ഒറ്റക്കെട്ടായി മുന്നോട്ടെന്ന്... 2024 ലെ ലോക്സഭാ തിരഞ്ഞെടുപ്പാണ് പ്രതിപക്ഷത്തിന്റെ ആത്യന്തികമായ ലക്ഷ്യമെന്ന് സോണിയ ഗാന്ധി; ആരെ പ്രധാനമന്ത്രി സ്ഥാനാര്ത്ഥിയായി ഉയര്ത്തിക്കാട്ടുമെന്ന് ആശയക്കുഴപ്പം; മോദി സര്ക്കാരിനെതിരെ ഒറ്റക്കെട്ടായി മുന്നോട്ടെന്ന് സോണിയാഗാന്ധി
ലോക്സഭാ തെരഞ്ഞെടുപ്പിന് ഇനി മൂന്ന് വര്ഷമുണ്ടെങ്കിലും ഇപ്പോഴേ മുന്നൊരുക്കമായി കോണ്ഗ്രസ്. നരേന്ദ്ര മോദി സര്ക്കാരിനെതിരെ പ്രതിപക്ഷം ഒറ്റക്കെട്ടായി മുന്നോട്ടുപോകുമെന്നാണ് പ്രതീക്ഷയെന്ന് കോണ്ഗ്രസ് നേതാവ് സോണിയാ ഗാന്ധി. പ്രതിപക്ഷ നേതാക്കളുടെ യോഗത്തിലാണ് സോണിയാഗന്ധി പ്രതീക്ഷ പ്രകടിപ്പിച്ചത്.
2024 ലെ ലോക്സഭാ തിരഞ്ഞെടുപ്പായിരിക്കണം പ്രതിപക്ഷത്തിന്റെ അത്യന്തികമായ ലക്ഷ്യമെന്നും അതിനുള്ള തയ്യാറെടുപ്പുകള് ഇപ്പോള് തന്നെ ആരംഭിക്കണമെന്നും പ്രതിപക്ഷ നേതാക്കളുടെ യോഗത്തില് സോണിയ ഗാന്ധി നിര്ദ്ദേശിച്ചു. പാര്ലമെന്റിന് പുറത്തും പ്രതിപക്ഷം യോജിച്ച് പ്രക്ഷോഭങ്ങള് സംഘടിപ്പിക്കണം. പാര്ടി താല്പര്യത്തിന് അതീതമായി രാജ്യതാല്പ്പര്യത്തിന് പ്രാധാന്യം നല്കിയുള്ള നീക്കങ്ങളുണ്ടാകണം. സോണിയ ഗാന്ധി യോഗത്തില് പറഞ്ഞു.
സോണിയാഗാന്ധിയുടെ നേതൃത്വത്തില് വിളിച്ചുചേര്ത്ത പ്രതിപക്ഷ നേതാക്കളുടെ യോഗം പുരോഗമിക്കുകയാണ്. കൊവിഡ് മഹാമാരിക്കിടെ സോണിയാഗാന്ധി വിളിക്കുന്ന രണ്ടാമത്തെ പ്രതിപക്ഷ യോഗമാണ് ഇന്നത്തേത്. പെഗാസസ് ഫോണ് ചോര്ത്തല്, കര്ഷക സമരം, ഇന്ധന വിലക്കയറ്റം ഉള്പ്പടെ സര്ക്കാരിനെതിരെ യോജിച്ച പ്രക്ഷോഭങ്ങള്ക്കുള്ള തീരുമാനം യോഗത്തിലുണ്ടാകും. മമത ബാനര്ജി,ശരത് പവാര്, എം.കെ.സ്റ്റാലിന്, ഉദ്ധവ് താക്കറെ, സീതാറാം യെച്ചൂരി, ഡി.രാജ തുടങ്ങി നേതാക്കള് യോഗത്തില് പങ്കെടുക്കുന്നുണ്ട്.
അതേസമയം പ്രധാനമന്ത്രി സ്ഥാനാര്ത്ഥിയായി ആരെ ഉയര്ത്തി കാട്ടുമെന്ന തര്ക്കവും വരാനിടയുണ്ട്. ഈ സാഹചര്യത്തില് രാഹുല് ഗാന്ധിയെ മറ്റ് പാര്ട്ടികള് അംഗീകരിക്കാന് സാധ്യത കുറവാണ്.
