ഈശോ സിനിമയെപ്പറ്റിയുള്ള എതിര്‍പ്പുകള്‍ പനവേലച്ചന്റെ പ്രസംഗത്തോടെ തീര്‍ന്നെന്ന് കരുതിയവര്‍ക്ക് തെറ്റി. അവസാനം പിടികൂടിയിരിക്കുകയാണ് ഫിലിം ചേംബര്‍. കോടതി പോലും വിധിക്കാത്ത വിധിയാണ് ചേംബര്‍ വിധിച്ചത്.

ജയസൂര്യയെ നായകനാക്കി നാദിര്‍ഷാ സംവിധാനം ചെയ്യുന്ന ചിത്രം ഈശോയുടെ പേരിനെ ചൊല്ലി വിവാദമുയര്‍ന്നിരുന്നു. വിവാദങ്ങള്‍ തുടരുന്നതിനിടെ ചിത്രത്തിന് 'ഈശോ' എന്ന പേര് അനുവദിക്കാന്‍ കഴിയില്ലെന്ന് ചൂണ്ടിക്കാട്ടി ഫിലിം ചേംബര്‍ രംഗത്തുവന്നു. സാങ്കേതിക കാരണങ്ങളുടെ പേരിലാണ് ചിത്രത്തിന് ഈശോ എന്ന പേര് നല്‍കാന്‍ കഴിയില്ലെന്ന് ഫിലിം ചേംബര്‍ നിലപാട് സ്വീകരിച്ചത്. സിനിമ പ്രഖ്യാപിക്കുന്നതിന് മുന്‍പ് പേര് രജിസ്റ്റര്‍ ചെയ്തിരിക്കണമെന്ന ചട്ടം ലംഘിച്ചു, നിര്‍മാതാവ് അംഗത്വം പുതുക്കിയിട്ടില്ല തുടങ്ങിയ കാരണങ്ങളാണ് ഫിലിം ചേംബര്‍ മുന്നോട്ടുവച്ചിരിക്കുന്നത്

അതേസമയം ചിത്രത്തിന് പേര് അനുവദിക്കണമെന്ന് ആവശ്യപ്പെട്ടുള്ള നിര്‍മാതാവിന്റെ അപേക്ഷ തള്ളിയെങ്കിലും ഒ.ടി.ടി റിലീസിന് ഈശോ എന്ന പേര് ഉപയോഗിക്കുന്നതിന് തടസമില്ല.

നാദിര്‍ഷയുടെ സിനിമയ്ക്ക് 'ഈശോ' എന്ന് പേരിട്ടതിന് പിന്നാലെ പി സി ജോര്‍ജ് ഉള്‍പ്പടെ നിരവധി പേരാണ് വിമര്‍ശനവുമായി രംഗത്തെത്തിയത്. വിവാദങ്ങള്‍ക്കിടയില്‍ ഈ വിഷയവുമായി ബന്ധപ്പെട്ട് വൈദികനായ ജെയിംസ് പനവേലിലിന്റെ പ്രസംഗം സോഷ്യല്‍ മീഡിയയില്‍ വൈറലാകുകയും ചെയ്തു.

ചിത്രത്തിന്റെ അണിയറ പ്രവര്‍ത്തകരെ പിന്തുണച്ചുള്ളതാണ് ഫാദര്‍ ജെയിംസ് പനവേലിലിന്റെ പ്രസംഗം. ഈ സിനിമ ഇറങ്ങിയാല്‍ പഴുത്ത് പൊട്ടാറായി നില്‍ക്കുന്ന വ്രണമാണോ നിങ്ങളുടെ മതവികാരമെന്ന് അദ്ദേഹം ചോദിക്കുന്നു. ഇതിനപ്പുറമാണ് ക്രിസ്തു, എന്ന് മനസിലാക്കുന്ന ഒരു വിശ്വാസിക്ക് ഇതൊന്നും ഒന്നുമല്ലെന്നും വൈദികന്‍ കൂട്ടിച്ചേര്‍ത്തു. പ്രസംഗത്തിന്റെ വീഡിയോ സംവിധായകന്‍ ജീത്തുജോസഫ് ഫേസ്ബുക്കില്‍ പങ്കുവച്ചിട്ടുണ്ട്.

