സഹകരണ സംഘം രജിസ്റ്റര്‍ ചെയ്ത് 6 ലക്ഷം രൂപയുടെ തൊഴില്‍ തട്ടിപ്പ് നടത്തിയ വഞ്ചനാ കേസില്‍ പ്രസിഡന്റും റിക്രൂട്ടിംഗ് ഏജന്റും ഭരണ സമിതി അംഗങ്ങളുമടക്കം 4 പ്രതികള്‍ക്ക് മുന്‍കൂര്‍ ജാമ്യമില്ല.

തിരുവനന്തപുരം ഏഴാം അഡീ. ജില്ലാ സെഷന്‍സ് കോടതിയാണ് പ്രതികള്‍ക്ക് ജാമ്യം നിഷേധിച്ചത്. ഗൗരവമേറിയ സാമ്പത്തിക തട്ടിപ്പു കേസിലെ പ്രതികള്‍ രണ്ടാഴ്ചക്കകം അന്വേഷണ ഉദ്യോഗസ്ഥനായ കരമന പോലീസ് സര്‍ക്കിള്‍ ഇന്‍സ്‌പെക്ടര്‍ മുമ്പാകെ കീഴടങ്ങാനും ജഡ്ജി എല്‍.ജയവന്ത് ഉത്തരവിട്ടു.

നിയമന തട്ടിപ്പു കേസിലെ പ്രതികളായ കേരള ട്രഡീഷണല്‍ ഫുഡ് പ്രോസസ്സിംഗ് ആന്റ് ഇന്‍ഡസ്ട്രിയല്‍ കോ - ഓപ്പറേറ്റീവ് സൊസൈറ്റി പ്രസിഡന്റ് ചിറയിന്‍കീഴ് സ്വദേശി സജിത്കുമാര്‍ (43) , റിക്രൂട്ടിംഗ് ഏജന്റ് വെഞ്ഞാറമൂട് സ്വദേശി കെ. എസ്. ഹര്‍ഷന്‍ (55) , ഭരണ സമിതി അംഗങ്ങളായ അഞ്ചുതെങ്ങ് സ്വദേശി സജി.സി (33) , കുറക്കട സ്വദേശി ശ്രീരാജ് (23) എന്നിവര്‍ക്കാണ് ജാമ്യം നിരസിച്ചത്. രണ്ടു വഞ്ചനാ കേസുകളിലാണ് ജാമ്യം നിരസിച്ചത്.


പ്രതികളെ പോലീസ് കസ്റ്റഡിയില്‍ ചോദ്യം ചെയ്ത് ചതിച്ചെടുത്ത 6 ലക്ഷം രൂപ വീണ്ടെടുക്കേണ്ടതുണ്ടെന്ന വാദിഭാഗം അഡ്വ. നെയ്യാറ്റിന്‍കര. പി. നാഗരാജിന്റെയും അന്വേഷണം പ്രാരംഭ ഘട്ടത്തിലായതിനാലും പ്രതികള്‍ ഒളിവില്‍ പോകാന്‍ സാദ്ധ്യതയുണ്ടെന്നുമുള്ള അഡീ.പ്രോസിക്യൂട്ടര്‍ കെ.എല്‍. ഹരീഷ് കുമാറിന്റെയും വാദത്തില്‍ കഴമ്പുണ്ടെന്ന് നിരീക്ഷിച്ചാണ് മുന്‍കൂര്‍ ജാമ്യം നിഷേധിച്ചത്.

ഉദ്യോഗാര്‍ത്ഥികളായ നെയ്യാറ്റിന്‍കര സ്വദേശി വിഷ്ണു. വി. ആര്‍ (26) , വര്‍ക്കല സ്വദേശി സ്വരാജ്. എസ് (33) എന്നിവര്‍ക്ക് ഫ്‌ലോര്‍ മാനേജര്‍ ജോലി വാഗ്ദാനം ചെയ്ത് സഹകരണ സംഘം രജിസ്ട്രാറുടെ അനുമതിയില്ലാതെ വ്യാജ നിയമന ഉത്തരവുകള്‍ നല്‍കി 6 ലക്ഷം രൂപ വഞ്ചിചിച്ചെടുത്തെന്നാണ് കേസ്.