ലോ അക്കാദമിയിലെ അധ്യാപകന്‍ സുനില്‍ കുമാര്‍ കോളേജ് ഗ്രൗണ്ടില്‍ പൈശാചികമായി തീ കൊളുത്തി ആത്മഹത്യ ചെയ്തതെന്തിന്? വീട്ടിലോ നാട്ടിലോ സുനിലിന് കാര്യമായ പ്രശ്‌നങ്ങളൊന്നും ഇല്ലാതിരുരുന്നു. അതുകൊണ്ടു തന്നെ ആത്മഹത്യക്ക് പിന്നിലെ കൃത്യമായ കാരണം കണ്ടെത്താന്‍ പോലീസിന് കഴിഞ്ഞില്ല.

സുനില്‍ കുമാറിന് എന്താണ് സംഭവിച്ചതെന്ന് അറിയാന്‍ പോലീസ് വിശദമായ അന്വേഷണമാണ് നടത്തുന്നത്. തലസ്ഥാനത്തെ ചില ദുര്‍മന്ത്രവാദികളെ കേന്ദ്രീകരിച്ചാണ് അന്വേഷണം പുരോഗമിക്കുന്നത്. ദുര്‍ബലമായ മനസ്സിന്റെ ഉടമയാണ് സുനില്‍കുമാര്‍.സത്യസന്ധനും നേരെ വാ നേരെ പോ എന്ന ചിന്താഗതിക്കാരനുമായിരുന്നു ഇയാള്‍. കോളേജിനുള്ളില്‍ നിന്ന് എന്തെങ്കിലും മാനസിക പ്രശ്‌നങ്ങള്‍ അനുഭവപ്പെട്ടിരുന്നോ എന്ന അന്വേഷണമാണ് സുനില്‍കുമാറിന്റെ വ്യക്തിപരമായ ജീവിതത്തിലെ ചില താളപ്പിഴകളില്‍ ചെന്നു നിന്നത്.

കടുത്ത ഈശ്വര വിശ്വാസിയായിരുന്ന സുനില്‍ കുമാറിന് ആത്മീയ കാര്യങ്ങളെ കുറിച്ച് കൂടുതല്‍ ജ്ഞാനമുണ്ടാക്കണമെന്ന് ആഗ്രഹം തോന്നിയിരുന്നു. ആത്മീയ പുസ്തകങ്ങള്‍ അനവധി നിരവധി വായിച്ചിരുന്നു. ആത്മീയ പണ്ഡിതരുമായി സംഭാഷണങ്ങളില്‍ ഏര്‍പ്പെട്ടിരുന്നു. എന്നാല്‍ അതിലും ഒരു കുഴപ്പമുണ്ടായിരുന്നു.അതായത് ശരിയായ ആത്മീയവിശ്വാസമല്ല സുനില്‍കുമാര്‍ പിന്തുടര്‍ന്നിരുന്നത്. പകരം മന്ത്രവാദങ്ങളിലും ആഭിചാര ക്രിയകളിലും ആനന്ദം കണ്ടെത്തുകയായിരുന്നു ലക്ഷ്യം.

എപ്പോഴും ഉന്മേഷവാനായ അധ്യാപകനായിരുന്നു സുനില്‍ കുമാര്‍. കോളേജിലെ മറ്റ് അധ്യാപകരും വിദ്യാര്‍ത്ഥികളുമായും അടുത്ത ബന്ധം. സുഹൃത്തുക്കള്‍ക്ക് ഏറെ പ്രിയപ്പെട്ടവന്‍. എല്ലാ കാര്യത്തിനും മുന്‍പന്തിയിലുള്ളയാള്‍. സന്തോഷകരമായ കുടുംബ ജീവിതം. പിന്നെയും എന്തിന് സുനില്‍കുമാര്‍ ആത്മഹത്യ ചെയ്‌തെന്ന ചോദ്യമാണ് ബന്ധുക്കളെയും സുഹൃത്തുക്കളെയും ഒപ്പം പൊലീസിനെയും കുഴക്കുന്നത്.

