ഞു.

32 ശതമാനം പേര്‍ രണ്ടു ഡോസുകളും എടുത്ത ശേഷവും രോഗവ്യാപനത്തില്‍ കാര്യമായ കുറവുണ്ടാണ്ടാകുന്നില്ല. കേരളത്തിലെ കോവിഡ് വൈറസിന്റെ വകഭേദം നിലവിലുള്ള കോവാക്‌സീനെയും കോവിഷീല്‍ഡിനെയും പ്രതിരോധിക്കുന്നതില്‍ വീഴച വരുത്തുന്നുണ്ടോ എന്നതിലും ആശങ്ക ഉയരുകയാണ്.

ആദ്യ ഡോസ് കുത്തിവയ്പിനു ശേഷം 80,000 പേരും രണ്ടാം ഡോസിനു ശേഷം 40,000 പേരുമാണു കേരളത്തില്‍ കോവിഡ് രോഗബാധിതരായിരിക്കുന്നത്.
കേരളത്തില്‍ രണ്ടാഴ്ചയ്ക്കുള്ളില്‍ കോവിഡ് ബാധിതരുടെ എണ്ണം കുത്തനെ ഉയരുന്ന സാഹചര്യത്തില്‍ ഓണത്തിനു ശേഷം വീണ്ടുമൊരു സെമി ലോക് ഡൗണ്‍ വരുമോ എന്നതിലേക്കും സാഹചര്യം നീങ്ങുന്നു.



നിലവില്‍ കേരളത്തില്‍ രോഗ വ്യാപന നിരക്ക് 17 ശതമാനത്തിലേക്ക് കുത്തനെ ഉയരുന്നതിനാല്‍ വീണ്ടും അടച്ചിടല്‍ എന്ന സാധ്യതയിലേക്കാണ് കേരളംനീങ്ങുന്നത്. ഓണത്തിനുശേഷം പോസിറ്റിവിറ്റി നിരക്ക് 22 ശതമാനത്തിലെത്തുമെന്നാണ് ആരോഗ്യവകുപ്പിന്റെ നിരീക്ഷണം.

ഇതോടകം ഔദ്യോഗിക കണക്കില്‍ കോവിഡ് മരണനിരക്ക് ഇരുപതിനായിരം കവിയുകയാണ്. അനൗദ്യോഗികണക്കനുസരിച്ച് മരണം നാല്‍പതിനായിരത്തിനു മുകളിലുമാണ്. ഈ സാഹചര്യത്തിലാണ് കേരളത്തിലെ രോഗവ്യാപനത്തോതിലും പ്രതിരോധ കുത്തിവയ്പ്പിലും ആശങ്ക ഉയരുന്നത്.

വിദേശ നിര്‍മിതമായ കോവിഷീല്‍ഡാണോ ഇന്ത്യന്‍ നിര്‍മിത കോവാക്‌സീനാണോ കേരളത്തില്‍ കൂടുതല്‍ ഫലപ്രദമായത് എന്നതുള്‍പ്പെടെ നിലവില്‍ പഠനങ്ങള്‍ നടന്നുവരികയാണ്. ഇതില്‍ ഏത് തരം വാക്‌സീന്‍ സ്വകരിച്ചവരിലാണ് കോവിഡ് പ്രതിരോധം നല്‍കാതിരിക്കുന്നത് എന്നതിലാണ് വ്യക്തമായ നിരീക്ഷണം
ആവശ്യമായുള്ളത്.


ആഗോളതലത്തില്‍ ആരോഗ്യമേഖലയില്‍ ഏറ്റവും നിലവാരം പുലര്‍ത്തുകയും ഇന്ത്യയില്‍തന്നെ ഒന്നാം സ്ഥാനത്ത് എത്തുകയും ചെയ്തിരിക്കുന്ന കേരളംകോവിഡില്‍ ഒന്നാം നിരയില്‍ തുടരുന്നു എന്നത് ദേശീയതലത്തില്‍ തന്നെ ശ്രദ്ധനേടുകയാണ്.


പ്രതിദിന രോഗബാധയുടെ വര്‍ധനയില്‍ ഇത്തരം ബ്രേക് ത്രൂ കേസുകള്‍ക്കു പ്രധാന പങ്കുണ്ടെന്നത് ആരോഗ്യ മന്ത്രാലയത്തെ ആശങ്കപ്പെടുത്തുന്നു.

ബ്രേക് ത്രൂ അണുബാധകളുടെ 200 സാംപിളുകള്‍ ജീനോമിക് സീക്വന്‍സിനായി അയച്ചിട്ടുണ്ട്. കൊറോണ വൈറസിനുണ്ടാകുന്ന രൂപാന്തരം പുതിയ തരംഗത്തിനു കാരണമാകാം എന്ന് ആശങ്കയുണ്ട്. ഈ വര്‍ഷമാദ്യം രാജ്യത്തു കോവിഡിന്റെ രണ്ടാം തരംഗം ശക്തമായതു ഡെല്‍റ്റ വകഭേദത്തിന്റെ സാന്നിധ്യം കൊണ്ടായിരുന്നു.

