പ്രണയനൈരാശ്യത്തെ തുടർന്നു കാമുകന്റെ വീട്ടിലെത്തി അമിത അളവിൽ ഉറക്കഗുളിക കഴിച്ച യുവതി ആശുപത്രിയിൽ മരിച്ചതായി റിപ്പോർട്ട്. ബംഗാളിൽ നഴ്സായി ജോലി ചെയ്തിരുന്ന ആലപ്പുഴ സ്വദേശിനിയാണ് അവിടെ സഹപ്രവർത്തകനായിരുന്ന നെടുമുടി സ്വദേശിയുടെ വീട്ടിലെത്തി ആത്മഹത്യ ചെയ്തത്. യുവതി കഴിഞ്ഞ 9 വർഷമായി ഭർത്താവുമായി അകന്നു കഴിഞ്ഞുവരുകയായിരുന്നു.

അതോടൊപ്പം തന്നെ കഴിഞ്ഞദിവസം യുവതി സഹോദരന്റെ ഭാര്യയുമൊത്ത് ആലപ്പുഴ നഗരത്തിലെത്തി ഷോപ്പിങ് നടത്തിയിരുന്നു. ഇരുവരും തിരികെ ബോട്ടിൽ കയറി വീട്ടിലേക്കു മടങ്ങാനൊരുങ്ങിയെങ്കിലും മരുന്നു വാങ്ങാനുണ്ടെന്നു പറഞ്ഞു ഇവർ ബോട്ടിൽ നിന്ന് ഇറങ്ങുകയായിരുന്നവെന്നാണ് മൊഴിയിൽ രേഖപ്പെടുത്തിയിരിക്കുന്നത്. യുവതിയെ കാണാതായതോടെ സഹോദരൻ പൊലീസിൽ പരാതി നൽകിയിരുന്നു.

ഇതിനുപിന്നാലെ കാമുകന്റെ വീട്ടിലെത്തി അമിതമായി ഉറക്കഗുളിക കഴിച്ച യുവതി കുഴഞ്ഞുവീണതിനെ തുടർന്നു മെഡിക്കൽ കോളജ് ആശുപത്രിയിൽ എത്തിക്കുകയായിരുന്നെന്നു നോർത്ത് പൊലീസ് വ്യക്തമാക്കി. വ്യാഴം വൈകിട്ടാണു സംഭവം നടന്നത്. മൃതദേഹം ആലപ്പുഴ മെഡിക്കൽ കോളജ് ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. കോവിഡ് പരിശോധനയ്ക്കും പോസ്റ്റ്മോർട്ടത്തിനും ശേഷം മൃതദേഹം ബന്ധുക്കൾക്കു വിട്ടുകൊടുക്കും.