സംസ്ഥാനത്തെ കോവിഡ് വ്യാപനം രൂക്ഷമാണ്. സാധാരണ ജനങ്ങള്‍ കടുത്ത നിയന്ത്രണത്തിലാണ് കഴിയുന്നത്. ഒരു കല്യാണം പോലും ആളെക്കൂട്ടി നടത്താന്‍ കഴിയില്ല. അപ്പോഴാണ് ഒരു കല്യാണത്തിന്റെ ആളുമായി താരങ്ങള്‍ മാസ്‌കുമില്ലാതെ ഉത്രാടപ്പാച്ചില്‍ നടത്തുന്നത്. അവസാനം ബിന്ദു കൃഷ്ണയ്ക്ക് തന്നെ അത് ചോദിക്കേണ്ടി വന്നു.

കോവിഡ് പ്രോട്ടോക്കോള്‍ പാലിക്കാതെ സിനിമാ താരങ്ങള്‍ ഒത്തുകൂടിയതിനെതിരെ പരിഹാസവുമായി കൊല്ലം ഡിസിസി പ്രസിഡന്‍്‌റ് ബിന്ദു കൃഷ്ണ. താര സംഘടനയായ 'അമ്മ' കഴിഞ്ഞ ദിവസം നടത്തിയ പരിപാടിയുടെ ചിത്രം ഫെയ്‌സ്ബുക്കില്‍ പങ്കുവെച്ചുകൊണ്ടായിരുന്നു ബിന്ദു കൃഷ്ണയുടെ പരിഹാസം.

സാമൂഹ്യഅകലവും, മാസ്‌കും, കൊവിഡ് പ്രോട്ടോക്കോളും പെര്‍ഫക്ട് ഓക്കെ...

കുടുംബം പോറ്റാന്‍ തെരുവില്‍ ഇറങ്ങുന്നവര്‍ക്ക് സമ്മാനമായി പെറ്റിയും, പിഴയും.

ജനങ്ങളുടെ പ്രശ്‌നങ്ങള്‍ ഉന്നയിച്ചു കൊണ്ട് പ്രതിഷേധം ഉയര്‍ത്തുന്ന രാഷ്ട്രീയപൊതുപ്രവര്‍ത്തകര്‍ക്ക് സമ്മാനമായി കേസും, കോടതിയും...
മച്ചാനത് പോരെ... എന്നാണ് ബിന്ദു കൃഷ്ണ ചോദിക്കുന്നത്.

അതേസമയം താരസംഘടനയുടെ രീതിയെ പറ്റി പാര്‍വതി തിരുവോത്തും രംഗത്തെത്തി. ആണുങ്ങള്‍ വേദികളില്‍ ഇരിക്കുകയും സ്ത്രീകള്‍ സൈഡില്‍ നില്‍ക്കുകയും ചെയ്യുന്ന രീതി ഇപ്പോഴും തുടരുകയാണെന്ന് പാര്‍വതി തിരുവോത്ത് പറഞ്ഞു. ശനിയാഴ്ച കലൂരില്‍ താരസംഘടനയായ അമ്മയുടെ ആസ്ഥാനമന്ദിരത്തിന്റെ ഉദ്ഘാടന വേളയില്‍ എക്‌സിക്യുട്ടീവ് അംഗങ്ങളായ വനിതാ താരങ്ങള്‍ക്ക് വേദിയില്‍ ഇരിപ്പിടം അനുവദിച്ചില്ലെന്ന് ആരോപിച്ച് സോഷ്യല്‍ മീഡിയയില്‍ ചര്‍ച്ച പുരോഗമിച്ചുകൊണ്ടിരിക്കുകയാണ്. ഈ സാഹചര്യത്തിലാണ് സംഭവത്തെക്കുറിച്ച് പറയാതെ പാര്‍വതിയുടെ പരോക്ഷ പ്രതികരണം.