കേരളത്തില്‍ 100 ശതമാനം വാക്‌സിനേഷന്‍ നിരക്കുള്ള വയനാട് ജില്ലയില്‍ നിന്നും ബ്രേക് ത്രൂ കേസുകള്‍ റിപ്പോര്‍ട്ട് ചെയ്തിട്ടുണ്ട്. നിലവില്‍,രാജ്യത്ത് ഏറ്റവും കൂടുതല്‍ പ്രതിദിന കേസ് റിപ്പോര്‍ട്ട് ചെയ്യുന്ന സംസ്ഥാനമാണു കേരളം. കേരളത്തില്‍ കോവിഡ് നിരക്ക് താഴാതെയും വാസ്‌കീന്‍സ്വീകരിച്ചശേഷവും രോഗം വരുന്ന സാഹചര്യവും ലോകാരോഗ്യ സംഘടനയിലും ആശങ്ക ജനിപ്പിക്കുന്നു.


സെപ്റ്റംബറില്‍ കോവിഡ് മൂന്നാം തരംഗത്തിലേക്കുള്ള സൂചനയാണ് ഇതോടകം പുറത്തുവരുന്നത്. ഇന്ത്യയില്‍ കോവിഡ് മൂന്നാം തരംഗമുണ്ടായാല്‍ അത്കേരളത്തെയായിരിക്കും കൂടുതല്‍ ബാധിക്കുകയെന്നതും വലിയ ഭീഷണിയായി മാറുന്നു. മൂന്നാം തരംഗം കുട്ടികളെയാകുമോ കൂടുതല്‍ ബാധിക്കുക എന്നതിലാണ്
ആരോഗ്യവകുപ്പ് ജാഗ്രത പുലര്‍ത്തുന്നത്.


ഈ സാഹചര്യത്തിലാണ് കുട്ടികള്‍ക്കും 18 വയസില്‍ താഴെയുള്ള എല്ലാവര്‍ക്കും വാക്‌സീന്‍ നല്‍കുന്നതു സംബന്ധിച്ച ആലോചന പുരോഗമിക്കുന്നത്.

മറ്റു സംസ്ഥാനങ്ങളില്‍ കോവിഡ് വ്യാപനം കുറഞ്ഞിട്ടും കേരളത്തില്‍ കേസുകള്‍ ഉയര്‍ന്ന നിലയില്‍ തന്നെ നില്‍ക്കുന്നതില്‍ കേന്ദ്ര ആരോഗ്യ മന്ത്രാലയം
ആശങ്ക രേഖപ്പെടുത്തിക്കഴിഞ്ഞു.



കോവിഡ് മൂന്നാം തരംഗത്തെക്കുറിച്ചുള്ള ആശങ്കകള്‍ നിലനില്‍ക്കെ, രാജ്യത്ത് കുട്ടികള്‍ക്കു വാക്‌സീന്‍ കുത്തിവയ്പ് ഒക്ടോബറില്‍ തുടങ്ങിയേക്കും.
വിദഗ്ധ സമിതിയുടെ അനുമതി അടുത്തമാസം ലഭിക്കുമെന്നാണു പ്രതീക്ഷ. 12 മുതല്‍ 18 വരെ പ്രായക്കാര്‍ക്കായിരിക്കും ആദ്യഘട്ടത്തില്‍ വാക്‌സീന്‍ നല്‍കുക.
ഇവരിലെ പരീക്ഷണമാണ് പൂര്‍ത്തിയായിക്കഴിഞ്ഞു.



അഞ്ചു മുതല്‍ 12 വരെ പ്രായക്കാരിലും രണ്ടു മുതല്‍ ആറ് വരെ പ്രായക്കാരിലും വാക്‌സീന്‍ ട്രയല്‍ തുടരുകയാണ്. സെപ്റ്റംബര്‍ അവസാനമോ ഒക്ടോബര്‍ ആദ്യമോ കുട്ടികള്‍ക്കു വാക്‌സീന്‍ ലഭ്യമാകുമെന്നാണ് സൂചന. രണ്ടു ഡോസ് വാക്‌സീനെടുത്തവരില്‍ പ്രതിരോധ ശേഷി കൂട്ടാനുള്ള അധിക ഡോസ് കുത്തിവയ്പ് നല്‍കാന്‍ സാധ്യത നിലവിലില്ല.

രാജ്യത്തെ 135 കോടി പൗരന്‍മാരിലും രണ്ടു ഡോസ് വാക്‌സീന്‍ എത്തിക്കാന്‍ കുറഞ്ഞത് ഒരു വര്‍ഷം കൂടി വേണ്ടിവരുന്ന സാഹചര്യത്തില്‍ കോവിഡ് തുടര്‍ ബൂസ്റ്റര്‍ കൂടി നല്‍കാനുള്ള സാഹചര്യം പരിമിതമാണ്. 18 വയസ്സിനു മുകളിലുള്ളവര്‍ക്ക് രണ്ടു ഡോസ് വീതം വാക്‌സീന്‍ ഈ വര്‍ഷം തന്നെ ഉറപ്പാക്കുകയാണ് ഇപ്പോഴത്തെ ലക്ഷ്യം.


അമേരിക്ക, ഇസ്രായേല്‍, ഫ്രാന്‍സ്, ജര്‍മനി, റഷ്യ, ചൈന, യുഎഇ തുടങ്ങിയ രാജ്യങ്ങള്‍ ബൂസ്റ്റര്‍ ഡോസ് ഘട്ടത്തിലേക്കു കടന്നിരിക്കുകയാണ്.