രാഹുല് ഗാന്ധി ഇടയ്ക്ക് വാര്ത്തകളില് പ്രത്യക്ഷപ്പെടാറുണ്ടെങ്കിലും ശക്തമായ ഇടപെടലുകള് കുറവാണ്. കൂട്ടമാനഭംഗത്തെ തുടര്ന്ന് മരിച്ച ദളിത് ബാലികയുടെ മാതാപിതാക്കള്ക്കൊപ്പമുള്ള ഫോട്ടോ അടക്കമുള്ള ഉള്ളക്കം രാഹുല് ഗാന്ധിയുടെ ഫേസ്ബുക്ക്, ഇന്സ്റ്റഗ്രാം അക്കൗണ്ടുകളില് നിന്ന് നീക്കം ചെയ്തത് വലിയ ചര്ച്ചയായി. ദേശീയ ബാലാവകാശ കമ്മിഷന്റെ ഇടപെടലിനെ തുടര്ന്നാണിത്. ഈ ഉള്ളടക്കം പങ്കുവച്ചതിന് ട്വിറ്റര് രാഹുല് ഗാന്ധിയുടെ അക്കൗണ്ട് മരവിപ്പിക്കുകയും പിന്നീട് പുന:സ്ഥാപിക്കുകയും ചെയ്തിരുന്നു.
ജുവനൈല് നിയമത്തിന് വിരുദ്ധമായി ഇരയെ തിരിച്ചറിയുന്ന വിധം മാതാപിതാക്കളുടെ ഫോട്ടോ പങ്കുവച്ചത് ചൂണ്ടിക്കാട്ടി ബാലാവകാശ കമ്മിഷന് നോട്ടീസ് നല്കിയ വിവരം രാഹുല് ഗാന്ധിയെ അറിയിച്ച ശേഷമാണ് ഫേസ്ബുക്ക് നടപടി. നടപടിയെടുത്തില്ലെങ്കില് ആഗസ്റ്റ് 17ന് വീഡിയോകോണ്ഫറന്സ് വഴി പ്രതിനിധി മറുപടി നല്കണമെന്ന് ബാലാവകാശ കമ്മിഷന് ഫേസ്ബുക്കിന് നല്കിയ നോട്ടീസില് പറഞ്ഞിരുന്നു.
അടുത്തിടെ രാഹുല് ഗാന്ധി കേരളം സന്ദര്ശിച്ചിരുന്നു. മൂന്ന് ദിവസത്തെ മണ്ഡല സന്ദര്ശനത്തിനെത്തിയ രാഹുല് ഗാന്ധി വണ്ടൂര് ഗാന്ധിഭവന് സ്നേഹമരം ഓള്ഡ് ഏജ് ഹോം സന്ദര്ശിച്ചു. അന്തേവാസികള്ക്കൊപ്പം ഓണസദ്യയും കഴിച്ച് അന്തേവാസികള്ക്കുള്ള ഓണക്കോടിയും സമ്മാനിച്ചാണ് അദ്ദേഹം മടങ്ങിയത്. കാരക്കാപറമ്പിലെ ഗാന്ധിഭവനിലാണ് വയനാട് എം പി കൂടിയായ രാഹുല്ഗാന്ധിയെത്തിയത്. നിയമസഭാ തെരഞ്ഞെടുപ്പിലേറ്റ കോണ്ഗ്രസ് തോല്വിക്ക് ശേഷം ഇതാദ്യമായാണ് രാഹുല് ഗാന്ധി മണ്ഡല സന്ദര്ശനത്തിന് കേരളത്തിലെത്തിയത്.
കേരളത്തിന്റെ വിവിധ ഭാഗങ്ങളില് നിന്നുള്ള പതിനൊന്ന് അന്തേവാസികളാണ് ഗാന്ധിഭവനിലുള്ളത്. ഉച്ചഭക്ഷണത്തിനു ശേഷം അന്തേവാസികള്ക്ക് അദ്ദേഹം പുതുവസ്ത്രങ്ങള് നല്കി. ഒരുമണിക്കൂറോളം സമയം ഇവിടെ ചിലവിട്ടാണ് അദ്ദേഹം മടങ്ങിയത്.
https://www.facebook.com/Malayalivartha
