ഏറെ വിവാദമായ ഇ ബുള്‍ജെറ്റ് സഹോദരങ്ങള്‍ക്ക് ആശ്വാസം. കണ്ണൂര്‍ ആര്‍.ടി ഓഫീസിലെ പൊതുമുതല്‍ നശിപ്പിച്ചെന്ന കേസില്‍ പ്രമുഖ യുട്യൂബര്‍മാരായ ഇബുള്‍ ജെറ്റ് സഹോദരങ്ങളുടെ ജാമ്യം റദ്ദാക്കണമെന്നാവശ്യപ്പെട്ട് പോലീസ് സമര്‍പ്പിച്ച ഹര്‍ജി തലശേരി സെഷന്‍സ് കോടതി തള്ളി.

വ്‌ളോഗര്‍ സഹോദരന്മാരായ എബിന്റെയും ലിബിന്റെയും യൂട്യൂബ് വീഡിയോകള്‍ പരിശോധിച്ച ശേഷം ഇരുവര്‍ക്കും കഞ്ചാവ് കടത്ത് സംഘവുമായി ബന്ധമുണ്ടോയെന്നത് ഉള്‍പ്പെടെ അന്വേഷണ വിധേയമാക്കണമെന്ന് കാണിച്ചാണ് പോലീസ് ഹര്‍ജി സമര്‍പ്പിച്ചിരുന്നത്.

കസ്റ്റഡി അപേക്ഷ നല്‍കിയിട്ടില്ലെന്നും പോലീസ് കേസ് കെട്ടിച്ചമച്ചതാണെന്നും പ്രതിഭാഗം വാദിച്ചു.

വാഹനത്തിലെ നിയമലംഘനങ്ങള്‍ക്ക് പിഴ അടയ്ക്കാന്‍ തയാറാണെന്ന് ഇ ബുള്‍ ജെറ്റ് സഹോദരങ്ങള്‍ നേരത്തെ കോടതിയെ അറിയിച്ചിരുന്നു. കേസ് പരിഗണിക്കുന്നത് രണ്ട് തവണ മാറ്റിയ ശേഷമാണ് കോടതി ഇന്നലെ വിധി പറഞ്ഞത്.

ടെമ്പോ ട്രാവലറില്‍ നിയമവിരുദ്ധമായി രൂപമാറ്റങ്ങള്‍ വരുത്തിയതിന് ഇബുള്‍ ജെറ്റ് എന്ന യൂട്യൂബര്‍ സഹോദരങ്ങളുടെ നെപ്പോളിയന്‍ എന്ന വാഹനം മോട്ടോര്‍ വാഹന വകുപ്പ് കസ്റ്റഡിയിലെടുക്കുകയും പിഴയിടുകയും ചെയ്തിരുന്നു. ഇതേത്തുടര്‍ന്ന് ഇവര്‍ ആര്‍.ടി ഓഫീസില്‍ ബഹളമുണ്ടാക്കി. തുടര്‍ന്ന് ഔദ്യോഗിക കൃത്യനിര്‍വഹണം തടസപ്പെടുത്തിയതിനും പൊതുമുതല്‍ നശിപ്പിച്ചതിനും പോലീസ് ഇരുവര്‍ക്കുമെതിരെ കേസ് എടുത്ത് അറസ്റ്റ് ചെയ്ുകയയായിരുന്നു. അറസ്റ്റിലായ പിറ്റേ ദിവസം തന്നെ ഇവര്‍ക്ക് ജാമ്യം ലഭിച്ചിരുന്നു. അതിനു പിന്നാലെയാണ് പോലീസ് ഹര്‍ജി നല്‍കിയത്.

സമൂഹമാധ്യമത്തിലൂടെ കലാപാഹ്വാനം നടത്തിയതില്‍ ഇവരുടെ പങ്ക് അന്വേഷിക്കണമെന്നും പോലീസ് അറിയിച്ചിരുന്നു. വാഹനത്തിന്റെ രജിസ്‌ട്രേഷന്‍ മോട്ടോര്‍ വാഹന വകുപ്പ് റദ്ദാക്കിയിരുന്നു.