'ആണുങ്ങള്‍ മാത്രമിരിക്കുന്ന വേദികളാണ് ഇപ്പോഴും കണ്ടുകൊണ്ടിരിക്കുന്നത്. സൈഡില്‍ സ്ത്രീകള്‍ നില്‍ക്കുന്നു, ആണുങ്ങള്‍ ഇരിക്കുന്നു. ഇങ്ങനെയുള്ള വേദികള്‍ ഇപ്പോളും ഉണ്ടാകുന്നു. ഒരു നാണവുമില്ലാതെ അത് ഇപ്പോഴും തുടരുന്ന സംഘടനകളുള്ള സമയത്ത് എനിക്കൊരു സിദ്ധാര്‍ത്ഥ് ശിവയുടെ അടുത്തിരുന്ന് സിനിമയെക്കുറിച്ച് സംസാരിക്കാന്‍ കഴിയുന്നു എന്നത് വലിയ കാര്യമാണ്. എനിക്ക് മുമ്പ് വന്നിട്ടുള്ള ആളുകള്‍ വ്യത്യസ്തമായി ചിന്തിച്ചത് കാരണമാണ് എനിക്കത് സാധിക്കുന്നത്', പാര്‍വതി പറഞ്ഞു.

അതേസമയം താര സംഘടനയായ 'അമ്മ ക്ക് വേണ്ടി ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍ നിര്‍മ്മിക്കുന്ന ചിത്രം വൈശാഖ് സംവിധാനം ചെയ്യും. ഇതേക്കുറിച്ചുള്ള ഔദ്യോഗിക പ്രഖ്യാപനം ഉടനെയുണ്ടാകുമെന്നാണ് പ്രതീക്ഷിക്കപ്പെടുന്നത്.

പ്രിയദര്‍ശനും ടി.കെ രാജീവ് കുമാറും ചേര്‍ന്ന് അമ്മ യുടെ ചിത്രം സംവിധാനം ചെയ്യുമെന്നായിരുന്നു ആദ്യം തീരുമാനിച്ചിരുന്നത്. എന്നാല്‍ ആ കാരണം മാറാനുള്ള കാരണമെന്താണെന്ന് പുറത്തുവിട്ടിട്ടില്ല. വൈശാഖ് ഒരുക്കുന്ന ചിത്രത്തിന്റെ ചര്‍ച്ചകള്‍ പുരോഗമിക്കുകയാണ്. ഉദയകൃഷ്ണയുടേതാണ് തിരക്കഥ. അമ്മ കൊച്ചിയില്‍ പണികഴിപ്പിച്ച പുതിയ ആസ്ഥാന മന്ദിരത്തിന്റെ ഉദ്ഘാടന ദിവസം തന്നെയായിരുന്നു ഈ ചിത്രത്തിന്റെ പ്രഖ്യാപനം.

അമ്മ കരാറിലേര്‍പ്പെട്ടിരിക്കുന്നത് ആശിര്‍വാദ് സിനിമാസുമായാണ്. ചിത്രം ആര് സംവിധാനം ചെയ്യണമെന്നുള്ളത് അവരുടെ തീരുമാനം ആണ്. അമ്മ സംഘടനയെ സംബന്ധിച്ചിടത്തോളം ചിത്രം ആര് സംവിധാനം ചെയ്താലും പ്രശ്‌നമില്ലെന്നാണ് അമ്മയുടെ നിലപാട്.

'അമ്മ' ക്ക് വേണ്ടി ഗ്രാന്‍ഡ് പ്രൊഡക്ഷന്‍സിന്റെ ബാനറില്‍ ദിലീപ് നിര്‍മ്മിച്ച ജോഷി ചിത്രം ട്വന്റി 20 യില്‍ വൈശാഖ് സഹ സംവിധായകന്‍ ആയിരുന്നു. പോക്കിരിരാജയാണ് വൈശാഖ് സ്വതന്ത്ര സംവിധായകനായ ചിത്രം. മോഹന്‍ലാല്‍ നായകനായ പുലിമുരുകന്‍ എന്ന ചിത്രം സംവിധാനം ചെയ്തതിലൂടെയാണ് വൈശാഖ് ശ്രദ്ധേയനായത്.