വൈദികന്റെ വാക്കുകള്‍ ഇങ്ങനെയായിരുന്നു

അവന്റെ വേദന നിന്റെ തന്നെ നീറ്റലാണ് എന്ന് തിരിച്ചറിയാന്‍ പറ്റുന്ന വകബോധമാണ്. ഈ വകബോധം നിങ്ങള്‍ക്ക് ഇല്ലാതാകുമ്പോള്‍, നിങ്ങളൊരു മനുഷ്യനല്ലാതായി മാറുന്നു. സ്വാതന്ത്ര്യം ലഭിച്ചിട്ട് എഴുപത്തിയഞ്ച് വര്‍ഷം പിന്നിട്ടുകഴിയുമ്പോള്‍ നമ്മള്‍ ചിന്തിക്കേണ്ട കാര്യമിതാണ്. നമുക്ക് സൗകര്യങ്ങളുണ്ട്, വികസനമുണ്ട്, നേട്ടങ്ങളുണ്ട്.പക്ഷേ നമ്മുടെ കൂടെ ജീവിക്കുന്ന മനുഷ്യനെ അവന്റെ നിറം നോക്കി, മതം നോക്കി, ജാതി നോക്കി,കുടുംബമഹിമ നോക്കി വകഞ്ഞുമാറ്റുന്ന മനോഭാവം നിനക്കുണ്ടോ, ക്രിസ്തുവില്ല...ജീവിതത്തില്‍ സത്യമില്ല.

രണ്ടാഴ്ച മുന്‍പാണ് നാദിര്‍ഷയുടെ ഇറങ്ങാനിരിക്കുന്ന സിനിമയ്ക്ക് പേര് വീണത്, ഈശോ. ഈ പേര് വീണതും വാളും വടിയുമായി കത്തിക്കാനിറങ്ങിത്തിരിച്ച ഒരു െ്രെകസ്തവ സമൂഹം ഇവിടുണ്ട്. ഇതിനുമുന്‍പും പല സിനിമകള്‍ക്കും പേര് വന്നിട്ടുണ്ട്. ഈമയൗ (ഈശോ മറിയം യൗസേപ്പ്), ആമേന്‍, ഹല്ലേലുയ്യ, എന്തെല്ലാം സിനിമകള്‍ ഉണ്ടായിട്ടുണ്ട്. അന്നൊക്കെ സംയമനം പാലിച്ച ക്രിസ്ത്യാനി വാളെടുത്തിറങ്ങിയിരിക്കയാണ്.

സമൂഹമാദ്ധ്യമങ്ങളില്‍ നമുക്ക് പേര് വീണു. അറിയില്ലെങ്കില്‍ പറയാം, ക്രിസംഘി. നമ്മുടെ സ്വഭാവം കൊണ്ട് നമുക്ക് കിട്ടിയ പേരാണ്. പണ്ടൊന്നും നമ്മള്‍ ഇങ്ങനെയായിരുന്നില്ല. മറ്റുള്ളവരേക്കാളും തീവ്രമായ വര്‍ഗീയത എങ്ങനെയാണ് നമ്മളിലേക്ക് വന്നത്. ഈശോ എന്ന പേരാലാണോ? ഒരു സിനിമയിലാണോ? ഒരു പോസ്റ്ററിലാണോ? അങ്ങനെ ഒരു സിനിമ ഇറങ്ങിയാല്‍ പഴുത്ത് പൊട്ടാറായി നില്‍ക്കുന്ന വ്രണമാണോ നിങ്ങളുടെ മതവികാരം. ഇതിനപ്പുറമാണ് ക്രിസ്തു, എന്ന് മനസിലാക്കുന്ന ഒരു വിശ്വാസിക്ക് ഇതൊന്നും ഒന്നുമല്ല.ക്രിസ്തുവിനെ ഉള്‍ക്കൊള്ളാന്‍ കഴിയാതെ വരുമ്പോഴാണ് കൊത്തി കീറാനും മാന്തി കീറാനും തീ കത്തിക്കാനും ഇറങ്ങുന്ന വര്‍ഗീയവാദി ക്രിസ്ത്യാനികളാകുന്നത്. ഇത് സമുദായവാദമാണ്, മതാത്മകതയാണ്. നമുക്ക് വേണ്ടത് സമുദായവാദമോ മതാത്മകതയോ അല്ല. നമുക്ക് വേണ്ടത് ആത്മീയതയാണ്. അത് മനുഷ്യനെ സ്‌നേഹിക്കലാണ്.' അച്ചന്റെ ഈ വാക്കുകള്‍ സമൂഹത്തില്‍ ഇടിത്തീയായി. എന്തുഫലം ഫിലിം ചേംബര്‍ തന്നെ കത്തി വച്ചു.