നടുറോഡില്‍ കൊടുംക്രൂരത..... രണ്ടാം ഭാര്യയെ നടുറോഡില്‍ കഴുത്തറുത്ത് കൊലപ്പെടുത്തിയ ഭര്‍ത്താവിനെ പോലീസ് അറസ്റ്റു ചെയ്തു. ഇന്നലെ വൈകിട്ട് 4ന് ശാസ്തവട്ടം ജംഗ്ഷനില്‍ മങ്ങാട്ടുകോണം റോഡിലാണ് കൊടും ക്രൂരകൊലപാതകം നടന്നത്.


നെടുമങ്ങാട് ഇരിഞ്ചയം മീന്‍മൂട് കിഴക്കുകര പുത്തന്‍വീട്ടില്‍ രാധയുടെ മകള്‍ പ്രഭയാണ് (37) ദാരുണമായി കൊല്ലപ്പെട്ടത്. ഇവരുടെ ഭര്‍ത്താവ് മങ്ങാട്ടുകോണം മഠത്തിന്മേലെ തടത്തരികത്ത് രേഷ്മാ ഭവനില്‍ സെല്‍വരാജാണ് (48) രക്ഷപ്പെടാന്‍ ശ്രമിക്കുന്നതിനിടെ പോത്തന്‍കോട് പൊലീസിന്റെ പിടിയിലായത്. ആദ്യ ഭാര്യ പിണങ്ങിപ്പോയ ശേഷം പത്തു വര്‍ഷം മുമ്പാണ് പ്രഭയെ സെല്‍വരാജ് വിവാഹം കഴിച്ചത്. ഇവര്‍ക്ക് അഭിനവ രാജ്(6),അഭയ(4) എന്നീ മക്കളുണ്ട്.

മങ്ങാട്ടുകോണത്ത് സെല്‍വരാജിന്റെ കുടുംബവീട്ടില്‍ താമസിച്ചിരുന്ന ഇവര്‍ എട്ടു മാസം മുന്‍പ് ഇരിഞ്ചയത്ത് പ്രഭയുടെ വീട്ടിലേക്ക് മാറിയിരുന്നു. എന്നാല്‍, ഭാര്യയുമായി വഴക്കിട്ട് പിരിഞ്ഞ സെല്‍വരാജ് ഈ മാസം 20ന് കുടുംബവീട്ടിലെത്തി അമ്മയോടൊപ്പം വീണ്ടും താമസമാക്കി.


മങ്ങാട്ടുകോണത്ത് ടെക്‌നോപാര്‍ക്ക് ജീവനക്കാരുടെ വീട്ടില്‍ കഴിഞ്ഞ മൂന്നുവര്‍ഷമായി ജോലി നോക്കുന്നുണ്ട് പ്രഭ. രണ്ട് ദിവസം മുമ്പ് സെല്‍വരാജ് ഇവിടെയെത്തി ഭാര്യയുമായി വഴക്കിട്ടപ്പോള്‍, വീട്ടുടമസ്ഥര്‍ പൊലീസിനെ വിളിക്കുമെന്ന് പറഞ്ഞ് വിരട്ടി വിട്ടിരുന്നു.




പ്രഭ ഇന്നലെ ഇവിടത്തെ ജോലി കഴിഞ്ഞ് ബസ് സ്റ്റോപ്പിലേക്ക് നടന്നു പോകുമ്പോള്‍ തുണികൊണ്ട് വായ പൊത്തിപ്പിടിച്ച് കൈയില്‍ കരുതിയിരുന്ന കത്തി ഉപയോഗിച്ച് കഴുത്തറുക്കുകയായിരുന്നു. പ്രഭയുടെ മൃതദേഹം മെഡിക്കല്‍ കോളേജ് ആശുപത്രി മോര്‍ച്ചറിയിലേക്ക് മാറ്റി.

വാര്‍ക്കപ്പണിക്കാരനാണ് സെല്‍വരാജ്. ആദ്യ ഭാര്യയില്‍ രണ്ട് പെണ്‍മക്കളുണ്ട്. ഭാര്യ പിണങ്ങിപ്പോയ ശേഷം സെല്‍വരാജിന്റെ അമ്മയ്‌ക്കൊപ്പമായിരുന്നു കുട്ടികള്‍. ഇവരില്‍ ഒരാള്‍ മൂന്ന് വര്‍ഷം മുന്‍പ് ജീവനൊടുക്കി. ഒരാളുടെ വിവാഹം കഴിഞ്ഞു.