ആര്‍ടി ഓഫീസിലെ പൊതുമുതല്‍ നശിപ്പിച്ച കേസില്‍ ലിബിനും എബിനും ജാമ്യത്തില്‍ തുടര്‍ന്നാല്‍ തെറ്റായ സന്ദേശമാകും നല്‍കുകയെന്നും പോലീസ് കോടതിയെ അറിയിച്ചിരുന്നു. ഇരുവര്‍ക്കും കഞ്ചാവ് കടത്ത് സംഘവുമായി ബന്ധമുണ്ടെന്ന് സംശയിക്കുന്നുണ്ടെന്നുമാണ് ഹര്‍ജിയില്‍ പോലീസിന്റെ വാദം.

അതേസമയം ഇല്ലാത്ത കഥകള്‍ പറഞ്ഞു തങ്ങളെ ഇല്ലാതാക്കാന്‍ ശ്രമം നടക്കുന്നുവെന്ന് ഇബുള്‍ജെറ്റ് വ്‌ലോഗര്‍മാര്‍. അസം ബസ് പ്രശ്‌നത്തില്‍ ഇടപെട്ടതുമൂലം ചിലര്‍ക്കു സാമ്പത്തിക നഷ്ടമുണ്ടായി. ഉദ്യോഗസ്ഥര്‍ക്കു പണം നല്‍കി കുടുക്കിയതിനു പിന്നില്‍ ഇവരാണെന്നും സഹോദരന്മാര്‍ ആരോപിച്ചു. ഈ മാഫിയകളാണ് ഉദ്യോഗസ്ഥരെ സ്വാധീനിച്ചത്. കഞ്ചാവ്, ആയുധക്കടത്തിനെക്കുറിച്ചും മുന്നറിയിപ്പ് നല്‍കിയിരുന്നുവെന്ന് എബിനും ലിബിനും പറഞ്ഞു.

ഇ ബുള്‍ജെറ്റ് സഹോദരന്‍മാര്‍ക്കെതിരെ അടുത്തിടെ വീണ്ടും കേസെടുത്തിരുന്നു. തോക്ക് ചൂണ്ടി പ്രകോപനം സൃഷ്ടിക്കുന്നതടക്കമുള്ള വിഡിയോകളുടെ പേരിലാണ് പുതിയ കേസ്. കലാപത്തിന് ഇവര്‍ ആഹ്വാനം ചെയ്തതായും പൊലീസ് പറയുന്നു. സൈബര്‍സെല്‍ ഓഫിസിലെ സ്‌റ്റേഷന്‍ ഹൗസ് ഓഫീസറുടെ പരാതിയിലാണ് പുതിയ കേസ്. ഇവരുടെ പേജിലുണ്ടായിരുന്ന വിഡിയോകള്‍ ചൂണ്ടിക്കാട്ടിയാണ് കേസ്. വിഡിയോ പ്രചരിപ്പിച്ചവര്‍ക്കെതിരെയും കേസ് എടുക്കും.

ഉദ്യോഗസ്ഥരെ ഭീഷണിപ്പെടുത്തി, കൃത്യ നിര്‍വഹണം തടസ്സപ്പെടുത്തി തുടങ്ങിയ കുറ്റം ചുമത്തി നേരത്തെ തന്നെ പൊലീസ് കേസെടുത്തിരുന്നു. അനുമതി ഇല്ലാതെ വാഹനത്തില്‍ മാറ്റം വരുത്തി റോഡിലിറക്കിയതിനായിരുന്നും ആദ്യം പിഴ ചുമത്തിയത്. പിഴ അടയ്ക്കാന്‍ പൊലീസ് ആവശ്യപ്പെട്ടതോടെ ഇരുവരും സമൂഹമാധ്യമത്തില്‍ ലൈവ് ഇടുകയും ഇത് വലിയ പ്രതിഷേധത്തിന് കാരണമാകുകയും ചെയ്തിരുന്നു.