ലോ അക്കാദമിയിലെ 2004 ബാച്ച് വിദ്യാര്‍ത്ഥിയായിരുന്ന സുനില്‍കുമാര്‍ സഹപാഠികളുമായി അടുത്ത ബന്ധം സൂക്ഷിച്ചിരുന്നു. പക്ഷെ കഴിഞ്ഞ കുറച്ച് മാസങ്ങളിലായി അകലം പാലിച്ചിരുന്നതായി സുഹൃത്തുക്കള്‍ പറയുന്നു. അടുത്ത സുഹൃത്തുക്കളോട് പോലും പലപ്പോഴും സംസാരിച്ചിരുന്നില്ല. എന്നാല്‍ കാര്യമായ പ്രശ്‌നങ്ങളൊന്നും ആര്‍ക്കും അറിയില്ല. ഇക്കാലത്താണ് മന്ത്രവാദത്തില്‍ സുനിലിന് അമിതമായ താത്പര്യമുണ്ടായതെന്ന് പോലീസ് കരുതുന്നു.

ചില അടുത്ത സുഹൃത്തുക്കളില്‍ നിന്നാണ് ആഭിചാരചിന്തകളോട് സുനില്‍കുമാറിന് താത്പര്യമുണ്ടായിരുന്നതായി പൊലീസ് മനസിലാക്കിയത്. ഇതിന്റെ അടിസ്ഥാനത്തില്‍ അടുത്ത സുഹൃത്തുക്കളോടും വിദ്യാര്‍ത്ഥികളോടും പൊലീസ് വിവരങ്ങള്‍ തേടുന്നുണ്ട്. നന്നായി വായിക്കുകയും, പുതിയ കാര്യങ്ങള്‍ പഠിക്കാന്‍ താത്പര്യപ്പെടുകയും ചെയ്യുന്ന പ്രകൃതമായിരുന്നു സുനിലിന്റേത്. ഇന്‍സ്റ്റഗ്രാമില്‍ മരണത്തെ സൂചിപ്പിക്കുന്ന പോസ്റ്റുകളും സനുല്‍ പങ്കുവച്ചിരുന്നു.



സുനില്‍കുമാറിന്റെ മൊബൈല്‍ കണ്ടെത്താനായുമായിട്ടില്ല. തീപ്പിടുത്തതില്‍ മൊബൈലും ഉരുകിപോയിട്ടുണ്ടാകാമെന്നാണ് പൊലീസ് വിലയിരുത്തല്‍. ബുധനാഴ്ച ഉച്ചയ്ക്കാണ് കോളെജ് ഗ്രൗഡില്‍ പെട്രോള്‍ ഒഴിച്ച് കത്തിച്ച് സുനില്‍കുമാര്‍ ആത്മഹത്യ ചെയ്തത്.

നാല്‍പ്പത് വയസ് മാത്രമുള്ള ഒരു ചെറുപ്പക്കാരന്റെ ജീവനെടുക്കാന്‍ മന്ത്രവാദത്തിന് കഴിയുമോ? എങ്കില്‍ ആരാണ് അതിന് പ്രേരിപ്പിച്ചത്? മരണാനന്തര ജീവിതത്തില്‍ സുനില്‍ വിശ്വസിച്ചിരുന്നോ? ഇതിനെല്ലാമുള്ള ഉത്തരം പോലീസിന് കണ്ടെത്തേണ്ടതുണ്ട് .സുനിലിന്റെ മരണം വിശ്വസിക്കാന്‍ കഴിയാത്ത അവസ്ഥയിലാണ് അദ്ദേഹത്തിന്റെ കുടുംബം.അതിനാല്‍ ഭാര്യയുടെ മൊഴിയെടുക്കാന്‍ കഴിഞ്ഞിട്ടില്ല.

സുനിലിന്റെ മൊബൈല്‍ ഫോണ്‍ നശിക്കാതിരുന്നെങ്കില്‍ മരണത്തിന് തുമ്പുണ്ടാക്കാന്‍ കഴിയുമായിരുന്നു എന്നാണ് പോലീസ് കരുതുന്നത്. എന്നാല്‍ മരണത്തിനൊപ്പം സുനിലിന്റെ മൊബൈല്‍ ഫോണും ഇല്ലാതായി. സുനില്‍ പതിവായി സന്ദര്‍ശിക്കുന്ന ക്ഷേത്രങ്ങള്‍ ,പൂജാ സ്ഥലങ്ങളില്‍ എന്നിവ കേന്ദ്രീകരിച്ചാണ് അന്വേഷണം പുരോഗമിക്കുന്നത്.